Ձեր վստահելի աղբյուրը

«Bloomberg» պարբերականն անդրադարձել է Միացյալ Նահանգների նախագահի թեկնածուներ` գործող նախագահ, դեմոկրատ Բարաք Օբամայի և նրա հանրապետական մրցակից Միթ Ռոմնիի նախընտրական պայքարին ու նշել, որ 2012թ.-ի նախագահական ընտրություններում յուրաքանչյուր ձայնի համար մղվող պայքարում նոր ճակատամարտ է բացվել, և դա պատերազմն է սոցիալական ցանցերում, որը մեկ բառով նշվում է որպես «hashtagwar»:

Պարբերականի փոխանցմամբ՝ չորս տարի առաջ, երբ Ֆեյսբուքը (Facebook) դեռևս այդքան տարածված չէր, ինչպես այսօր, և մինչ սմարթֆոնները կդառնային համատարած, Բ. Օբաման առաջինն էր, որ սոցիալական ցանցերն օգտագործեց նախագահական ընտրություններում: Այսօր, երբ համացանցը դարձել է մարդկանց կյանքի անբաժանելի մաս, Բ. Օբամայի ընտրարշավը կրկին օգտագործում է համացանցի ընձեռած հնարավորթյունները՝ հաղորդակցվելու հանրության հետ այնպիսի հարթակներում, որ անհնար էր անել 2008թ.-ին:

Պարբերականը նշում է, որ վերջին հաշվով, հասկանալու համար, թե ինչ ազդեցություն կունենան ընտրությունների ելքի վրա Օբամայի 31,1 միլիոն ֆեյսբուքյան «լայքերը»` ընդդեմ Մ. Ռոմնիի 10.2 միլիոն «լայքերի», իրականում հնարավոր կլինի գնահատել ընտրություններից հետո, երբ պարզ կլինի` ով է հաղթել:

«Սոցհարցումները ցույց են տալիս, որ ընտրողները սոցիալական ցանցերում թեկնածուների ակտիվ ներգրավվածություն են ակնկալում: Համացանցում Օբամայի ընտրարշավի ակտիվությամբ կազմակերպվում են դրամահավաքներ, հավաքագրվում են կամավորներ: Նրանք իրականացնում են առցանց բանավեճերի մոնիտորինգ, հավաքում տեղեկատվություն, թե որ մեկնաբանություններն ու հաղորդագրություններն են մեծ արձագանք գտնում և ինչու: Դա երկարաժամկետ ռազմավարություն է, որն ունի տարբեր կողմեր՝ հասցեագրված ամենատարբեր սոցիալական խմբերին:

Իսկ Թվիթերը (Twitter), օրինակ, ավելի շատ հնարավորություն է տալիս ձևավորել քաղաքական ընկերակցություն, քան պայքարել տատանվող ընտրողների ձայների համար: Թվիթերով ձևավորվում են պատկերացումներ, ամենօրյա ռեժիմով իրականացվում է տեղեկատվության ապահովում, և այդ ամենի ազդեցությունը տեսանելի էր նախագահի թեկնածուների միջև Դենվերում կայացած առաջին բանավեճի ժամանակ: Օբամայի թիմը պարտվեց թվիթերյան պատերազմում 30 րոպեի ընթացքում, և դա կարծիք ձևավորեց, թե Օբաման արդեն պարտվել է ընտրություններում»:

Աղբյուրը նշում է նաև, որ Օբամայի թիմը ջանքեր գործադրեց՝ հետագա բանավեճերում Թվիթերի հարթակը չզիջելու ուղղությամբ: Բ. Օբամայի և Մ. Ռոմնիի միջև Նյու Յորքում տեղի ունեցած վերջին շաբաթվա բանավեճի մասին Թվիթերում 7.2 միլիոն գրառումներ են արվել: Բարաք Օբամայի էջից 90 րոպեի ընթացքում ուղարկվել են 37 հաղորդագրություններ, որոնք այլ օգտատերերի կողմից տարածվել են 117,374 անգամ՝ ի տարբերություն Ռոմնիի թվիթերյան էջի, որից ուղարկվել է 2 հաղորդագրություն, որն էլ իր հերթին տարածվել է 6.810 անգամ:

«Մարդիկ լողում են քաղաքական տեղակատվության ու քաղաքական բամբասանքների ծովում: Համակարգը ընդլայնվել է, քանի որ այսօր սոցիալական ցանցերը կենտրոնական տեղ են զբաղեցնում նախընտրական քարոզչության ժամանակ և միջոց են ընտրությունների մասին խոսելու համար»,- պարբերականի հետ զրույցում ասել է «Pew Internet & American Life Project» ընկերության տնօրեն Լի Ռեյնին:

Շարունակելով թեման՝ պարբերականը նշում է, որ Ռոմնիի թիմի անդամների համոզմամբ իրենց հակառակորդները հենվում են «ունայն» չափանիշների վրա, և ֆեյսբուքյան «լայքերը», թվիթերյան հաղորդագրությունները ու դրանց տարածումը իրենցից «սպամ» են ներկայացնում: Այն դեպքում, երբ Օբաման կարող է ունենալ շատ ավելի ֆեյսբուքյան «լայքեր», Ռոմնին հենվում է իր կողմնակիցների ակտիվ ներգրավվածության տոկոսային հարաբերության վրա: Ակտիվ քննարկումներում նախագահի երկու թեկնածուների ֆեյսբուքյան էջերում հավասարապես մոտ 2.9 միլիոն մարդ է մասնակցել:

Ընտրարշավի վերջին շաբաթների ընթացքում, սոցցանցերում Ռոմնիի թիմի կողմից իրականացված գործունեության արդյունքում առցանց խմբերից մոբիլիզացվել են կամավորներ, և ընտրություններում ընտրողների մասնակցությունն ապահովելու ջանքեր են գործադրվել, որը գերազանցել է 2008թ. նախագահի թեկնածու Ջոն Մակքեյնի թիմի գրանցած արդյունքները: «Մեր «էլեկտրոնային թիմի» նպատակն է՝ լինել լավագույնը, որ իրականացնում է սեփական ընտրարշավի նպատակները, այլ ոչ թե համարվել ամենախելացի «էլեկտրոնային միավորը» երկրում»,- ասում է Ռոմնիի նախընտրական շտապի ներկայացուցիչը:

«Համաձայն «Pew Internet & American Life Project» տվյալների՝ սոցցանցերի օգտատերերի 36 տոկոսը գտնում են, որ շփումը սոցցանցերում շատ կարևոր է իրենց համար քաղաքական լրատվությանը հետևելու առումով: Չափահաս ամերիկացիների մոտ 60 տոկոսը այդ նպատակով օգտվում են Ֆեյսբուք կամ Թվիթեր կայքերից, իսկ նրանց 66 տոկոսը կամ բոլոր չափահաս ամերիկացիների 39 տոկոսը նվազագույնը մեկ անգամ ցուցաբերել են քաղաքացիական կամ քաղաքական ակտիվություն: 38 տոկոսը սոցցանցերում «լայքել» կամ տարածել է քաղաքական և սոցիալական խնդիրների վերաբերյալ այլոց կողմից տեղադրված նյութեր:

«Սոցիալական ցանցերը մեր զանգվածային կազմակերպության բնական շարունակությունն են, և դրանց ընձեռած տարբեր հարթակները բացառիկ հնարավորություն են տալիս տեղեկացնել ընտրողներին, համախմբել կողմնակիցներին և ավելի շատ մարդկանց ավելի խորը ներգրավել այս պատմական ընտրություններում», - ասում Բ. Օբամայի նախնտրական շտաբի խոսնակ Ադամ Ֆեթչերը:

Նրա խոսքով, «Օբամայի թիմը օգտագործում է Ֆեյսբուքը որպես մատչելի միջոց կողմակիցների հետ հաղորդակցվելու և նրանց համախմբելու համար: Ֆեյսբուքում հատկապես կանանց աջակցությունը շատ արդյունավետ է եղել: «Օբամայի կանայք» ֆեյսբուքյան էջը ունի 1.16 միլիոն անդամներ, իսկ «Միթի մայրիկները» էջը՝ 92.250-ը: Սոցցանցերի օգտագործումը նաև հնարավորթուններ է ստեղծում դրամահավաքության համար: Օգոստոս ամսվա ընթացքում Օբամայի ընտրարշավը ստացել 147 միլիոն ԱՄՆ դոլարի նվիարտվություն»,- գրում է «Bloomberg» պարբերականը: