«Փուչիկների գործ»-ով ամբաստանյալը քաղցկեղով հիվանդ է. Փաստաբանը խնդրում է պայմանական պատիժ կիրառել

Իրավունք 11:45 17/10/2012

Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվող փուչիկների գործով դատավարության ժամանակ ամբաստանյալ Սերոբ Բոզոյանի պաշտպան Կարեն Մանուչարյանը ներկայացրեց պաշտպանական ճառը և միջնորդեց դատարանին պայմանական պատիժ կիրառել:

Բացի այդ, այսօր առաջին անգամ հայտարարվեց, որ Սերոբ Բոզոյանը քաղցկեղով հիվանդ է: Մանուչարյանն ասաց, որ մինչ այժմ այդ մասին չէր հայտարարվում, որովհետև ամբաստանյալը չէր ցանկանում, քանի որ կարծում էր, թե այսքան մարդ տուժել է և այս դեպքում կարևոր չէ նրա առողջությունը:

Այժմ դատավոր Գագիկ Պողոսյանը խորհրդակցական սենյակում է:

Նախորդ դատական նիստում, որը տեղի էր ունեցել հոկտեմբերի 11-ին մեղադրող դատախազ Հակոբ Մարտիրոսյանն ներկայացրել էր մեղադրական ճառը և դատարանին միջնորդել մեկ տարվա ազատազրկման դատապարտել Սերոբ Բոզոյանին:

Հիշեցնենք, որ Երևանի Հանրապետության հրապարակում մայիսի 4-ի նախընտրական զանգվածային միջոցառման ընթացքում գազալիցքավորված փուչիկների պայթյունի հետևանքով այրվածքներ էին ստացել և տարբեր բուժհաստատություններ տեղափոխվել 154 անձինք:

Փաստի առիթով հարուցվել էր քրեական գործ ՀՀ քրեական օրենսգրքի 240-րդ հոդվածի 1-ին մասի հատկանիշներով` դյուրավառ կամ այրիչ նյութերի պահպանման, հաշվառման, փոխադրման, առաքման կամ օգտագործման կանոնները խախտելը, ինչպես նաև նշված նյութերի ապօրինի փոխադրումը կամ առաքումը, եթե դրանք անզգուշությամբ առաջացրել են ծանր հետևանքներ:

Փուչիկները լիցքավորած անձին` Սերոբ Բոզոյանին մեղադրանք է առաջադրվել ՀՀ քրեական օրենսգրքի 279-րդ հոդվածի երկրորդ մասով՝ անվտանգության պահանջներին չհամապատասխանող ապրանքներ թողարկելը կամ իրացնելը, ինչն անզգուշությամբ վնաս է պատճառել երկու կամ ավելի անձանց առողջությանը:

Փուչիկները Սերոբ Բոզոյանից պատվիրել էր Հանրապետական կուսակցությունը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: