Ձեր վստահելի աղբյուրը

Ադրբեջանցի ոճրագործ Ռամիլ Սաֆարովի արտահանձնման և ադրբեջանական իշխանությունների կողմից ներում շնորհելու հարցի քննարկումները Եվրախորհրդարանում ավարտվել են և ընդունվել է համապատասխան բանաձև: Եվրախորհրդարանի հիմնական քաղաքական ուժերի` պահպանողականների, սոցիալիստների, կանաչների, լիբերալներ ու ժողովրդավարների, «Եվրոպական ժողովրդական կուսակցություն» խմբակցությունները, բանաձևերի նախագծեր են կազմել, յուրաքանչյուրում դատապարտելով Ռամիլ Սաֆարովին ներում շնորհելու որոշումը, ինչպես նաև Ադրբեջանին ու Հայաստանին իրավիճակը չսրելու մասին կոչեր ու առաջարկներ են արվել:

Ընդունված տարբերակում Եվրախորհրդարանը դատապարտում է Ադրբեջանի նախագահի` ոճրագործ Ռամիլ Սաֆարովին ներում շնորհելու որոշումը, այդ քայլը գնահատում որպես հայ-ադրբեջանական լարվածությանը նպաստող քայլ: Եվրոպացի պատգամավորները դա համարում են սադրիչ գործողություն և կարևորում Հայաստանին ու Ադրբեջանին օժանդակելը, որպեսզի երկու երկրները «կարողանան գտնել սահման իրենց միջև եղած հակամարտությանը»: Եվրախորհրդարանը, դատապարտելով Ադրբեջանի արարքը, մտահոգություն է հայտնում, որ այն կարող է ապագա սերունդների համար օրինակ ծառայել:

Եվրախորհրդարանը հիշեցնում է, որ Ասոցացման համաձայնագիրը, որի ստորագրման շուրջ Ադրբեջանի հետներկայում բանակցություններ են ընթանում, ընդգրկում է մարդու իրավունքների պաշտպանության և խթանման դրույթներ ու չափորոշիչներ, որոնց պետք է հետևել: ԵԽ-ն կոչ է անում Ադրբեջանի իշխանություններին ջանքեր գործադրել՝ բարեփոխելու դատական ողջ համակարգը, ինչպես նաև կոչ է անում Ադրբեջանին՝ ենթարկվել Մարդու իրավունքների եվրոպական դատարանի կայացրած բոլոր վճիռներին:

Օրենսդիրը հանձնարարում է Եվրախորհրդարանի նախագահին, որպեսզի վերջինն այս բանաձևը փոխանցի Եվրոպայի խորհրդին, Հանձնաժողովին, Եվրոպական արտաքին հարաբերությունների ծառայությանը, Ադրբեջանի և ԵՄ անդամ պետությունների կառավարություններին և խորհրդարաններին: