Ձեր վստահելի աղբյուրը

Տիկնիկային թատրոնում «Parada» ֆիլմի ցուցադրումը քարոզչական նպատակ էր հետապնդումը, ինչը հասկացավ նաև թատրոնի գեղարվեստական ղեկավար Ռուբեն Բաբայանն ու հրաժարվեց թույլ տալ իր թատրոնում նման ֆիլմի ցուցադրումը: Ասուլիսում այս մասին ասաց բլոգեր Տիգրան Քոչարյանը:

Ըստ նրա, նման ֆիլմի ցուցադրումը հենց մշակութային կենտրոնում երկու նպատակ էր հետապնդում` կամ արհեստածին խնդիրներ առաջացնել հասարակության շրջանում, կամ հրահրել սադրանք:

Հիշեցնենք, որ օրերս Երևանում Գերմանիայի դեսպանության և ԵՄ ներկայացուցչության կողմից նախատեսվել էր անցկացնել կինոդիտումների շարք, որի ընթացքում պետք է ցուցադրվեր համասեռամոլության քարոզ պարունակող սերբական հայտնի «Parada» ֆիլմը: Այն պետք է ցուցադրվեր Տիկնիկայի թատրոնում, ինչն էլ առաջացրել էր շատերի վրդովմունքը: «Հայազն» միության կողմից հոկտեմբերի 8-ին կազմակերպվել էր բողոքի ակցիա Գերմանիայի դեսպանատան առաջ: Ակցիան արդյունք է տվել ու ֆիլմը չի ցուցադրվել մշակութային օջախում, այլ՝ ԵՄ երևանյան գրասենյակում: Սերբական ֆիլմն արծարծում է Սերբիայում միասեռականների խնդիրը:

«Ես թույլ չեմ տալու, որ Հայոց ցեղասպանության թանգարնում լինի Աթաթուրքի գրքերի ցուցադրություն, պետական թատրոններում` համասեռամոլության քարոզ, կամ եկեղեցում աղանդավորական ինչ-որ հավաքներ: Դրանք սուրբ վայրեր են»,- ասաց բլոգերը:

Երաժիշտ Արտավազդ Բայաթյանն էլ նշեց, որ վտանգավոր հարցերի շուրջ հասարակությունը պետք է լինի ակտիվ, ու, ըստ նրա, լավ կլիներ, օրենսդիր մարմինն էլ դրան ուշադրություն դարձնի:

Տ. Քոչարյանն էլ նույն կարծիքին էր, որ պետք է պետական մակարդակով նման խնդիրները լուծվեն, ստեղծվեն հանձնաժողովներ:

«Հասարակության ճաշակը փչացնող ամեն բան կարող է անօրինական լինել` երաժշտություն, նման անշնորք ֆիլմերը»,- ասաց Ա. Բայաթյանը, միաժամանակ նշելով, որ փորձում են նման միջոցներով նաև շեղել հասարակության ուշադրությունը լուրջ խնդիրներից:

«Հայազն» միության վարչության անդամ Արմեն Մկրտչյանն ասաց, որ այս ֆիլմը ցուցադրվել է եվրոպական 15 երկրում, որից 12-ում` մանկական օջախներում: Այս ցուցանիշը, ըստ նրա, ցույց է տալիս, որ այն քարոզչական նպատակներ է հետապնդում: Վրաստանում, Ադրբեջանում նույնպես ձախողվել է այս ֆիլմի ցուցադրումը: Ա. Մկրտչյանը նշեց, որ ֆիլմը պատմում է, թե ինչպես է 2001 թվականին Սերբիայում գեյ-շքերթի փորձը տապալվել. կազմակերպիչների վրա հարձակվել են շքերթի անչափահաս մասնակիցների ծնողները, թե ինչու են դպրոցից հանել իրենց երեխաներին ու բերել շքերթի: Եղել են տուժածներ: Ա. Մկրտչյանն ասաց, որ փորձում են սրանով ցույց տալ, որ տասը տարի հանդուրժողության է քարոզվել, ու տասը տարի անց համասեռամոլները կարող են հանգիստ դպրոցների ներսում հանդիպումներ անել, շքերքներ կազմակերպել: «Հայաստանում այդ ֆիլմը ցույց տալու գլխավոր մեսիջն այն էր` խելոք մնացեք. տասը տարի հետո ձեր մոտ էլ ինչ ուզենք, անելու ենք»,- ընդգծեց նա:

Նախորդող նորություններ՝  Հայազն միություն. Չենք դադարեցնելու մեր պայքարը պղծությունների քարոզի դեմ

Բողոքի ակցիա.«Միասեռականների մասին «Parada» ֆիլմի ցուցադրումը մանկական մշակութային օջախում մանկապղծության է նման»