Ձեր վստահելի աղբյուրը

Panorama.am-ը տեղեկացրել էր , որ Եվրախորհրդարանի մաս կազմող կուսակցությունների 6 խմբեր բանաձևերի նախագծեր են ներկայացրել, որոնք առնչվում են Հունգարիայի իշխանությունների կողմից Ադրբեջանին արտահանձնած ոճրագործ Ռամիլ Սաֆարովի ներման ու ազատ արձակման որոշմանը: Թեմայի առնչությամբ պարզաբանումներ ստանալու նպատակով, Panorama.am-ը զրուցեց ԱԺ արտաքին հարաբերությունների հանձնաժողովի նախագահ Արտակ Զաքարյանի հետ, ով տեղեկացրեց, որ ներկայումս քննարկման է դրվել բոլոր խմբերի կողմից ներկայացված բանաձևերի միասնական տարբերակը:

«Քննարկվող միասնական բանաձևը շեշտադրում է օրենքի գերակայությունը և ստանձնած պարտականությունների հարգումը, քննադատում է Ադրբեջանի նախագահի կողմից Ռամիլ Սաֆարովին ներում շնորհելու որոշումը, որովհետև որոշումն ընկալվում է որպես ժեստ, որը հետագայում կարող է նպաստել լարվածության խորացմանը, ինչպես նաև մեծացնում է անարդարության զգացումը և երկու երկրների միջև լարվածությունը:

Բանաձևում սահմանվում է, որ Սաֆարովին ներում շնորհելը Հունգարական իշխանություններին տված խոստումների համտեքստում Ադրբեջանի կողմից դիվանագիտական նորմերի խախտում է, քննադատում Ադրբեջանում Սաֆարովին որպես հերոս ընդունելը, նրան ներում շնորհելը և ութ տարվա աշխատավարձ վճարելու որոշումը՝ մտահոգություն հայտնելով, որ այն հետագա սերունդներին որպես օրինակ կծառայի:

Բանաձևը կրկին վերահաստատում է այն տեսակետը, ըստ որի` ներկայումս քննարկվող` Ադրբեջանի և Եվրամիության միջև համագործակցության համաձայնագիրը պետք է ներառի կետեր՝ մարդու իրավունքների պաշտպանության և օրենքի գերակայության վերաբերյալ: Սա հատուկ ընդգծվում է, որ ցույց է տրվում, որ խնդիրը Ադրբեջանում բաց է և Եվրամիությունը պետք է այդ երկրին պարտադրի, որպեսզի Ադրբեջանը հարգի մարդու իրավունքները և ընդունի դրա գերակայությունը:

Բանձևի ընդունումից հետո այն պետք է փոխանցվի Եվրոպայի Խորհրդին, Եվրոպական հանձնաժողովին, Հայաստանի և Ադրբեջանի կառավարություններին ու խորհրդարաններին, ԵԽԽՎ-ին, ԵԱՀԿ-ին, ՄԱԿ-ին, մարդու իրավունքների հանձնակատարի զեկուցողին:

-Իսկ կա որևէ դրույթ, որը կամ անընդունելի է, կամ վտանգավոր հայկական կողմի համար:
-Դրանում մի դրույթ կա, որ մեզ համար անընդունելի է: Բանաձևի նախագծում նշվում է, որ «գրավյալ տարածքներում խաղաղ կարգավորման գործընթացի թերացման հետ կապված տրամաբանական խորհրդատվությունը չի լրացնում ոչ վրեժի գործողությունը և ոչ էլ անօգուտ սադրանքները, որոնք ավելացնում են արդեն իսկ գոյություն ունեցող լարվածությունը»: «Գրավյալ տարածքներ» արտահայտությունը կարծում եմ, պետք է դուրս գա, որովհետև նախ չի արտացոլում իրական պատկերը և երկրորդը, չի բխում այս բանաձևի բուն նպատակային խնդիրներից:

-Եվրախորհրդարանն իր այս բանաձևով ի՞նչ խնդիր է փորձում լուծել, ի՞նչ հետևանքներ կարող է ունենալ նշյալ բանաձևի ընդունումը:
-Կարծում եմ, որ տեղի ունեցածը Եվրոպայում մեծ մտահոգության խնդիր է այն առումով, որ ըստ էության, վտանգված է եվրոպական արժեքային համակարգը: Այսինքն` Ադրբեջանի և Հունգարիայի միջև տեղի ունեցած գործարքը ուղղված է այն արժեքային համակարգի դեմ, որը պարբերաբար քարոզում է և ընկած է եվրոպական երկրների համագործակցության հիմքում` ժողովրդավարություն, մարդու իրավունքներ, փոխադարձ հարգանք և այլն: Կարծում եմ՝ և՛ Եվրախորհրդարանը, և´ նրանում ներառված քաղաքական ուժերը, իհարկե, այս խնդրի շուրջ ունենալով ամենատարբեր շահեր, պատկերացումներ ու մոտեցումներ, բացևայնպես յուրաքանչյուրի քաղաքական նպատակն է նաև պաշտպանել արժեքային համակարգի դեմ ուղղված ցանկացած ոտնձգություն: Այսինքն` ըստ էության, մենք արձանագրում ենք, որ միջազգային գրեթե բոլոր կառույցները անդրադարձել են այս երևույթին ու ես կարծում եմ, որ խորհրդարանական մակարդակում ապագայում այս հարցն անընդհատ շարունակություն ունենալու է, անընդհատ պետք է ծնվեն դատապարտող բանաձևեր, հայտարարություններ, զեկուցներ, որոնք մեկը մյուսին ամրապնդելով պետք է կարողանան դրական նպաստ ունենալ ժողովրդավարության սկզբունքների և, իհարկե, կայունության ու խաղաղության հաստատման գործընթացներում: