Ձեր վստահելի աղբյուրը

 Հայաստանի հանրային հեռուստաընկերության «Հ1» հեռուստաալիքի եթերում գովազդային սահմանված ժամանակի խատման դեպքերի նվազման միտում է նկատվում: Այս մասին այսօրվա ասուլիսի ժամանակ հայտնեց ժուռնալիստների «Ասպարեզ» ակումբի ղեկավար Լևոն Բարսեղյանը` ներկայացնելով հունվարի 1-ից իրականացվող Հանրայնի եթերի մոնիթորինգի արդյունքները: Ըստ բանախոսի` մոնիթորինգն իրականացվել է Հայաստանի Գյումրի քաղաքում. վայրկյանի ճշտությամբ ուսումանսիրվել են բոլոր գովազդները և գովազդային բլոկներն ըստ տևողությունների, ինչպես նաև վերծանվել է բոլոր հաղորդումներում գովազդի ծավալներն ու տեղաբշխումը:

«Նախապես կարելի է նաև որպես դրական երևույթ արձանագրել այն, որ եթե 2011 թվականին «Հ1»-ը հեռարձակվում էր շուրջօրյա միայն Երևանում և հարակից մարզերում, ապա 2012 թվականի սկբից օրական 24 ժամ հեռուստաալիքի հաղորդումները շուրջօրյա հեռարձակվել են նաև Շիրակի և Լոռու մարզում, մյուս մարզերից տեղեկություններ չունենք», - ասաց նա:

Անդրադառնալով բուն ամփոփմանը` Լ.Բարսեղյանը հիշեցրեց, որ 1996 թվականից «Գովազդի մասին» ՀՀ օրենքով արգելված էր մինչև 20 րոպե տևողությամբ հեռուստահաղորդումներում մեկ անգամից ավելի գովազդային ընդհատումը, իսկ եթերային 1 ժամի ընթացքում այն չպետք է գերազանցի 10 րոպեն:

«2011 թվականի մայիս – հունիս ամսիներին սահմանված այս նորմը խախտվել է 109 ժամերի դեպքում: Միայն հունիսին այն խախտվել է 74 անգամ»,- տեղեկացրեց նա:

Ըստ ակումբի ղեկավարի` «Գովազդի մասին» ՀՀ օրենքի` 2011 թվականի մայիսի 26-ին ընդունված փոփոխության`  եթերային 1 ժամի ընթացքում գովազդի չափը սահմանափակվեց  14 րոպեով:

«Տվյալ փոփոխությունից հետո 2012 թվականի մայիս – հունիս ամիսներին այս սահմանափակման խախտումների դեպքերի նվազում է արձանագրվել: 2012 թվականի հաղորդումների դիտարկումները ցույց են տվել, որ արդեն փոփոխված նորմը չի խախտվել ոչ մի անգամ, իսկ հունիսին գրանցվել է միայն 15 խախտում», - հայտնեց նա:

Խոսելով Հանրային հեռուստատեսության եթերում հաղորդումների ընդհանուր ծավալում գովազդի ծավալի 7%-ը չգերազանցելու խախտումների մասին`  Լ.Բաղդասարյանը նշեց, որ միայն 2011 թվականի մայիսի 27 մոնիթորինգային օրերի ընթացքում օրական կտրվածքով նշյալ նորմը խախտվել է գրեթե բոլոր դեպքերում, իսկ 2012 թվականին նույն ամսում նորմի խախտումներ չեն արձանագրվել:

«Ամբողջությամբ դիտարկված 22 օրերին գովազդային հաղորդումներն օրական հաշվարկով եղել են օրենքով սահմանված առավելագույն 7 տոկոսի սահմաններում և կազմել են 4,14% և 6,51% միջակայքում», - հայտնեց բանախոսը: Իսկ հունիսին, ըստ դիտարկման, 26 օրերի ընթացքում խախտումներ արձանագրվել են միայն 8 օրերի դեպքում:
 
«Այդ օրերին գովազդի ծավալը կազմել է  7,13% և 8,73%-ը, կամ 112-1498 վայրկյան` 1,8-ից 28 րոպե»,  - նշեց նա: Մնացած մյուս բոլորն օրերին գովազդային հաղորդումներն օրական հաշվարկով եղել են օրենքով սահմանված առավելագույն 7 տոկոսի սահմաններում և կազմել են 5,25% և 7,00% միջակայքում:

Անդրադառնալով մինչև 20 րոպե տևողությամբ հեռուստահաղորդումների` 1-ից ավելի անգամ գովազդով չընդմիջելու նորմի խախտումներին, Լ.Բարսեղյանը հայտնեց, որ 16 հաղորդումների ցուցակում արձանագրվել է 22 խախտում: