Ձեր վստահելի աղբյուրը

Հոկտեմբերի 29-ին Չեխիայի Հանրապետության Սենատի նախագահ Միլան Շտեխի հրավերով ՀՀ ԱԺ նախագահ Հովիկ Աբրահամյանը եռօրյա պաշտոնական այցով ժամանել է Պրահա:

ԱԺ հասարակայնության հետ կապերի վարչությունից տեղեկացնում են, որ Կարլովիվարյան երկրամասում ԱԺ նախագահը հանդիպել է Կարլովի Վարիի քաղաքապետ Պետր Կուլհանեկի և նահանգապետ Յոզեֆ Նովոտնիի հետ: Հանդիպումների ընթացքում քննարկվել են երկկողմ կապերի զարգացմանը և միջտարածաշրջանային համագործակցությանը վերաբերող մի շարք հարցեր: 

Կարլովի Վարիի քաղաքապետի հետ հանդիպման ընթացքում պարոն Աբրահամյանը առաջարկել է գործընկերային հարաբերություններ հաստատել Ջերմուկ և Կարլովի Վարի քաղաքների միջև կամ քույր քաղաքներ հռչակել, քանի որ երկու առողջարանային քաղաքներն էլ հայտնի են իրենց բուժիչ հանքային ջրերով և ունեն որոշ ընդհանրություններ: Խորհրդարանի ղեկավարը քաղաքապետին առաջարկել է այցելել Հայաստան և, մասնավորապես, Ջերմուկ քաղաք` մոտիկից ծանոթանալու և փոխգործակցության ոլորտները նախանշելու համար: Աղբյուրի հաղորդմամբ, քաղաքապետ Կուլհանեկը Հովիկ Աբրահամյանի առաջարկը սիրով է ընդունել` այն համարելով փայլուն գաղափար և շեշտել է, որ համագործակցությունը երկու քաղաքների միջև կխթանի զբոսաշրջությունը և երկու ժողովուրդներին ավելի մոտիկից ծանոթանալու ևս մի հնարավորություն կընձեռի:

Նահանգապետ Յոզեֆ Նովոտնիի հետ աշխատանքային ճաշի ժամանակ կողմերը կարևորել են տարածաշրջանների միջև համագործակցությունը, որպես երկու երկրների հարաբերությունների էլ ավելի զարգացմանն ու ամրապնդմանն ուղղված կարևոր գործոն: Պարոն Աբրահամյանը նահանգապետին նույնպես առաջարկել է այցելել Հայաստան և մարզերից մեկի` մասնավորապես Վայոց Ձորի մարզի հետ համագործակցություն ծավալել: Նահանգապետը ոգևորությամբ ընդունել է ԱԺ նախագահի առաջարկը և նշել, որ Կարլովի Վարիի քաղաքապետի հետ անպայման կայցելեն Հայաստան և հույս հայտնեց, որ փոխգործակցությունը արդյունավետ և երկուստեք օգտակար կլինի:

Կարլովի Վարիում ԱԺ նախագահի գլխավորած պատվիրակությունը այցելել է համաշխարհային ճանաչում ունեցող «Մոսեր» հախճապակյա արտադրանքների ընկերություն, ինչպես նաև Յան Բեքեր թանգարան ու Յան Բեքեր-Կարլովսկա Բեքերովկա արտադրության սրահ:

Հոկտեմբերի 30-ին նախատեսված են ՀՀ ԱԺ նախագահ Հովիկ Աբրահամյանի հանդիպումները Չեխիայի Հանրապետության Սենատի նախագահ Միլան Շտեխի, Չեխիա-Հայաստան միջխորհրդարանական բարեկամության խմբի նախագահ Ռոբին Բոնիչի հետ, ինչպես նաև հայ համայնքի ներկայացուցիչների հետ:

ԱԺ նախագահի գլխավորած պաշտոնական պատվիրակության կազմում են ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը, ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանը, պատգամավորներ Կարինե Աճեմյանը և Արթուր Գևորգյանը: