Ձեր վստահելի աղբյուրը

Ֆրանսիական Ստրասբուրգում այսօր բացվել է «Աշխարհն առանց նացիզմի» միջազգային իրավապաշտպան շարժման գլխավոր վեհաժողովը: Ինչպես Ստրասբուրգից փոխանցում են panorama.am-ի գործընկերները, վեհաժողովին մասնակցելու է աշխարհի 24 երկրներից շուրջ 153 պատվիրակ և հրավիրված հյուրեր:

Բացման արարողութանը ընթերցվել են Ֆրանսիայի նախագահ Ֆրանսուա Օլանդի, ՌԴ նախագահ Վլադիմիր Պուտինի, Ուկրիանայի նախագահ Վիկտոր Յանուկովիչի, Եվրախորհրդարանի նախագահ Մարթին Շուլցի և այլ քաղաքական ու հասարակական ականավոր գործիչների ողջույնի խոսքերը:

Վեհաժողովի ծրագրում ընդգրկված են եվրոպական երկրներում նեոնացիզմի և աջ արմատականության հարցերի շուրջ քննարկումներ, «Եվրոպական երկրներում աջ արմատականության և նեոնացիստական տրամադրութունների մոնիթորինգ» ծրագրի շնորհանդեսն, ինչպես նաև շարժման ծրագրի հաստատումը:

Վեհաժողովի աշխատանքներին մասնակցում են նաև Հայաստանի ներկայացուցչները, մասնավորապես «Այլատյացության կանխարգելման նախաձեռնություն» կազմակերպության ղեկավար Արմինե Ադիբեկյանը, լրագրող Մարինա Գրիգորյանը, ինչպես նաև Լեռնային Ղարաբաղի Հանրապետության ներկայացուցիչ Ռուբեն Զարգարյանը:

Իրավապաշտպան շարժման կոնֆերանսի մասնակիցներին տրամադրված ծրագրի մեկնաբանություններում նեոնացիստական և արմատական ու ազգայնական տրամադրությունների աճի վերաբերյալ տեղեկանք կա նաև Հարավային Կովկասի երկրների մասով:

Վրաստանի վերաբերյալ հատվածում խոսք է գնում այդ երկրում ազգային փոքրամասնությունների իրավունքների ոտնահարման, ինչպես նաև էթնիկ բնույթի խտրականության փաստերի մասին: Հիշատակվում է Ջավախքից հայ իրավապաշտպան Վահագն Չախալյանի գործը:

Ադրբեջանի վերաբերյալ հատվածում խոսք է գնում ադրբեջանական լրատվամիջոցներում, ինչպես նաև այդ երկրի արտաքին և ներքին քաղաքականությունում առկա հակահայկական տրամադրությունների մասին: Որպես օրինակ է նշվում Ադրբեջանի նախագահ Իլհամ Ալիևի հայտարարությունն այն մասին, թե «Ադրբեջանի թիվ մեկ թշնամի է հանդիսանում աշխարհի հայությունը»: Խոսք է գնում նաև Ադրբեջան հայկական ազգանունով անձնանց մուտք գործելու արգելքի մասին, որն, ինչպես հեղինակներն են նշում, «ինքնին ադրբեջանական հասարակության մեջ անառողջ մթնոլորտի վկայությունն է»:

Ծրագրի մեկնաբանություններում տեղ են գտել նաև Ռամիլ Սաֆարովի հետ կապված վերջին զարգացումները:
Ինչ վերաբերում է Հայաստանին, ապա այստեղ հղում է տրված ԱՄՆ պետքարտուղարության ամենամյա զեկույցին, որտեղ նշվում է, թե ՀՀ կառավարության կողմից էթնիկ փոքրամասնությունների նկատմամաբ սահմանափակումներ հիմնականում չեն կիրառվում: Նշվում է, թե առանձին դեպքերում նկատվում են «փոքրամասնությունների միձուլման միտումներ, որոնք հինականում դրսևորվում են կրթական համակարգում»:

Միաժամանակ, հեղինակները պնդում են, թե «Հայաստանի իշխանությունները աջակցություն են ցուցաբերում ազգային փոքրամասնությունների մշակութային կենտրոններին»:

Օրինակներ են նշված առանձին պաշտոնյաների կողմից արված հակասեմիտական արտահայտությունների վերաբերյալ, սակայն նշվում է, թե «այդ գործողությունները պատասխանն են եղել 2004 թ-ին Երուսաղեմում հայ համայնքի ներկայացուցիչների նկատմամբ նմանօրինակ գործողությունների»:
Կոնֆերանսը տևելու է երկու օր:

Նշենք, «Աշխարհն առանց նացիզմի» միջազգային իրավապաշտպան շարժմումը ստեղծվել է 2010 թ-ի հուլիսի 22-ին Կիևում: Շարժման առաջին կոնֆերանսին մասնակցել են աշխարհի 30 երկրներից շուրջ 360 պատվիրակներ ու 136 կազմակերպությունների ներկայացուցիչներ: