Ձեր վստահելի աղբյուրը

«Հանրապետության նախագահի հետ ունեցել եմ զրույց` կոռուպցիայի դեմ պայքարն ուժեղացնելու վերաբերյալ: Այն իրավիճակը, որ կոռուպցիայի ոլորտում ստեղծվել է Հայաստանում` մեզ չի բավարարում»,- մինչ ՀՀ կառավարության նիստը սկսելը այս մասին այսօր հայտարարեց վարչապետ Տիգրան Սարգսյանը:

«Հանրապետության նախագահը պահանջում է վճռական գործողություններ, այդ թվում` վիրահատական մեթոդների կիրառում, որպեսզի կարողանանք այնպիսի փոփոխություններ կատարել, որոնք լինեն շոշափելի և տեսանելի»,- ասաց Տ.Սարգսյանը` հավելելով, որ վաղը հրավիրելու է կոռուպցիայի դեմ պայքարի խորհրդի նիստ:

Նրա խոսքերով` որպեսզի այստեղ հաջողություններ ունենան, կարծում է, որ անհրաժեշտ է էապես ուժեղացնել համագործակցությունը քաղաքացիական հասարակության հետ:

Տ.Սարգսյանը գերատեսչությունների ղեկավարներին խնդրեց առաջարկություններ ներկայացնել կառավարության աշխատակազմի ղեկավարին` այն մասով, թե որ ՀԿ-ների հետ են իրենք ակտիվ համագործակցում այս բնագավառում, որպեսզի նրանց նույնպես դարձնեն մասնակից այս քննարկումներին:

«Կարծում եմ, որ ճիշտ կլինի հրավիրել նաև ընդդիմադիր կուսակցություններին, որպեսզի նրանք մեզ հետ համագործակցեն և ներգրավված լինեն այս աշխատանքերում»,- նշեց Տ.Սարգսյանը: