Ձեր վստահելի աղբյուրը

Սրտի վիրահատությունների գներն առաջիկայում կնվազեն, սա առողջապահության նախարար Դերենիկ Դումանյանի կանխատեսումն է` բայց հիմնված ոչ թե իր որոշման, այլ ընդամենը հիվանդանոցների թվի աճի վրա:

«Ճիշտ է, ժամանակին միայն Նորք-Մարաշում էր սրտի վիրահատություն իրականացվում, հիմա արդեն կան Էրեբունի բժշկական կենտրոնը, Համալսարանականը, 3-րդ հիվանդանոցը, «Քանկոր»-ը,Գյումրու նորաբաց հիվանդանոցը և շուտով կբացվի նաև Գորիսի սրտաբանական կենտրոնը: Այսինքն, սրտի վիրահատություններ իրականացնող բուժկենտրոնների ցանցն ընդլայնվում է, և այստեղ վերանում է մենաշնորհային տարբերակը: Փաստորեն վաղը-մյուս օրը կլինի վիրահատությունների գների իջեցում, որակի մրցակցություն, առաջընթաց կլինի»,-Panorama.am-ի հետ զրույցում պարզաբանեց առողջապահության նախարարը:

Համարվում է, որ Հայաստանը տարածաշրջանում սրտի վիրահատությունների իրականացման առումով առաջատարն է: Չնայած այս հանգամանքին, սրտի իրահատության համար հերթեր են գոյանում մեծ մասամբ «Էրեբունի» և «Նորք –Մարաշ» բժշկական կենտրոններում: Պատճառը ոչ միայն դրանց` սարքավորումներով հագեցած լինելն է, այլ այն, որ նշված կենտրոնները վաղուց իրենց հարկի տակ են հավաքել լավագույն սրտաբաներին: Սրտի վիրահատության իրականացման համար պետպատվերն իջեցվում է հիմնականում այս հիվանդանոցներին:

Հարցին, թե որքանով են պետպատվերից օգտվում իրական հասցեատերերը, իրականում որքանով է պաշտոնավարման 100 օրը բոլորած նախարարը վերահսկելի պահում այս ոլորտը, որպեսզի մյուս ոլորտների օրինակով կոռուպցիոն ռիսկերից զերծ պահի, Դերենիկ Դումանյանն այսպես արձագանքեց. «Ինձ համար վերահսկելի են այդ արտոնություներից օգտվողների համար ներկայացվող փաստաթղթերը, հուսով եմ, սոցապի օրինակը չի կրկնվի»:

Մեզ հասած այն տեղեկությունների առնչությամբ, թե նախկին նախարարներից մեկը

սիրտը վիրահատել է պետպատվերի շրջանակում, Դումանյանը նկատեց, թե պաշտոնատար անձիք հիմա օգտվում են սոցփաթեթներից, իսկ բժշկական ծառայությունների համար վճարում են ապահովագրական ընկերությունները:

Նախարարի ներկայացրած տվյալներով, տարեկան սրտի վիրահատություն պետպատվերով իրականացվում է ընդամենը 700 հոգու համար` այդ թվում նաև մինչև 7 տարեկան երեխաների: Դա, ինչպես ցույց է տալիս վիճակագրությունը, շատ փոքր թիվ է մեր ազգաբնակչության համար: Նշված դեպքերում պետական միջոցների հաշվին փոխատուցվում է 100 տոկոսով, բայց կա նախատեսված լրացուցիչ գումար, որ սոցիալական որոշ խմբերի համար փոխհատուցվում է վիրահատության գնի մի մասը միայն, ասենք` 2 մլն- դեպքում ընդամենը 360000 դրամը»:

Նախարարը հույս ունի, որ առաջիկա տարիների համար կառավարության ծրագրով նախատեսված սրտի սուր վիրահատություննեիը անցկացման համար էականորեն կավելացվի պետպատվերով իրականացվող վիրահատությունների քանակը: Ինչ վերաբերվում է վերջին տարիներին սրտի վիրահատությունների գների սրընթաց աճին, նախարարը պնդում է, որ դրա համար կան իրական հիմքեր:

Բարձրաստիճան պաշտոնյան չի կիսում այն տեսակետը, որ 4000 -10.000 դոլարի հասնող վիրահատության գները անտրամաբանական են ու դրանք թելադրվում են ընդամենը ոլորտի մենաշնորհ ունեցող անձանց կողմից:
«Սրտի վիրահատության գներն իսկապես լուրջ հարց են և նախարարության ուշադրության կենտրոնում են: Մենք պարտավոր ենք սահմանել գներ, որ ինքնարժեքից ցածր չլինի և այնպիսի վերին շեմ դնենք, որ տեղավորվի ողջամտության սահմաններում»,-նկատեց նա:

Հետաքրքրվեցինք, որո՞նք են սրտի վիրահատության համար սահմանված նվազագույն և առավելագույն գները: Նախարարն ասաց, այս պահին չի հիշում, սակայն սահմանված են:«Մենք 1-2 ամիս առաջ հաստատել ենք կողմնորշիչ գներ: Գները հիմնականում պայմանավորված են մի շարք գործոններով, սրտի վիրահատության ժամանակ օգտագործվում են ստենդներ, ըստ դրանց որակի էլ որոշվում են վիրահատության գները»,-ասաց Դումանյանը:Հարկավոր է վերանայել այս հաշվարկները, քանի որ իրապես աշխատող բժիշկների խումբը պիտի վճարվի բարձր` իր աշխատանքի դիմաց, այլ ոչ թե դրանով անհարկի տարածքի պահպանման կամ այլ ծախսեր հոգա:

Նախարարը հերքեց այն տեղեկությունը, թե վերոհիշյալ երկու հիվանդանոցներում առավոտից իրիկուն վիրահատություն իրականացնող բարձրակարգ բժիշկներին 2- ից 4 միլիոնանոց վիրահատություններ անելու դիմաց վարձատրում են ընդամենը 60.000 դրամ, ինչի պատճառով էլ կա լավագույն մասնագետների արտահոսք:
«Ինչ վերաբերում է այն բանին, թե նրանք ստանում են 40-60 հազար դրամ, այդպիսի բան գոյություն չունի, ես կարող եմ դա Ձեզ վստահեցնել»,-ասաց նախարարը:

Նա նշեց, որ նախարարության մի հրաման կա, համաձայն որի վիրահատությունների այդ 50 տոկոսներն ուղղվում են ընդհանուր աշխատավարձի ֆոնդ:
Հարկավոր է վերանայել այս հաշվարկները, քանի որ իրապես բժիշկը պիտի վճարվի բարձր` իր աշխատանքի դիմաց, այլ ոչ թե դրանով անհարկի տարածքի պահպանման կամ այլ ծախսեր հոգա»: