Ձեր վստահելի աղբյուրը

Հայաստանի երիտասարդական հիմնադրամը, Կովկասյան լուսանկարչական արվեստի ասոցիացիան և ՀՀԿ երիտասարդական կազմակերպությունը սեպտեմբերի 22-ին՝ ժամը 19.00, մայրաքաղաքի բոլոր բնակիչներին և քաղաքի հյուրերին հրավիրում են Երևանի մանկական այգի (քաղաքապետարանի հարևանությամբ, Կոմայգի)՝ մասնակցելու «Կինոպուրակ. ֆիլմ բաց երկնքի տակ» նախագծին։

Հիմնադրամի մամուլի ծառայությունից հայտնում են, որ սեպտեմբերի 22-ին «Կինոպուրակում» կցուցադրվի 2001թ. նկարահանված «Ամելի» ֆիլմը՝ Օդրի Տոտուի անզուգական խաղով։ Ֆրանսիական «Ամելի» կինոնկարը համաշխարհային կինեմատոգրաֆիայի՝ բոլոր ժամանակներում նկարահանված ոչ անգլերեն լեզվով ֆիլմերի շարքում ճանաչվել է երկրորդը, 2002թ. վեց անվանակարգում այն արժանացել է «Օսկար»  մրցանակի։

«Կինոպուրակը» բոլոր կինոսերներին հրավիրում է նաև սեպտեմբերի 23-ին՝ ժամը 19.00, արդեն վերջին ժամանակներում նկարահանված, կինոքննադատների և կինոմանների շրջանում բավականին մեծ աղմուկ բարձրացրած ֆրանսիական «1+1» ֆիլմի դիտմանը։ Այս ֆիլմի հիմքում ընկած են իրական փաստեր:
«Կինոպուրակ» ծրագիրը նոր մշակույթ է ձևավորում քաղաքային կյանքում։ Ծրագրի շրջանակներում ցուցադրվում են բացառապես համաշխարհային կինեմատոգրաֆիայի լավագույն ֆիլմերը, որոնք բացի երևանցիների ժամանցը հետաքրքիր դարձնելուց, ունեն նաև ճանաչողական, դաստիարակչական և ուսուցողական բնույթ։
Կինոդիտմանը կմասնակցեն նաև կինոգետներ, ռեժիսորներ, կինոքննադատներ։ Մուտքն ազատ է, հրավիրվում են բոլոր կինոսերները։