Ձեր վստահելի աղբյուրը

ԱԺ ԲՀԿ խմբակցության քարտուղար Նաիրա Զոհրաբյանը հայտարարել է, թե տարօրինակ է համարում այն փաստը, որ Եվրոպայի ժողովրդական կուսակցությունը, որում դիտորդի կարգավիճակ ունեն հայաստանյան երեք կուսակցությունները՝ ՀՀԿ-ն, ՕԵԿ-ն ու «Ժառանգությունը» հանդես չեն  եկել որևէ պաշտոնական գնահատականով, իսկ հայաստանյան կուսակցությունները դրա հետ կապված ԵԺԿ-ից պարզաբանում չեն պահանջել:

Մեկնաբանելով վերոնշյալ հայտարարությունը` ԱԺ ՀՀԿ խմբակցության պատգամավոր Արտակ Դավթյանը նշեց. «Ինչո՞ւ են մարդիկ կարծում, որ արդարության վերականգնմանը կարելի է հասնել բացառապես հայտարարությունների միջոցով: Բնական է, որ միջազգային կառույցները նման ակտիվությամբ դատապարտեցին Սաֆարովի արտահանձման ու նրան ներում շնորհելու հետ կապված փաստը, սակայն այս խնդիրը միայն հայտարարություններով չի սահմանափակվում»:

Հիշեցնելով ԵԺԿ-ի ղեկավարի ու ՀՀ նախագահի՝ այդ առթիվ ունեցած հեռախոսազրույցը, պատգամավորը նշեց, որ միջազգային տարբեր կառույցներում ևս ՀՀԿ-ն տարբեր խնդիրների շուրջ համագործակցում է ԵԺԿ-ի հետ, իսկ այդ աշխատանքը միշտ չէ, որ հրապարակային դաշտում երևում է:

Միաժամանակ Ա. Դավթյանը նշեց, որ զարմանում է, թե ինչո՞ւ են հենց ԵԺԿ-ից նման սպասումներ ակնկալում, որը կուսակցության կարգավիճակ ունի ու պարտադիր չէ, ողջ եվրոպայում տեղի ունեցող նմանատիպ միջադեպերի վերաբերյալ հայտարարություններ կամ գնահատականներ տարածի:

«Սաֆարովի դեպքը ծանր հարված էր եվրոպական արժեքներին, այն արժեքներին, որոնք տարիներ ի վեր քարոզվում են: Արդարության վերականգման հարց կա և չպետք է մենք ամեն ինչ թողեն ու սկսենք մտածել, թե ինչու այս կամ այն կուսակցության ղեկավարը միայն զանգեց ու հայտարարություն չտարածեց կամ ինչո՞ւ բարեկամ հանդիսացող այս երկիրը արձագանքեց, բայց մյուսն ուղղակի իր աջակցությունը հայտնեց: Այստեղ առաջնայինն ու երկրորդայինից միմյանցից տարբերելու խնդիր կա»,- ասաց Ա. Դավթյանը:

«Այդ հարցը քննարկվելու է «Ժառանգություն»-ում և ես խորհուրդ կտայի Նաիրա Զոհրաբյանին չշտապել, հատկապես երբ խոսքը վերաբերում է այլ կուսակցությունների քաղաքական օրակարգին»,-Panorama.am-ին ասաց «Ժառանգություն» կուսակցության մամլո խոսնակ Հովսեփ Խուրշուդյանը` մեկնաբանելով ԱԺ Եվրաինտեգրման հարցերի մշտական հանձնաժողովի նախագահ Նաիրա Զոհրաբյանի հայտարարությունը:

Հ.Խուրշուդյանը դժվարացավ ժամկետ նշել, թե երբ կուսակցությունը, որ ԵԺԿ-ում դիտորդի կարգավիճակ ունի, կքննարկի այդ հարցը: Իսկ ահա այն հարցին, թե արդյո՞ք կուսակցությունը չի ուշացնում հարցի քննարկումը, նշեց.
«Ամեն դեպքում թույլ տվեք կուսակցությունն ինքը որոշի իր օրակարգը ու քայլերի ժամկետները»:

Ինչ վերաբերում է այն հարցին, թե «Ժառանգությունը» հնարավոր համարում է հարցը քննարկել մյուս երկու կուսակցությունների հետ, որոնք ևս դիտորդի կարգավիճակ ունեն, կուսակցության մամլո խոսնակը միայն ասաց, որ քանի դեռ այդ հարցը կուսակցության ներսում չի քննարկվել , դրա հավանականության մասին խոսել էլ չի կարող:

«ԱԺ ամբիոնից արդեն հնչեցրել եմ «Օրինաց երկիր» կուսակցության հայտարարությունն այն մասին, որ մենք պետք է բոլոր միջազգային հարթակներում` ԵԽԽՎ, ԵԱՀԿ, ՆԱՏՕ և այլն, բարձրաձայնենք կատարվածի մասին: Խոսքը նաև ԵԺԿ-ին է վերաբերում և մենք վստահ ենք, որ դա հիմնաքար է, որպեսզի կարողանանք Լեռնային Ղարաբաղի խնդիրը առաջ տանենք»,-Panorama.am-ի նույն հարցին ի պատասխան իր` երեքշաբթի օրվա ելույթը հիշեցրեց ու ասաց ՕԵԿ խմբակցության ղեկավար Հեղինե Բիշարյանը: