Ձեր վստահելի աղբյուրը

Մեքսիկական Radio Formula-ն այս օրերին օպերատիվ լուսաբանում է Մեխիկոյում Հեյդար Ալիևի հուշարձանի բացման թեման: Հերթական անդրադարձում ռադիոյի թղթակիցը զրուցել է Մեխիկո քաղաքի վարչակազմի կողմից արձանի տեղադրման նպատակահարմարությունն ուսումնասիրող հանձնաժողովի անդամ, միջազգայնագետ Գաբրիել Գուրա Կաստելյանոսի հետ:

Լրատվամիջոցը նախ տեղեկացնում է, որ պարոն Կաստելյանոսը հանձնաժողովի նիստում արձանագրել է, որ «տվյալ խնդիրը մեծ արձագանքի և տարակարծությունների տեղիք է տվել ինչպես ԶԼՄ-ներում, այնպես էլ սոցիալական ցանցերում»: Այնուհետև պատասխանելով ռադիոկայանի «Atando Cabos» իմֆորմացիոն ծրագրի հարցերին, նա նշել է, որ իրեն թվում է, որ այս խնդիրը չափազանց էական է, քանի որ հիշատակված հուշարձանի տեղադրումից բացի, այն ներառում է մի այնպիսի բաղադրատարր, որից մասին հասարակությունն ավելի քիչ տեղյակ է, բայց որը նույնպես արժանի է ուշադրության: Խոսքը «Տլակսակոակե» այգում մեկ այլ հուշարձանի տեղադրումն է, որը վերաբերվում է ենթադրյալ ցեղասպանության:

«Այս թեման առավելապես առնչվում է պատմության մեկնաբանմանը և «ցեղասպանություն» բառի գործածությանը, որն իմ կարծիքով` ծայրահեղ թեթևությամբ է կիրառվում ոչ միայն այս, այլ նաև շատ այլ դեպքերում, ինչն արժեզրկում է ցեղասպանության մասին քննարկումների արժեքը»,- նշել է Գաբրիել Գուրան Կաստելյանոսը:

Նրա խոսքով, խումբը, որի կազմի մեջ բացի իրենից, ընդգրկված են նաև լրագրող Գիլերմո Օսորնոն և արվեստագետ Հերարդո Էստրադան, կարտահայտեն իրենց տեսակետն ու դիրքորշումն առ այն, թե ինչ է իրականում տեղի ունեցել, և ինչ պետք է արվի, որպեսզի հանգուցալուծվի ներկա իրադրությունը, կամ էլ` վերջ դրվի տվյալ հուշարձանների տեղադրման հետևանքով առաջ եկած բողոքներին և բանավեճերին:

Գաբրիել Գուրա Կաստելյանոսը նշել է, որ ուսումնասիրությունները դեռևս ընթացքի մեջ են և արդյունքների մասին նա «չէր ցանական խոսել, մինչև այն ժամանակ, երբ իրավիճակն ամբողջովին կուսումանսիրվի»:

Ռադիկոյանի հետ զրույցում անդրադառնալով Ալիևներ հոր և որդու գործունեությանն ու Ադրբեջանի պատմության վերաբերյալ հարցին` միջազգայնագետը նշել է, որ հայտնի է այն, որ «նրանք ժողովրդավարության ականավոր գործիչներ չեն»: «Նաև գիտեմ, որ տիրանների համաշխարհային դասակարգման մեջ երկու ղեկավարները գտնվում են միջին հորիզոնականներում»,- ասել է Գաբրիել Գուրա Կաստելյանոսը: