«Հայաստանը ճիշտ որոշում է կայացրել». Դավիթ Հարությունյանը` Հունգարիայի հետ դիվանագիտական հարաբերությունների սառեցման մասին
ԵԽԽՎ-ում ՀՀ պատվիրակության ղեկավար Դավիթ Հարությունյանը անհամաձայնություն է հայտնել ԵԽԽՎ ղեկավար Ժան Կլոդ Մինյոնի արտահայտած այն տեսակետին, թե Հայաստանի կողմից Հունգարիայի հետ դիվանագիտական հարաբերությունների սառեցումը անընդունելի է:
«Ես հասկանում եմ, որ ԵԱՀԿ ղեկավարի համար, հնարավոր է, անընդունելի լինի այն հանգամանքը, որ Եվրախորհրդի անդամ երկու երկրներ սառեցրել են իրենց հարաբերությունները, սակայն ես բացարձակապես համաձայն չեմ վեհաժողովի ղեկավարի դիրքորոշման հետ: Հայաստանը, նման կերպ վարվելով, ճիշտ որոշում է կայացրել»,-«Panorama.am»-ի թղթակցի հետ զրույցում նշել է Դավիթ Հարությունյանը:
ԵԽԽՎ-ում ՀՀ պատվիրակության ղեկավարի կարծիքով, ճիշտ չէ խոսել երկու երկրների հարաբերությունների մասին այն դեպքում, երբ երկրներից մեկը թյուրիմացության մեջ է գցում մյուսին:
«Հունգարիայի իշխանությունները ամենաբարձր մակարդակով հավաստիացնում էին հայկական կողմին Սաֆարովի արտահանձնման հարցի իսպառ բացակայության մեջ, իսկ այնուհետև պարզվեց, որ այսպիսի հարց չկար միայն արտգործնախարարության օրակարգում և խոսք չէր գնում այն մասին, որ այն բացակայում է Հունգարիայի արդարադատության նախարարության օրակարգում: Երկրների հարաբերություններում, ինչպես և մարդկային հարաբերություններում, իրականության թաքցմանն ուղղված նմանատիպ գործելաոճը անընդունելի է և Հայաստանի կողմից իրականացված քայլը լիովին համարժեք է»,- նշել է . Դ. Հարությունյանը:
Բանախոսը շեշտել է նաև խնդրի ծագման մեղավոր կողմին տարանջատելու կարևորության մասին:
«Մենք չպետք է մոռանանք գլխավոր մեղավոր կողմի` Ադրբեջանի մասին և ես լիովին վստահ եմ որ «մարտական բարձրագույն պատրաստվածության են բերվել» այն պատգամավորները, որոնք կփորձեն արդարացնել Ադրբեջանի նախագահի նման գործելակերպը: Սույն փորձերը միշտ եղել են և ներկայումս էլ առկա են և պատահական չէ, որ այսօր բյուրոյում կայացած օրակարգի քննարկման ժամանակ եղավ սույն հարցը քննարկումից հանելու փորձ: Քննարկումերը կբացահայտեն թե ինչ է այօր իրենից ներկայացնում ԵԽԽՎ-ն: Մեր քաղաքացիների համար անակնկալ կլինի որոշ եվրոպացիների ելույթներ»,- շեշտեց Դավիթ Հարությունյանը` հավելելով, որ վերջին շրջանում նկատվում է Եվրոպայի Խորհրդի հիմնարար արժեքների անկում:
Հիշեցնենք ԵԽԽՎ նախագահ Ժան-Կլոդ Մինյոնը այսօր Ստրասբուրգում կայացած մամուլի ասուլիսի ժամանակ հայտարարել էր, որ անընդունելի է համարում Հայաստանի` Հունգարիայի հետ դիվանագիտական հարաբերությունների սառեցման որոշումը:
«Ինչպե՞ս է հնարավոր, որ Եվրոպայի խորհրդի նման կազմակերպությունում մեկ անդամ-պետությունը դադարեցնի իր հարաբերությունները մյուսի հետ: Դուք պետք է բանակցություններ սկսեք: Մենք դրա համար ենք այստեղ»,- նշել էր Ժան-Կլոդ Մինյոնը:
Նշենք, որ Ռամիլ Սաֆարովի գործի քննարկումը հաստատվել է ԵԽԽՎ օրակարգում վեհաժողովի աշնանային նստաշրջանի անդրանիկ նիստում: Քննարկումները կանցկացվեն հոկտեմբերի 4-ին:
Հիշեցնենք նաև, որ 2004 թվականին ՆԱՏՕ-ի շրջանակներում Հունգարիայի Բուտապեշտ մայրաքաղաքում տեղի ունեցող դասընթացների ժամանակ ադրբեջանցի սպա Ռամիլ Սաֆարովը հայազգի սպա Գուրգեն Մարգարյանին քնած ժամանակ կացնահարել էր: Ռ. Սաֆարովը հունգարական դատարանի կողմից դատապարտվեց ցմահ ազատազրկման, սակայն վերջերս Հունգարիայի կառավարությունը Ռ. Սաֆարովին արտահանձնեց Ադրբեջանին, իսկ վերջինս նրան ներում շնորհեց ու բարձրացրեց զինվորական կոչումը:
Ադրբեջանի այս քայլը արժանացավ միջազգային հանրության քննադատությանն ու պարսավանքին:
Հայաստանը, իր հերթին Ռամիլ Սաֆարովին Ադրբեջան արտահանձնելուն ի պատասխան, կասեցրեց դիվանագիտական հարաբերությունները Հունգարիայի հետ:
Նախորդիվ` ԵԽԽՎ նախագահը անընդունելի և սկանդալային է համարում Ադրբեջանում Ռամիլ Սաֆարովի հերոսացումը
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
