Ձեր վստահելի աղբյուրը

«Հունգարիայում ադրբեջանցի Ռամիլ Սաֆարովի կողմից կացնահարված հայ սպա Գուրգեն Մարգարյանի սպանության հարցով եվրոպական կառույցները Ադրբեջանին կարող են ճնշել քաղաքական լծակներով»,- այսօրվա ասուլիսի ժամանակ հայտարարեց իրավունքի միջազգային փորձագետ Լևոն Գևորգյանը:

Բանախոսի համոզմամբ՝ միջազգային ատյաններում դատավարությունը կարող է տարիներ տևել, բայց կարևորը կլինի արդյունքը, քանի որ գործերի առանձնահատկությունը կայանում է նրանում, որ իրավունքների, կոնվենցիայի խախտումից զատ հայկական կողմը գործ ունի խտրականության բոլոր ձևերի վերացման կոնվենցիայի հավանական խախտման հետ:

«Դա ասում է, որ յուրաքանչյուր պետություն պետք է սեփական տարածքում արգելի էթնիկ խտրականությունը և ընդհանրապես պատժի խտրական դրսևորոումները: Երբ գործ ունենք խտրականության հիմքով կատարված սպանության հետ, որի համար ներում է շնորհվել, սա կոնվենցիայի ակնհայտ խախտում է դիտարկվում: Իհարկե, այս կոնվենցիայի հիման վրա եվրոպական դատարան հնարավոր չէ մտնել, այլ պետք է դիմել ՄԱԿ-ի արդարադատության միջազգային դատարան: Եթե տեսականորեն ենթադրենք, որ միջազգային դատարանն արձանագրում է, որ Ադրբեջանը խտրականություն է դրսևորել հայերի նկատմամբ, որովհետև հայի սպանությունը գովերգում ու այդ սպանության համար, ներում է շնորհվում, մենք ըստ էության մոտ ենք գալիս այն հարցին, թե ինչ քաղաքական հետևանք կարող է ունենալ նման որոշումը: Այսինքն, միջազգային դատական ատյանի արձանագրումը, որ պետությունն իրականացնում է խտրական քաղաքականություն, ինքնին ապացույց է, որ հայ ազգաբնակչության բնակվելն այդ պետության տարածքում, վտանգավոր է»,- պարզաբանեց նա:

Ըստ Գևորգյանի՝ Եվրոպական դատարանում կարող են լինել տուժողներն ընդդեմ Ադրբեջանի, Հայաստանն ընդդեմ Հունգարիայի կամ Ադրբեջանի հավանական հայցեր, իսկ եթե խոսքը գնում է միայն ազգային խտրականության հողի վրա սպանության մասին, ապա հայցը կարող է լինել միայն Հայաստանն ընդդեմ Ադրբեջանի: Փորձագետի խոսքով՝ մարդու իրավունքների եվրոպական դատարանում պահանջը կարող է լինել մեկը ՝ Ադրբեջանի կողմից կյանքի իրավունքի և հայի իրավունքից բխող ընթացակարգերի ոտնահարում: