Ձեր վստահելի աղբյուրը

Քաղաքագետների միության նախագահ Հմայակ Հովհաննիսյանի դեմ Կենտրոն և Նորք Մարաշ վարչական շրջանների ընդհանուր իրավասության դատարանում միանգամից երեք հայց է ներկայացվել: Բոլոր երեք հայցերն էլ ներկայացրել է «Հայհիդրոնախագիծ» ՓԲԸ-ի բաժնետեր Սենիկ Ջուլհակյանը, որին այդ ընկերությունը վաճառվել է կառավարության որոշմամբ, այս տարվա մարտին:

«Հայհիդրոնախագիծ» ընկերության շենքի 1-ին հարկում տեղակայված է նաև Հմայակ Հովհաննիսյանի ղեկավարած Քաղաքագետների միությունը, որն ինչպես գլխավոր քաղաքագետն ասաց, իր սեփականությունն է: Սենիկ Ջուլհակյանի բազմաթիվ առաջարկներին վաճառել տարածքը իրեն, ինչպես Հմայակ Հովհաննիսյանն ասաց մեզ հետ զրույցում, մերժումով է պատասխանել: Ստանալով մերժողական պատասխաններ, Սենիկ Ջուլհակյանը Քաղաքագետների միության գրասենյակ է ուղարկում գրություն` տարածքը ազատելու պահանջով:

Դրանից հետո այդ թեմայով հրավիրված ասուլիսում Հմայակ Հովհաննիսյանի հայտարարությունները, թե Սենիկ Ջուլհակյանը «ավանտյուրիստ է, անբարեխիղճ ու խաբել է Չեխիայի հայ համայնքին», հիմք են համարվել, որ նա պատվի, արժանապատվության վիրավորանքի հայցով դիմի դատարան: Այս հայցով Սենիկ Ջուլհակյանը Հմայակ Հովհաննիսյանից պահանջում է 2 մլն դրամ, որից 1 մլն-ը` փաստաբանական ծախսերի համար:

Հովհաննիսյանին նույնքան գումարի պահանջ է ներկայացվել նաև երկրորդ հայցով. Այս հայցը ապրիլի 21-ի իրադարձությունների ծնունդ է: Քաղաքագետների միության նախագահը պատմում է, որ մի քանի «ագրեսիվ կանայք» այդ օրը արգելափակել են իր մուտքը գրասենյակ: «Ես այդ կանանց ասել եմ, որ իրենք նմանվում են Լֆիկ Սամոյի կողմից վարձված այն կանանց, որոնք խոչընդոտում էին մյուս թեկնածուի (նկատի ունի Նիկոլ Փաշինյանին-հեղ.) քարոզարշավը: Ուշադրություն դարձրեք` ես ասել եմ իրենք նմանվում են, այլ ոչ թե իրենք էդպիսին են», -ներկայացնում է Հովհաննիսյանը:

Երրորդ հայցը, որ ներկայացվել է Հմայակ Հովհաննիսյանի դեմ, քրեական հարթության վրա է. նրան մեղադրում են բողոքի ցույցի ժամանակ դրա մասնակիցներից մեկին հրելու, հարվածելու համար:

Ինչևէ, այս երեք հայցերը, քաղաքագետի խոսքով, իր և իր ղեկավարած միության նկատմամբ ճնշման փորձեր են:

«Սա Քաղաքագետների միությանը սնանկացնելու փորձ է, բիրտ ճնշում ուղղված իմ դեմ, որը այն նույն ճնշումների շարունակությունն է, որոնք բերեցին այն բանին, որ ես հրաժարվեցի պատգամավորական մանդատից, դրանով իսկ` խոցելի դառնալով այս կարգի հետապնդումների համար, զրկվելով անձեռնմխելիության կարգավիճակից», -ասում է Հովհաննիսյանը: