Ձեր վստահելի աղբյուրը

ՀՀ կառավարության այսօրվա նիստում քաղաքաշինության նախարար Սամվել Թադևոսյանը վարչապետ Տիգրան Սարգսյանի հանձնարարությամբ ներկայացնելով Հայաստանի Ազգային գրադարանի շենքի վերանորոգման աշխատանքներում արձանագրված թերությունները, նշեց, որ ուսումնասիրություններն արդեն իսկ ավարտել են և ներկայումս ամփոփում են դրանց արդյունքները:

Ըստ նրա` ՀԱԳ-ի շենքի հիմնանորոգման նպատակով 2005 թ-ին կազմվել է տվյալ աշխատանքների նախահաշիվ: Գրադարանի հիմնանորոգման աշխատանքները սկսվել են 2008 թ-ին և ավարտվել 2011-ին` ծախսվելով 690 մլն դրամ: Նախարարի խոսքերով` հիմնանորոգման աշխատանքների ժամանակ չեն իրականացվել նախագծով նախատեսված շենքի սեյսմակայունության բարձրացման աշխատանքները, հիմնական աշխատանքները սխալ հերթականությամբ են կատարվել, նախապատվությունը տրվել է ներքին հարդարման աշխատանքներին: Հիմնանորոգման աշխատանքների ընթացքում չի ապահովվել ջեռուցում և օդափոխություն, իսկ դրա համար հատկացված գումաներով կատարվել են այլ աշխատանքներ:

Աշխատանքների մի մասն, ըստ Ս.Թադևոսյանի, անորակ է կատարվել, հակահրդեհային համակարգի տեսակի ընտրությունը կատարվել է ոչ ճիշտ` անտեսելով Ազգային գրադարանի պրոֆիլային ուղղվածությունը: «Սա նշանակում է, որ 2008-2011թթ-ին կատարված աշխատանքների զգալի մասը պետք է կրկին իրականացվի, ինչպես նաև պետք է պարտադիր կատարվեն 1937 թվականին կառուցված շենքի հիմքերի ուժեղացման աշխատանքներ»,- ասաց նախարարը:

«Ուղղակի խայտառակություն է, խայտառակություն: Կարևորագույն օբյեկտ, որը գտնվում է հանրության ուշադրության կենտրոնում, պետբյուջեից 700 մլն դրամ ենք հատկացրել, աշխատանքները միչև հիմա ավարտված չեն, ու պարզվում է` լրացուցիչ գումարներ պետք է պետությունը հատկացնի»,- վրդովված ասաց վարչապետ Տիգրան Սարգսյանը:

Վարչապետը վերահսկողության ծառայության պետի ղեկավարին, քաղաքաշինության տեսչությանը համատեղ ուսումնասիրություններ կատարելու հանձնարարություն տրվեց: Բացի այդ, հանձնարարեց բոլոր նյութերը հանձնել իրավապահ մարմիններին ոչ միայն այս դեպքում, այլև պետբյուջեից ֆինանսավորված այլ շինաշխատանքների դեպքում: «Եթե այսպիսի կարևորագույն օբյեկտի դեպքում այսպիսի լկտիություն ու այլանդակություններ կան, ապա կարող ենք պատկերացնել, թե մնացած օբյեկտներում ինչպիսի խախտումենր են լինելու: Անհապաղ սկսել աշխատանքները»,- նշեց Տ.Սարգսյանը: