Ձեր վստահելի աղբյուրը

Նախօրեին գիշերը Լեռնային Ղարաբաղի Քարվաճառի շրջանում տեղի ունեցած խոշոր վթարի հետևանքով վիրավորված զինծառայողներից ոչ մեկի կյանքին վտանգ չի սպառնում: Այս մասին Կենտրոնական զինվորական հոսպիտալում տեղի ունեցած ճեպազրույցում նշեց հոսպիտալի նեյրովիրաբուժական բաժանմունքի պետ, բուծժառայության մայոր Արման Հակոբյանը:

Հիշեցնենք, որ նոյեմբերի 1-ին, ժամը 21.59-ին Վարդենիս–Քարվաճառ ավտոճանապարհի 25-րդ կմ-ին ՀՀ զինված ուժերին պատկանող բեռնատար ավտոմեքենան դուրս է եկել երթևեկելի մասից և գլորվել ձորը: Ավտովթարի հետևանքով 4 չինծառայող մահացել է, 15-ը վիրավորվել:

Բժիշը նշեց, որ Վարդենիսի հոսպիտալից Կենտրոնական զինվորական հոսպիտալ են տեղափոխվել ավտովթարի հետևանքով տուծաժ բոլոր զինծառայողները` 15 հոգի: Նրա խոսքով, տեղափոխումը տեղի է ունեցել երեք փուլով, սկսվել է երեկվանից և շարունակվել մինչև այս պահը:

«Հիվանդների մոտ առկա է տարբեր աստիճանի մարմնական վնասվածքներ, տարբեր պաթոլոգիաներ: Գրեթե բոլորի մոտ առկա է գանգուղեղային տրավմա, սակայն կյանքին սպառնացող վտանգ որևէ հիվանդի մոտ չկա»,- նշեց Ա. Հակոբյանը:

Ըստ նրա, հիվանդներից ամենածանրը Արթուր Եղիազարյանի վիճակն է գնահատվում: Վերջինիս մոտ, ըստ բժշկի, առկա է կրծքային 6-րդ ողի սուր կոտրվածք: Ա. Հակոբյանը նշեց, որ կատարվել է շտապ վիրահատություն և նորագույն տեխնոլոգիաների միջոցով կատարվել է վնասված ողի վերականգնում:

Բժիշկը փաստեց, որ տեղափոխված հիվանդներից միայն հինգն են գտնվում վերակենդանացման բաժանմունքում, իսկ մնացածների վիճակը  միջին ծանրության է գտնվում: Նրանք գտնվում են  տարբեր բաժանմունքներում: Բժիշը նշեց, որ դեռևս վաղ է խոսել հիվանդների առողջության հետագա վերականգնման վերաբերյալ` փաստելով, որ հիվանդները հոսպիտալում կմնան մեկ շաբաթից մինչև մեկ ամիս:

ԼՂՀ ՊԲ-ից հայտնեցին, որ դեպքի վերաբերյալ հարուցվել է քրեական գործ: Նախնական վարկածով, պայմանագրային զինծառայողներ տեղափոխող «Ուրալ» մակնիշի մեքենայի դիմացից մեքենան է դուրս եկել և լույսը գցել վարորդի աչքերին: Իր հերթին, «Ուրալի» վարորդը ցանկացել է ավելի լայն շրջանցում կատարել, սակայն հողը փախել է մեքենայի տակից և մեքենան գլորվել է ձորը: ԼՂՀ ՊԲ-ից նշեցին, որ այն հենակետը, որտեղ զինծառայողները հերթափոխ են կատարել, գտնվում է 2800-3500 մմ բարձրության վրա: