Ձեր վստահելի աղբյուրը

Այսօր Կենտրոն և Նորք Մարաշ վարչական շրջանների ընդհանուր իրավասության դատարանի որոշմամբ, Սերոբ Բոզոյանը, որը սոցիալապես անապահով է, խնամում է իր 9-ամյա հիվանդ որդուն, դատապարտվեց 1 տարի ազատազրկման: Նա մեղադրվում էր այն բանի համար, որ մայիսի 4-ին իր տանը թողարկել, ապա իրացրել է սպառողների կյանքի և առողջության անվտանգության պահանջներին չհամապատասխանող ապրանքներ, այս դեպքում` փուչիկներ: Դրանք պատվիրել և գնել էր Հանրապետական կուսակցությունը: Մայիսի 4-ին նախընտրական քարոզարշավի ժամանակ փուչիկների պայթյունի հետևանքով 228 մարդկանց անզգուշությամբ պատճառվել են տարբեր աստիճանի մարմնական վնասվածքներ:

Սերոբ Բոզոյանի վերաբերյալ կայացված վճռի և կատարվածի նկատմամբ կուսակցության պատասխանատվության մասին մի քանի հարց ուղղեցինք ՀՀԿ երիտթևի ղեկավար, ԱԺ պատգամավոր Կարեն Ավագյանին:

-Պարոն Ավագյան, քիչ առաջ հայտնի դարձավ, որ Սերոբ Բոզոյանը դատապարտվել է 1 տարի ազատազրկման, ինչպե՞ս եք ընդունում այդ փաստը:

-Բայց…դատարանի վճիռ է, և այն մեկնաբանելու խնդիր ես չեմ տեսնում: Նույն բանն ա, ոնց որ ցանկացած մեկին հարցնեք` ո՞նց եք այդ փաստին նայում: 

-Այսինքն, դուք կապ չե՞ք գտնում Ձեր և Սերոբ Բոզոյանի միջև՞:

Որևէ կապ: Ես բազմիցս այդ մասին ասել եմ: Որևէ խնդիր ես չեմ տեսնում, չնայած նրան, որ շատ են շահարկում, շատ մարդիկ ուզում են, որ այդ կապը լինի: Ամեն դեպքում (ծիծաղում է –հեղ.) ձեզ հավաստիացնում եմ, որ որևէ կապ չունեմ: Ես որպես կազմակերպիչ այստեղ հանդես չեմ եկել և բազմիցս դրա մասին ես խոսել եմ:

-Հանրապետական կուսակցությունը չի պատվիրե՞լ փուչիկները:

-Հանրապետական կուսակցության համապատասխան կազմակերպչական մասն է պատվիրել, ոչ թե ես եմ պատվիրել, դրանք տարբեր բաներ են:

-Կազմակերպչական մասի պատասխանատուն դուք չե՞ք:

-Ոչ:

-Լավ այդ դեպքում Հանրապետական կուսակցության պատասխանատվության հարց չի՞ առաջանում:

-Չեմ հասկանում ձեր հարցը էն տեսանկյունից, եթե մարդը ինքը հասկացել է և ամբողջությամբ ընդունել իր մեղքը ու եթե երևույթի հետ կապված կա վճիռ, ինչի մասին ա խոսքը, ես չեմ կարողանում հասկանալ, եթե մարդը ինքը իր մեղքը ընդունել է: Այդ դեպքում ցանկացած նման խնդիրների շուրջ մենք կարող ենք այս խոսակցությունը տեղափոխել բարոյահոգեբանական դաշտ և փորձել այնտեղ փնտրել ճշմարտությունը: Բայց այդպես չի չէ՞: Սերոբ Բոզոյանի վճռի` արժանի կամ անարժանի, հետ կապված անիմաստ է խոսել: Մենք պետք է ձեռնպահ մնանք մեկնաբանություններից ու որակումներից, երբ կա դատարանի վճիռ: Մենք չէ, որ պետք է որոշենք` ով է անմեղ, ով է մեղավոր կամ ով` ոնց պետք է պատժվի: Դրա համար կան համապատասխան մարմիններ, որոնք զբաղվում են նմանատիպ խնդիրներով և խնդրում եմ Ձեզ դուք էլ նմանատիպ երևույթները լուսաբանելու ժամանակ մի փոքր ավելի զգուշավոր լինեք, որովհետև կոնկրետ այս դեպքում, մեծ թվով երիտասարդներ են վնասվածքներ ստացել և ամեն անգամ, երբ շահարկվում է այս թեման, իրենք հաստատ իրենց լավ չեն զգում: 

-Այսօր նիստի ժամանակ պաշտպանը հայտարարել է, որ Սերոբ Բոզոյանը պատվիրատուներին զգուշացրել է մեթանով փուչիկների վտանգավորության մասին: Ի՞նչ կասեք այդ մասին:

-Ես նման բան չգիտեմ:

-Չգիտե՞ք, թե՞ չի եղել նման զգուշացում:

-Եթե լիներ, վստահ եմ կուսակցությունը հաշվի կառներ այդ փաստը: Հնարավոր չէ զգուշացված լիներ:

Նախորդող հրապարակումներ. «Փուչիկների գործ». Սերոբ Բոզոյանը դատապարտվեց 1 տարի ազատազրկման
Փուչիկների պայթյունի գործով գլխավոր դատախազը միջնորդագիր է ներկայացրել վարչապետին ու քաղաքապետին