Ձեր վստահելի աղբյուրը

Հարցազրույց «Բարգավաճ Հայաստան» խորհրդարանական խմբակցության քարտուղար Նաիրա Զոհրաբյանի հետ:

-Տիկին Զոհրաբյան, ինչո՞վ է պայմանավորված Գագիկ Ծառուկյանի Ազգային Ժողովի նիստերին չներկայանալը, արդյո՞ք դա ԲՀԿ առաջնորդի  բոյկոտն է` Վարդան Օսկանյանի գործի հետ կապված:
-Ոչ, բացարձակապես և ես չէի ցանկանա, որ մենք ցանկացած դեպքի հետևում փորձենք քաղաքական ենթատեքստ տեսնել: Կարող եմ ասել, որ զուտ նախապես ծրագրված աշխատանքային այցերի պատճառով է, որ պարոն Ծառուկյանը դեռևս չի եղել խորհրդարանում, ինչը չի նշանակում սակայն, որ նա չի էլ մասնակցելու Ազգային Ժողովի աշխատանքներին: Այնպես որ` վստահաբար կրկնում եմ` ԲՀԿ առաջնորդը կլինի խորհրդարանում:

Ինչ վերաբերում է Վ.Օսկանյանի գործին, ապա այս իմատով պարոն Ծառուկյանը իր միանշանակ դիրքորոշումը հայտարարության մեջ հայտնել է: Այո, նա գտնում է, որ գլխավոր դատախազի միջնորդությունը իրավական հիմնավորում չունի և հայտարարել է իր հայտարարության մեջ, որ կանգնած է իր կուսակցի կողքին: Իսկ այդ գործով զբաղվելու են համաշխարհային համբավ ունեցող իրավաբաններ, ինչն արվել է և այս պահին ևս արվում է:

-Նախագահական ընտրություններին հաշված ամիսներ են մնացել, դաշտը ապրում է կանխատեսումներով` ԲՀԿ-ն սեփական թեկնածուով հանդես կգա՞, թե՞ կսատարի ՀՀԿ թեկնածուին: Դրան զուգահեռ առանձին ԲՀԿ-ականներ` Վարդան Օսկանյանը, Վահե Հովհաննիսյանը և այլք չեն բացառում առաջին տարբերակը և նշում, որ հակված են, որպեսզի Ձեր կուսակցությունը իր թեկնածուով հանդես գա: Ի վերջո, ե՞րբ է կողմնորոշվելու կուսակցությունը:
-Ես հասկանում եմ այն հետաքրքրությունը, որ կա ԲՀԿ-ի որոշման հանդեպ, որովհետև այսօր հայաստանյան քաղաքական դաշտի ամենաառանցքային ու հիմնական դերակատարներից մեկը «Բարգավաճ Հայաստանն» է և գաղտնիք չէ, որ նախագահական ընտրությունների վերաբերյալ ԲՀԿ որոշումից մեծապես կախված է լինելու ներքաղաքական զարգացումների ընթացքը: Բայց կրկնում եմ, ԲՀԿ-ն, ինչպես և այդ մասին ասվել էր, ինքն է որոշելու , թե երբ է հրապարակելու իր որոշումը նախագահական ընտրությունների վերաբերյալ:

Ինչ վերաբերում է իմ գործընկերների մասնավոր տեսակետներին, ապա ոչ միայն Վ.Օսկանյանն ու Վ.Հովհաննիսյանը, այդ թվում նաև ես այն համոզմանն ենք, որ խորհրդարանական ընտրություններում վստահության նման քվե ստացած քաղաքական ուժը պետք է մասնակցի սեփական թեկնածուով: Ավելին, ես կարող եմ ասել, որ այդ թեկնածուն կոնկրետ իմ համար միայն Գագիկ Ծառուկյանն է:

-Այսօր արդեն կարելի է ասել, թե ե՞րբ կկայանա «Բարգավաճ Հայաստանի» համագումարը:
-Ոչ: Դեռևս ընդհանրապես չի քննարկվել կլինի արդյոք համագումար թե ոչ: Կրկնում եմ` նախագահական ընտրությունների վերաբերյալ խնդիրները մենք կքննարկենք առաջիկայում և երբ կուսակցությունը որոշի պահը հրապարակելու իր դիրքորոշումը այդպես էլ կարվի:

-Վերջին շրջանում Վ.Օսկանյանի facebook-յան էջը հասարակության ուշադրության կենտրոնում է, քանի որ դա գրեթե միակ հարթակն է, որում պատգամավորը հանդես է գալիս ոչ այնքան իր անձին վերաբերող, այլ քաղաքական հայտարարություններով: Անձամբ Ձեր դիտարկմամբ արդյո՞ք Վ.Օսկանյանի հայտարարությունները քարոզչական միտում չեն պարունակում:
-Կարծում եմ` ոչ: Բաից այդ, դա իր միակ հարթակը չէ, Վ.Օսկանյանը ԱԺ պատգամավոր է և ցանկացած պահի նա ազատ է օգտագործելու ԱԺ ամբիոնը: Իսկ ինչ վերաբերում է պարոն Օսկանյանի facebook-յան հայտարարություններին, ապա ես անկեղծ ասած այնտեղ որևէ հստակ նախընտրական քարոզչության էլեմենտներ չեմ տեսնում: Դա իր դիրքորոշումն է, մենք ազատ լիբերալ կուսակցություն ենք և յուրաքանչյուր պատգամավոր ազատ է ունենալու իր մասնավոր տեսակետը` մինչ այն պահը, երբ կլինի կուսակցության քաղաքական որոշումը, որն արդեն պարտադիր է մեզ բոլորիս համար:

-Տիկին Զոհրաբյան, իբրև «Բարգավաճ Հայաստան» կուսակցության նախագահի թեկնածու, կարծես թե, միակ դիտարկվող ֆիգուրը միշտ եղել է Գագիկ Ծառուկյանը, բայց վերադառնալով թե վերջին զարգացումներին, թե նույն facebook-ին ու Օսկանյանի կուսակցությունից փոքր-քիչ առանձնացած լինելու հանգամանքին տեղ-տեղ կարելի է լսել նաև նրա` Ծառուկյանին այլընտրանք լինելու մասին: Տեսնո՞ւմ եք նման տարբերակ:

-Ես արդեն պատասխանեցի` նախագահական ընտրությունների վերաբերյալ երբ ԲՀԿ-ն որոշի պահը հրապարակելու իր որոշումը, այդ ժամանակ էլ կհրապարակի: