Ձեր վստահելի աղբյուրը

Հովանավորական խարդախ գործարք է իրականացվել ՔԴՄ-ի բադեն-վյուրթթեմբերգյան երկրամասային կազմակերպությունում: Ադրբեջանը համաֆինանսավորում է ՔԴՄ երիտասարդական կազմակերպության երկրամասային համագումարը: Այս մասին գրում է գերմանական մամուլը:

 Սինսհայմ - Երբ Բադեն-Վյուրթթեմբերգի երկրամասային ՔԴՄ-ի երիտասարդական կազմակերպության 11500 անդամներն օրերս ծանոթացան նոյեմբերի 10-ին կայանալիք երկրամասային համագումարին մասնակցելու հրավերի տեքստին, ոմանք քիչ չզարմացան: Քանի որ երկրամասային կազմակերպության ղեկավար Նիկոլաս Լյոբելը շուրջ 300 պատվիրակներին և 200 հյուրերին քառագույն ծանուցաթերթիկով հրավիրում էր Բուլդեսլիգայի TSG 1899 Հոֆֆենհայմ ֆուտբոլային ակումբի Հռենոս-Նեքար մարզադաշտ:
Ֆուտբոլային օպերայի անմիջապես կողքին շողշողում էր Ադրբեջանի ուսանողական ցանցի խորհրդանշանը, որի «սիրալիր աջակցությամբ» կարող է տեղի ունենալ երկրամասային համագումարը: Ոմանք մտածում էին, թե ճիշտ չեն կարդացել. ուսանողական ինչ-որ կազմակերպություն կուսակցական համագումարի գլխավոր հովանավո՞ր: Մարդու իրավունքների պաշտպանության և ժողովրդավարական սկզբունքների հարցում հենց վաստակ չունեցող Ադրբեջանի՞ց: Այստեղ ինչ-որ մեկն իրեն վատ կատա՞կ է թույլ տվել անել:

Պատվո հյուպատոս Օթթո Հաուզերն անակնկալի է եկել

Ավելի շուտ՝ ոչ: Ինչպես ցույց տվեց Շտուտգարթեր Ցայթունգի (Stuttgarter Zeitung) անցկացրած հետաքննությունը, 1990-ական թվականների սկզբից նախագահ Իլհամ Ալիևի կլանի կողմից ինքնակալորեն կառավարվող նախկին խորհրդային հանրապետության ուսանողական ցանցը ՔԴՄ երիտասարդական կազմակերպության երկրամասային համագումարի առնվազն ֆինանսավորողներից մեկն է: Այդ ինչպե՞ս: Երիտասարդական կազմակերպության անդամներից մի քանիսը ենթադրում են, որ այդ գործարքի հեղինակը Բունդեսթագի նախկին ՔԴՄ պատգամավոր Օթթո Հաուզերն է Էսսլինգենից, ով Հելմութ Քոհլի կանցլերության ամենավերջին շրջանում կարճ ժամանակով եղել է կառավարության խոսնակը: 2010 թվականի ապրիլի 20-ից Հաուզերը Շտուտգարթում հանդիսանում է Ադրբեջանի պատվո հյուպատոսը:
Կասպից ծովի և Կովկասյան լեռների միջև ընկած, նավթի և գազի պաշարներով հարուստ երկրի բոլոր մանրամասներին սովորաբար տեղյակ Հաուզերը Շտուտգարթեր ցայթունգի կողմից ներկայացված գործի էության առնչությամբ ձևացնում է, թե «միանգամայն անակնկալի է եկել»: «Ես այդ մասին ոչինչ չգիտեի», ասում է Հաուզերը: Բայց նա այդ ամբողջ գործընթացում ոչ մի վատ բան չի էլ տեսնում: «Եթե ուսանողական ցանցը հանդես է գալիս որպես երիտասարդական կազմակերպության հովանավոր և այնտեղ ստենդ է դնում և գովազդում իրեն, ապա դա նրա բարի իրավունքն է», գտնում է ցանցարարը: Ըստ Հաուզերի, այդ կազմակերպությունը բոլոր նկատառումներով կասկածի տեղիք չի տալիս: «Դրանք երիտասարդներ են, տեղեկատվական տնտեսագետներ, ճարտարագետներ, ովքեր սերում են Ադրբեջանից և հիմա ուսանում են ամբողջ աշխարհում:» Երիտասարդների միջև քաղաքական փոխանակումները ցանկալի են և դատապարտելի չեն, այսպես է պարզաբանում Օթթո Հաուզերը: Բայց ամբողջ աշխարհում շուրջ 300 անդամ ունեցող ուսանողական ցանցը, թերևս, անկախ չէ: Այն հիմնականում ֆինանսավորվում է, ինչպես և Հաուզերն է ընդունում, նավթի և գազի ադրբեջանական պետական «Սոկար» կոնցեռնի և «մի քանի այլ ձեռնարկությունների» կողմից:

Ցանցը, թերևս, հազիվ թե անկախ է

Էմնըսթի Ինթերնեյշնըլի (Amnesty International) գերմանական կազմակերպությունը (Բեռլին) այդ ցանցը բնութագրում է ամեն կերպ, բայց ոչ՝ պետությունից անկախ. «Եթե այն կառավարություն քննադատող կազմակերպություն լիներ, ապա դրա անդամները հավանաբար պետք է հետապնդվեին», ասաց գերմանական կազմակերպության ներկայացուցիչը: Քանզի այդ երկրում մարդու իրավունքների և մամուլի ազատության հարցերում շատ առաջ չեն գնացել: Էմնըսթի Ինթերնեյշնըլի կոռուպցիոն սանդղակում Ադրբեջանը 183 պետությունների մեջ զբաղեցնում է 143-րդ տեղը: Մամուլի ազատության մասով երկիրը 179 պետությունների մեջ զբաղեցնում է 162-րդ տեղը: Էմնըսթի Ինթերնեյշնըլը դժգոհում է, որ կառավարության նկատմամբ քննադատական դիրքորոշում ունեցող կազմակերպությունները հետապնդվում, իսկ ընդդիմադիրները բացահայտ անհիմն մեղադրանքներով ձերբակալվում են, և արվում է այնպես, որ նրանք զրկվում են իրենց աշխատանքից:

ՔԴՄ-ի բադեն-վյուրթթեմբերգյան երկրամասային կազմակերպությունն անակնկալի է եկել

«Նախկինում մենք էինք հոգում մեր երկրամասային համագումարի ծախսերը, ախր, բավարար չափով փող կա՛», ասում է երիտասարդական կազմակերպության բաձրաստիՃան մի ներկայացուցիչ: Ըստ նրա, երկրամասային կազմակերպության միայն ներկայիս, արդեն վաղուց քննադատության թիրախ դարձած ղեկավար Նիկոլաս Լյոբելն է հովանավորության հարցն ընդլայնել: Ակնհայտ է, որ այս անգամ ստադիոնի հովանավոր «Վիրզոլ»-ի կողքին միայն ադրբեջանցիներն են հայտնվում: Դրանից առաջ եղել են բազմաթիվ հովանավորներ:
Անակնկալի եկած է ներկայանում նաև մայր կուսակցությունը: Ո՛չ ՔԴՄ-ի բադեն-վյուրթթեմբերգյան երկրամասային կազմակերպությունն է ասում, ո՛չ էլ մամուլի գրասենյակը, թե ինչ-որ բան իմացել են հովանավորության մասին: Իրենք երիտասարդության կազմակերպությանն «այժմ խնդրել են պարզաբանումներ և տեղեկություններ տալ»:

Երիտասարդական կազմակերպության ղեկավար Լյոբելն է կրում այդ ներգրավման պատասխանատվությունը

Այդ ներգրավման համար պատասխանատվությունը կրում է երիտասարդական կազմակերպության ղեկավար Լյոբելը: Բայց Շտուտգարթեր ցայթունգի այն հարցի առնչությամբ, թե ինչպես բացատրել նման համագործակցությունը և Ադրբեջանից տրամադրված ֆինանսական հատկացման այդպիսի չափը, 26-ամյա գործիչը լռում է: Այդ ուսանողական ցանցն ընդամենը «մեկն է բազմաթիվ հովանավորներից», հայտնում է նա: Ըստ Շտուտգարթեր ցայթունգի տեղեկությունների, երիտասարդական կազմակերպության վրա համագումարը նստում է առնվազն 10000 եվրո: Երիտասարդական կազմակերպության ներսում ևս Լյոբելին մատնանշել են այդ խնդրահարույց ներգրավման հանգամանքը, սակայն նա անուշադրության է մատնել այդ տարակուսանքները:
Մի քանի պահանջների (օրինակ, կենսաթոշակը՝ 70 տարեկանից, երկրամասում ուսուցիչների աշխատատեղերի կրճատում, երկրամասի նախկին ղեկավար Մափփուսի և Աննեթթե Շավանի հասցեին արված սուր քննադատություն) պատճառով խաղից դուրս եկած իրավաբանության ուսանողը հիմա պայքարում է իր քաղաքական գոյատևման համար: Երկրամասային համագումարին որպես նրան մրցակից առաջադրվել է 31-ամյա փաստաբան Մարիա-Լենա Վայսի թեկնածությունը: Ըստ այդմ, իրեն ուղղված հարցերը նա որակում է իբրեև «նոր հարձակումներ իմ դեմ»: Նա «ցնցված է, թե ի՜նչ զանգվածեղությամբ են այստեղ ցեխ նետում՝ անձամբ ինձ վնասելու նպատակով»: