Ձեր վստահելի աղբյուրը

«Քրեական դատավարության մասին» օրենսգրքի փոփոխությունների նախագիծը մշակող աշխատանքային խումբը ստացել է ՀՀ նախագահի աշխատակազմի վերլուծությունը` նվիրված է քրեական գործերով իրականցվող քննության վիճակին: Այսօր լրագրողների հետ հանդիպմանն այս մասին հայտնեց աշխատանքային խմբի ղեկավար Հրայր Ղուկասյանը:

Փաստաթուղթը աշխատանքային խմբի կողմից ուսումնասիրվել է, եկել են եզրակացության, որ «վերլուծությունը հիմնված է զուտ պրակտիկ նյութերի ամփոփման վրա, համակողմանի և համալիր հետազոտության արդյունք է, ունի ընդգծված հակակոռուպցիոն բնույթ»:

«Նյութը լուրջ հետազոտելու անհրաժեշտություն կա: Դրա արդյունքում արդեն եղած նյութերը կհամադրենք առաջարկվող փոփոխությունների հետ, ինչի արդյունքում, կարծում եմ, կառաջանան առաջարկված լուծումների վերանայման ու վերաիմաստավորման հարցեր»,-ասաց Հ. Ղուկասյանը` մանրամասնելով, որ քննարկման անհրաժեշտություն կունենա նախաքննության ընթացքում դատախազ-քննիչ-քննչական բաժնի պետ եռակողմ հարաբերությունների հարցը: Սա բազմիցս քննարկվել է, կան վիճահարույց հարցեր: Ըստ նրա, նախագահի աշխատակազմի կողմից ստացված վերլուծության մեջ առկա վիճակագրական տվյալները կօգնեն նորովի լուծումներ գտնել:

Հիշեցնենք, որ նախօրեին ՀՀ նախագահ Սերժ Սարգսյանը արդարադատության նախարարին հանձնարարվել է  լրամշակել Հայաստանի Հանրապետության քրեական դատավարության օրենսգրքի նախագիծը` հաշվի առնելով խորհրդակցության ընթացքում կոնկրետ գործերի օրինակներով վերհանված գործնական հիմնախնդիրները, ինչպես նաև վերջերս Մարդու իրավունքների եվրոպական դատարանի կայացրած վճիռներում արտահայտված իրավական դիրքորոշումները:

Իսկ մինչ այս վերլուծության մասին խոսելը, Հ. Ղուկասյանն ասաց, որ 1999 թվականից գործող «Քրեական դատավարության մասին» օրենքսգրքի փոփոխությունների մեկնարկը տրվել է մոտ երկու տարի առաջ:

Փոփոխությունները, ըստ բանախոսի, պայմանավորված են սոցիալական, իրավական, տնտեսական նախադրյալներով:

«Այդ նախադրյալներից են դեռևս 2005-ին Սահմանդրության մեջ կատարված փոփոխությունները, Հայաստանի կողմից վրոպական կոնվենցիայի վավերացնելը, դատական պրակտիկայի բազմազանությունն ու նոր պրակտիկայի ձևավորումը, Եվրոդատարանի, Սահմանդրական դատարանի, Վճռաբեկ դատարանի նախադեպային որոշումները և այլն»,-մանրամասնեց նա:
Հ. Ղուկասյանի գնահատմամբ, նախագիծը նոր է իր գաղափարախոսությամբ, նորովի է փորձելու լուծել այն խնդիրները, որոնք առկա են իրավակիրառ պրակտիկայում:

«Այդ խնդիրները համալիր ու համակողմանի լուծելու փորձ է կատարվել»,-ասաց բանախոսն ու մատնանշեց նոր նախագծի գլխավոր նպատակներից մի քանիսը`
1. Իրականացնել հանրային ու մասնավոր շահերի յնարավորինս հավասարաչափ ու հավասարակշռված պաշտպանություն
2. Քրեական արդարադատության ոլորտում ոլորտում ուժեղացնել դատարանի դերի ու ազդեցության ուժեղացում, ստեղծել դատարանակենտրոն քրեադատավարական համակարգ
3. Ամրապնդել ոլորտ ներգրաված անձանց պաշտպանությունը, նախատեսել լրացուցիչ մեխանիզմներ, որոնք հնարավորություն կտան առավել արդյունավետ իրացնել անձի մի շարք հիմնարար իրավունքներ` մասնավորապես անմեղության կանխավարկած, անկախ դատաքննության և այլն
4. Քրեական գործը քնությունը վարող պաշտոնատար անձանց` դատախազ, քննչի, դատարան, կարգավիճակին վերաբերող հարցերի կարգավորում, նրանց լիազորությունների տարանջատում, հստակեցում և այլն:

Աշխատանքային խմբի ղեկավարի խոսքով, մինչ փոփոխություններին ձեռնամուխ լինելը ուսումնասիրություններ են իրականացրել:

Ըստ Հրայր Ղուկասյանի, փաստաթղթի բովանդակությունից հետևում է նաև, որ քննչական պրակտիկայում օրենսդրությամբ նախատեսված անհրաժեշտ զսպիչների և հակակշիռների մեխանիզմները կամ չեն գործում կամ դրանք կրում են խիստ ձևական բնույթ:

«Իր հերթին դա բացասաբար է ազդում կատարվող նախաքննության համակողմանիության և անաչառության վրա»,- նշեց Ղուկասյանը:

Հիշեցնենք, որ 2012 թվականի հոկտեմբերին ՀՀ արդարադատության նախարարությունը ՀՀ ազգային ժողով է ներկայացրել ՀՀ քրեական դատավարության նոր օրենսգրքի նախագիծը:
Նախորդող հրապարակում`

Ե՞րբ պետք է կալանավորել մարդուն և ինչքա՞ն կարող է ձգվել կալանքի ժամկետը. Մասնագետի դիտարկումները