Ձեր վստահելի աղբյուրը

Հայ Օգնության ֆոնդի կողմից Հայաստանում իրականացվող կրթական մի քանի ծրագրերից 200-ից ավելի ուսանող է օգտվում: Ծրագրերը մի քանիսն են` «Մաթևոսյան կրթավճար», «Ժիրայր Նիշանյան կրթավճար», «Էսթեր Աճեմյան կրթավճար», «Գուլամիրյան կրթավճար»: Վերջինը բացառապես մանկատների երեխաների համար է նախատեսված:

ՀՕՖ-ի կրթական ծրագրերի համակարգող Էդուարդ Կարապետյանը Panorama.am-ի թղթակցի հետ զրույցում ներկայացնելով տարբեր անուններով կրթավճարների բաշխման քաղաքականությունը, ասաց, որ դրանք ուղղված են բացառապես սոցիալապես անապահով շերտի երեխաների կրթական ծախսերը հոգալուն:

Վերևում նշված տարբեր անուններով կրթավճարների մասին տեղեկություն-հայտարարությունները քննությունների ժամանակ փակցվում են բուհերի պատերին, իսկ դիմողները անթիվ անհամար են լինում: Սակայն նրանցից ընտրվում են քչերը: Կարապետյանն ասում է, որ ՀՕՖ-ի հատուկ հանձնաժողովի անդամները չեն զլանում, այցելում են մրցույթի մասնակցած, այսինքն` ուսման վարձ ստանալու համար դիմում գրած երեխաների տներ, ստուգում` ինչպես են ապրում մարդիկ, արժե՞ ուսման վարձը փոխանցել, թե՞ ոչ: 

ՀՕՖ-ի տարբեր կրթաթոշակներն օգնում են միայն ԵՊՀ-ի, Խ. Աբովյանի անվան մանկավարժական համալսարանի հայ լրագրության ֆակուլտետի, Գավառի պետական համալսարանի, Երևանի ճարտարապետության և շինարարության պետական համալսարանի (ԵՃՇՊՀ), Հայաստանի պետական ճարտարագիտական համալսարան, Հայաստանի պետական տնտեսագիտական համալսարանի, Հայաստանի պետական ագրարային համալսարանի ուսանողներին:

Այլ բուհերի ուսանողների համար ՀՕՖ-ը իր կրթաթոշակների շրջանակներում գումարներ չի տրամադրում կամ տրամադրում է, երբ տվյալ ընտանիքը խիստ կարիքի մեջ է ու երեխան մեծ ցանկություն ունի ուսում ստանալու:

Panorama.am-ին խիստ հավաստի աղբյուրից հայտնի է դարձել, որ Սլավոնական համալսարանի ուսանողներից  1992 թ. ծնված Մ-ի  (ուսանողի անուն ազգանունը կրճատվել է  panorama.am-ի խմբագրի միջնորդությամբ, ընթերցողի ուշադրությունը բուն խնդրի վրա սևեռված թողնելու նպատակով) ուսման վարձը վճարելու համար Հայ Օգնության ֆոնդից սոցիալական աջակցություն ստանալու համար միջնորդել է Աշխատանքի և սոցիալական հարցերի նախարարությունը: Մեզ հետ զրույցում դա հաստատեց նաև ՀՕՖ-ի ներկայացուցիչ Էդուարդ Կարապետյանը: «Հիմա ես չեմ կարող ասել, թե դիմումի հետ կապված ինչ է որոշվել, բայց սոցապնախարարությունը մեզ նամակ է գրել, որ երեխայի ուսման վարձը վճարելու համար գումար փոխանցվի», -նշեց Կարապետյանը:

Հարցին, թե դիմումի մեջ հիմնավորում են, որ երեխան սոցիալապես անապահո՞վ է, Կարապետյանը պատասխանեց. «Այո, նշված է, որ սոցիալապես անապահով են»:

Մեզ չէր հետաքրքրի այս մասնավոր դեպքը, եթե այն չառնչվեր Աշխատանքի և սոցիալական ապահովության նախարարության բարձրաստիճան պաշտոնյայի հետ: 

Բանն այն է, որ ուսանողուհին, որի մասին նշվել է սոցապ նախարարության միջնորդագիր-նամակում, 1985-1990 թվականների սոցիալական ապահովության նախկին նախարար, ՀՀ աշխատանքի և սոցիալական հետազոտությունների ազգային ինստիտուտի նախկին տնօրեն և այժմ սոցապ նախարարի խորհրդական Նարինե Բալայանի թոռնուհին է: Նրանք ապրում են Երևանի հենց կենտրոնում (Պուշկին փողոց), ապրում են բավականին ապահով ու շատ գեղեցիկ կահավորված բնակարանում և բնականաբար, սոցիալական անապահովության խնդիր չեն կարող ունենալ:

Ի դեպ, պարոն Կարապետյանը շատ վրդովվեց, երբ սկսեցինք հետաքրքրվել այդ մասնավոր դիմումի մասին. «Դուք, բավականին վատ դեր եք խաղում, այսինքն, դուք 290 ուսանողի կրթավճարով հետաքրքրված չեք…ես ձեր այցի նպատակը հենց նոր հասկացա, ձեր դեմքը բացահայտվեց: Դուք շատ վատ լրագրող եք»: Նա մեղադրեց մեզ, որ մենք չենք հետաքրքրվում մյուս ուսանողներով ու նրանց սոցիալական վիճակով և չենք նկատում «ՀՕՖ-ի բարի գործերը»:

Պարոն Կարապետյանից հետաքրքրվեցինք նաև` Հայ օգնության ֆոնդում, որտեղ մեծ գումարներ են շրջանառվում այս կամ այն ծրագրի ու բարեգործության համար, «ատկատներ» չկա՞ն: «Բացառվում է, նման բան բացառվում է», -պատասխանեց ՀՕՖ-ի ներկայացուցիչը: