Պետությունը բնակարան է բաշխում ուղղակի անելու համար, առանց ճիշտ հասցեականության
Մեկ տարուց ավելի սպասումից հետո վերջապես, շաբաթ օրը Մարալիկում շահագործման հանձնվեցին սոցիալական երեք շենքերը, որտեղից 59 բնակարան ստացան ինչպես մանկատան շրջանավարտներ, այնպես էլ հաշմանդամներ ու միայնակ տարեցներ: Շենքերի հանդիսավոր բացման կապակցությամբ Մարալիկ էր այցելել վարչապետ Տիգրան Սարգսյանը:
Ասել, որ սա լավ նախաձեռնություն է այնքան էլ ճիշտ չի լինի, եթե հաշվի առնենք, թե քանի հազար կարիքավոր ընտանիքներ սպասում են սեփական չորս անկյունն ունենալուն: Իսկապես մեծ ու կարևոր գործ է, որը բազմաթիվ մարդկանց բնակարանային ծանր հոգսը կթեթևացնի: Նաև գուցե ճիշտ էլ չէ ու նաև ցանկալի էլ չէ մտածել, որ պետությունը դա անում է զուտ անելու համար և ոչ թե իսկապես քաղաքացու հոգսը թեթևացնելու նպատակով, մտահոգ լինելով իր քաղաքացիների ապագայով: Սակայն շաբաթ օրը, դեռ վարչապետը չէր հասել Մարալիկ, Panorama.am-ը ահազանգ ստացավ` բնակարան տվել են, բայց դժվար է անգամ պատկերացնել, ինչպե՞ս կարելի է դրանում ապրել. ամիսներ շարունակ երջանկություն պարգևող միտքը, թե վերջապես տուն կունենան ու նորմալ կապրեն, մեկ վայրկյանում փշրվել է. «Վիճակը շատ լավն է, ամեն ինչ տեղում... ուղղակի ընդամենը մեկ սենյակ է, իսկ մենք չորսս ենք` ես, տղաներս 15 և 16 տարեկան ու 11 տարեկան դուստրս: Ու հնարավոր չէ, որ բոլորովս այդ սենյակում քնենք-զարթնենք ես էլ իրենց հետ» ,-Panorama.am-ի հետ զրույցում ասաց Աստղիկ Եվանգուլյանը:
Նրանց ընտանիքը այս բնակարանը ստացել է, քանի որ ավագ որդին` Արսենը, հաշմանդամ է` չի քայլում ու տեղաշարժվում է միայն սայլակով: Սա ևս մեծ խնդիր է նոր բնակարանում տեղավորվելու ու տեղաշարժվելու իմաստով. «Ինձ մինչև վերջին պահն այդպես էլ չասացին, որ մի սենյակ են ընդամենը տրամադրելու: Անընդհատ նախարարության հետ կապի մեջ եմ եղել, ասում էին` հենց նորություն լինի կասենք, ու միայն երկու օր առաջ զանգեցին ու ասացին, որ բանալիները ստանալու պահն է, բայց էլի չասացին, որ մեկ սենյակ է ընդամենը մեզ հասնում այսքան հույսեր ունենալուց ու սպասելուց հետո»,- պատմեց տիկին Աստղիկը` նեղսրտելով, որ չորս մահճակալը սենյակում տեղադրելուց հետո էլ ոչնչի տեղ չի մնա, անգամ քայլելու:
Միևնույն ժամանակ մեր զրուցակիցը նշեց, որ հրաժարվել էլ չեն կարող, քանի որ անհայտ է` եթե ինչ-որ ընտանիք գա իրենց փոխարեն Մարալիկ, իսկ իրենք վերադառնան Երևան` վարձով բնակության, ինչպես մինչ օրս էր, ապա միայն Աստված գիտի, թե ե՞րբ իրենց հերթը կհասնի: Բայց մյուս կողմից էլ անհնար է պատկերացնել, որ չորս հոգանոց ընտանիքը ապրի մեկ սենյակում:
Ինչ վերաբերում է բնակարանի պայմաններին, տիկին Աստղիկն ասաց, որ մնացած ամեն ինչ լավ է. «Ես չեմ կարող ասել, որ ինչ-որ բան թերի է... պատասխանատուին խնդրեցինք, որ գոնե մի քիչ արևկողմ լիներ բնակարանը, էն էլ պատասխանեցին, թե միևնույն է բոլոր տներում արևը երկու ժամ է ընդամենը, ոչ ավելի»:
Խոսակցության վերջում երեք երեխաների մայրը նշեց, որ պատրաստվում է անձամբ մոտենալ վարչապետ Սարգսյանին ու խնդիրը ներկայացնել, նաև խնդրել, որ բնակարանի հարցը, հաշվի առնելով, որ որդին հաշմանդամ է, վերանայվի: Այդպես էլ արել էր. Արսենի հետ մոտեցել էին Տիգրան Սարգսյանին, սակայն ինչպես մեզ ավելի ուշ պատմեց տիկին Աստղիկը` վարչապետն ուղորդել էր հարցը քննարկել նախարարության հետ, իսկ նախարարությունից էլ ասել էին, որ ոչնչով չեն կարող օգնել` դա է: Այնպես որ, տիկին Աստղիկն ու նրա երեք երեխաները ուղղակի ստիպված են բնակվել մեկ սենյականոցում. «Մտածում էի` լավ, այս մի տարին կգնանք-կգանք, որովհետև չեմ ուզում Արսենին ավելորդ սթրեսի ենթարկեմ ու դպրոցը փոխեմ, քննական տարի է: Բայց այսպես էլ, փաստորեն, ստացվում է, որ մի սթրեսային իրավիճակից խուսափելով եկանք ընկանք մյուս սթրեսայինի մեջ: Չգիտեմ էլ ուղղակի ինչ անեմ` ոչ հրաժարվելն է ճիշտ, քանի որ էլի կմնանք փողոցում, ոչ էլ չհրաժարվելը` ո՞նց ապրենք բա»,-հավելեց իր խոսքը Ա.Եվանգուլյանը:
Ինչպես ավելի վաղ տեղեկացրել էինք, նույն շենքում բնակարան է ստացել նաև մանկատան շրջանավարտ Կարեն Միրզոյանը, ով քսան տարուց ավելի ապրում էր Նոր Նորքի բակերից մեկում, թիթեղյա տնակում: Եվ սա այն դեպքում, որ հաշմանդամ է: Սակայն Կ.Միրզոյանը բնակարանամուտի հենց օրը վերադարձել է Երևան, քանի որ իր բնակարանում մահճակալ չի եղել....
Կառավարությունից հավաստիացնում են, որ նույն ծրագրի շրջանակում առաջիկայում Մարալիկում շահագործման է հանձնվելու ևս երկու նմանատիպ շենք, մեկն էլ Երևանում. «Պետությունը, ձևավորելով սոցիալական բնակարանային ֆոնդ, կարիքավոր ընտանիքներին կկարողանա ապահովել բնակարաններով»,- Մարալիկում հայտարարել էր վարչապետը:
Ինչ խոսք ողջունելի է, բայց և ցանկալի, որ Աշխատանքի և սոցիալական հարցերի նախարարությունը, որն էլ զբաղվում է բնակարանային բախշմամբ, գոնե մանրակրկիտ ուսումնասիրի, ասել է թե` իսկապես ծանոթանա այն ընտանիքների հետ, որոնք պետության աջակցությունն են ակնկալում, որոնք կարիքավոր են ու ըստ այդմ նոր բախշի բնակարանները, ապահովելով դրանց ճիշտ հասցեականությունը: Ու որ չստացվի, թե այս նախաձեռնությունը արվում է, կրկնվենք, զուտ անելու ու որոշների բերանը փակելու համար:
Նախորդիվ` Նախարարություն. 1991թ-ից թիթեղյա տնակում ապրող 41-ամյա Կարենը բնակարան կստանա
Թիթեղյա տնակում 20 տարի անցկացրած Կարենը վերջապես կունենա իր բնակարանը
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
