Ձեր վստահելի աղբյուրը

Օրերս Panorama.am-ը մի հրապարակմամբ էր հանդես եկել, որտեղ նշվում էր, թե ինչպես է, որ ՀՀ Աշխատանքի և սոցիալական ապահովության նախարարությունը իրեն թույլ տալիս իր բարձրաստիճան պաշտոնյաների հարազատ-բարեկամների համար գումարներ հայթայթել: Որպես օրինակ ներկայացրել էինք մեր ունեցած հավաստի տեղեկությունը, որ սոցապ նախարարությունը գրավոր նամակով միջնորդել է Հայ օգնության ֆոնդին ֆինանսավորել նախարարի խորհրդական Նարինե Բալայանի թոռնուհու ուսման վարձը: Այն, որ այդպիսի նամակ ստացել է ՀՕՖ-ը հաստատել էր նաև Panorama.am-ի զրուցակից ՀՕՖ-ի կրթական ծրագրերի համակարգող Էդուարդ Կարապետյանը: 

Հոդվածի վերաբերյալ ՀՕՖ-ը հերքում պահանջող տեքստ է ուղարկել մեր էլեկտրոնային հասցեին, նշելով. «Սույնով տեղեկացնում ենք, որ Սլավոնական համալսարանի ուսանողուհի Մարգարիտա Աբելյանի (1992 թ. ծնված) ուսման վարձը վճարելու որևէ որոշում ՀՕՖ-ի կողմից չի կայացվել։ Ավելին, տվյալ դիմումը համապատասխան ուսումնասիրություն անցնելուց հետո մերժվել է»։

Այնինչ, երբ այս հարցով panorama.am-ի թղթակիցը դիմել էր պարոն Կարապետյանին, նա պատասխանել էր. «Հիմա ես չեմ կարող ասել, թե դիմումի հետ կապված ինչ է որոշվել, բայց սոցապնախարարությունը մեզ նամակ է գրել, որ երեխայի ուսման վարձը վճարելու համար գումար փոխանցվի»: 

Ավելին, պարոն Կարապետյանին առաջարկեցինք ժամանակ հատկացնել և հստակ պատասխանել` ի՞նչ որոշում է կայացվել, բայց նա, չկարևորելով, անտեսեց դա: Մենք էլ ենք հասկանում, որ կարևոր չէ, որովհետև այս պարագայում, մեզ համար կարևորը այն փաստն էր, որ ՀՀ աշխատանքի և սոցիալական ապահովության նախարարությունը ՀՕՖ-ին միջնորդել է իր պաշտոնյայի բարեկամի ուսման վարձը վճարելու համար: 

Այժմ հասնենք ՀՕՖ-ին. Երբ լրագրողը հարցադրում է անում, նա ակնկալում է պատասխան, ընդ որում` հստակ` ստացե՞լ եք` ԱՅՈ-ՈՉ, կամ` մերժե՞լ եք` ԱՅՈ-ՈՉ: Հարցադրմանը պատասխանալու փոխարեն ՀՕՖ ներկայացուցիչը համոզմունք է հայտնում, թե ինքը գիտե, թե ինչու է այդ հարցը իրեն տրված: Ինչևէ. Քանի որ, նամակի հետ կապված, ՈՉ պատասխանը հարցադրման ժամանակ չի հնչել, այստեղից երկու եզրակացություն` կամ ՀՕՖ-ը չի աշխատում թափանցիկ-հրապարակային ու զլանում է ներկայացնել ոչ միայն նիստերի արձանագրություններ, այլև հստակ պատասխաններ, կամ մենք իրավունք ունենք ենթադրել, որ սոցապնախարարության դիմումը մերժվել է հենց մեր հոդվածի հրապարակումից հետո:

Ինչ վերաբերում է հոդվածի ներքո տեղ գտած մեկնաբանություններում ՀՕՖ-ականների դիտարկումներին, թե մենք չենք լուսաբանում բարեգործություն իրականցնող կազմակերպության ծրագրերը և դրա փոխարեն խոսում մեկ մասնավոր դիմումի մասին, ապա տեղեկացնենք, որ մենք խնդիր չէինք դրել մեր առջև լուսաբանել կազմակերպության գործունեությունը: Նշեմ ավելին, մենք հոդվածում ՀՕՖ-ի գործունեությունն արատավորող որևէ տեղեկություն չենք հրապարակել, հակառակը` հրապարակման սկզբում հստակ մատնանշել էինք, թե Հայաստանում հասարակական կյանքի տարբեր ոլորտներում բարեգործություն իրականացնող Հայ Օգնության ֆոնդը ինչ կրթական ծրագրեր ունի և հատկապես որ բուհերի ուսանողների կրթավճարն է ֆինանսավորում:

Առնվազն տարօրինակ է, որ ՀՕՖ-ն է անմիջապես արձագանքել հրապարակմանը և հերքում է պահանջում այն դեպքում, երբ դա կարող էր ու պետք է աներ (կամ` չկարողանար անել) Աշխատանքի և սոցիալական ապահովության նախարարությունը:

Տվյալ նյութում հանրությանն է ներկայացվել պետական մարմնի, այս դեպքում` Աշխատանքի և սոցիալական հարցերի նախարարության աշխատելաոճը, երբ իրենց բարձրաստիճան պաշտոնյայի այս կամ այն կարիքի դեպքում դիմում են բարեգործական կազմակերպությանը` գումարներ ստանալու համար:

Ինչ վերաբերում է հոդվածում «ատկատ» բառի հիշատակմանը, ապա լրագրողը, իր մասնագիտական գործունեության համատեքստում ԿԱՐՈՂ է, ՊԱՐՏԱՎՈՐ է ցանկացած տիպի հարցադրումներ անել և ստանալ դրանց պատասխանը: Չենք կարող հասկանալ դժգոհությունը, երբ և հարցը, և դրա պատասխանը տրվել է նյութում. «Պարոն Կարապետյանից հետաքրքրվեցինք նաև` Հայ օգնության ֆոնդում, որտեղ մեծ գումարներ են շրջանառվում այս կամ այն ծրագրի ու բարեգործության համար, «ատկատներ» չկա՞ն: «Բացառվում է, նման բան բացառվում է», -պատասխանեց ՀՕՖ-ի ներկայացուցիչը»:

Հ. Գ. Կից ներկայացնում ենք ՀՕՖ-ից ուղարկված նամակը և Էդուարդ Կարապետյանի հետ մեր հարցազրույցի ձայնագրությունը:

«Panorama.am-ի թղթակցի հետ ՀՕՖ-ի Կրթական և գիտական ծրագրերի համակարգող Էդուարդ Կարապետյանի նախօրեին ունեցած զրույցի արդյունքում նշված լրատվամիջոցի պաշտոնական կայքէջում հրապարակվել է մի հոդված, որի առնչությամբ հարկ ենք համարում նշել հետևյալը։ Հոդվածում նշվում է «ՀՀ սոցիալական ապահովության նախկին նախարար, ՀՀ աշխատանքի և սոցիալական հետազոտությունների ազգային ինստիտուտի նախկին տնօրեն և այժմ սոցապ նախարարի խորհրդական Նարինե Բալայանի թոռնուհու» անունը (որը ժամեր անց վերանայված տարբերակում ներկայացվել է կրճատ ձևով)՝ որպես մի անձի, ում համար ֆինանսական աջակցության ակնկալիքով միջնորդագիր էր ուղարկվել ՀՕՖ-ի գրասենյակ։ ՀՕՖ-ում սոցիալական աջակցության բազմաթիվ նամակներ են ստացվում և միայն մանրակրկիտ ուսումնասիրության արդյունքում է դրանց տրվում համապատասխան լուծում։ Սույնով տեղեկացնում ենք, որ Սլավոնական համալսարանի ուսանողուհի Մարգարիտա Աբելյանի (1992 թ. ծնված) ուսման վարձը վճարելու որևէ որոշում ՀՕՖ-ի կողմից չի կայացվել։ Ավելին, տվյալ դիմումը համապատասխան ուսումնասիրություն անցնելուց հետո մերժվել է։ ՀՕՖ-ի աշխատակցի խոսքերը հոդվածում օգտագործվել են կոնտեքստից դուրս, ինչի հետևանքով խեղաթյուրվել է իրականությունը։ Փաստերի ոչ ճիշտ ներկայացումը, ինչպես նաև հոդվածում ՀՕՖ-ի լոգոտիպի տեղադրումը, քննվող հարցի շուրջ հստակ տվյալների բացակայության և հոդվածագրի կողմից գործի թերի ուսումնասիրության պարագայում հանգեցրել են լրագրողական նորմերի խախտման։ Հոդվածը տպավորություն է ստեղծում, թե Հայ օգնության ֆոնդը զբաղվում է պետական պաշտոնյաների ընտանիքների կրթությունը ֆինանսավորելով, ինչը, մեղմ ասած, չի համապատասխանում իրականությանը։ Ի լրումն ասվածին՝ նշենք, որ Հայ օգնության ֆոնդի գործունեությունը լուսաբանելու համատեքստում «ատկատ» բառի օգտագործումը անհարիր և վիրավորական ենք համարում։ Ակնհայտ է նաև, որ Հայաստանի անապահով խավերին ուղղված ՀՕՖ-ի հսկայածավալ աջակցությունը որպես չակերտավոր «բարի գործեր» ներկայացնելը ասվածին ծաղրական երանգ է հաղորդում, ինչի իրավունք վերապահված չէ որևէ մեկին, առավել ևս հոդվածագրին, որը ի սկզբանե հացազրույց խնդրելով ՀՕՖ-ի կրթական ծրագրերի թեմայով, արդյունքում հրապարակել է բոլորովին այլ բովանդակությամբ նյութ՝ առանց խնդիրը հավուր պատշաճի ուսումնասիրելու։ Սույն հերքման հրապարակմամբ Panorama.am-ի խմբագրությունը հիշյալ հոդվածը ընդունում է որպես թյուրիմացության արդյունք, որը ՀՕՖ-ի և Panorama.am-ի միջև հետագա համագործակցության լավագույն երաշխիքն է։ ՀՕՖ-ը պատրաստակամ է իր կրթական ծրագրերում ընդգրկված ցանկացած ուսանողի գործի մանրազնին ուսումնասիրություն իրականացնել ցանկացած լրատվամիջոցի աշխատակիցների հետ միասին՝ նրանց իսկ նախաձեռնած լրագրողական քննության շրջանակներում։ ՀՕՖ-ի հաղորդակցության և տեղեկատվության բաժին»: