Ձեր վստահելի աղբյուրը

Այսօր նոյեմբերի առաջին շաբաթն է: Իսկ դա նշանակում է, որ այսօր ուժեղ սեռի ներկայացուցիչների` տղամարդկանց միջազգային օրն է: Օրը նշանակվել է Միխայիլ Գորբաչովի առաջարկով, հենց նրա թեթև ձեռքով էլ վերջ է դրվել կանանց ու տղամարդկանց միջև եղած այս «խտրականությանը»(տղամարդիկ` ի տարբերություն կանանց, չունեին միջազգային օր):

Ասում են` այս օրը տղամարդիկ հատկապես սպասում են կանանց ուշադրությանը` շնորհավորանքներին, նվերներին: Դեռ երեկվանից հայ տղամարդիկ սոցիալական ցանցերի էջերում հիշեցնում էին տոնի մասին, նաև «սպառնում», որ առջևում կանանց տոներն են:

Ուշագրավ է, որ կա ևս մեկ` Տղամարդկանց միջազգային օր` նոյեմբերի 19-ը: Այդ տոնը առաջին անգամ նշել են 1999-ին Տրինիդադում և Տոբագոյում, իսկ այսօր տոնում են նաև ԱՄՆ-ում, Մեծ Բրիտանիայում, Յամայկայում, Ավստրալիայում, Հնդկաստանում, Սինգապուրում, Մալթայում, Հարավային Աֆրիկայում:

Panorama.am-ը փորձեց հայտնի մարդկանցից պարզել, թե ինչ են նվիրե՞լ կամ ի՞նչ են ստացել օրվա առթիվ, ինչպե՞ս են պատրաստվում նշել օրը:

Հանրապետական պատգամավոր Կարինե Աճեմյանը երեկ պատահաբար է իմացել տոնի մասին: Նրա ամուսինը, հիշեցնենք, հայտնի դերասան, վաստակավոր արտիստ Արա Դեղտրիկյանն է:
«Ես այսօր շնորհավորել եմ, օծանելիք եմ նվիրել: Անակնկալ էր, ինքն էլ շատ ուրախացավ»,-ասաց պատգամավորը:

Երգիչ Արամոն` երգչուհի Էմմա Պետրոսյանի ամուսինը, Panorama.am-ին մի քիչ տխուր տոնով ասաց, որ այսօր ոչ շնորհավորանք, ոչ էլ նվեր չի ստացել:
«Երևի Հայաստանում տեղյակ չեն: Իսկապես չեմ ստացել: Կարծում եմ, օրվա ընթացքում կստանամ»,-հույս հայտնեց երգիչը:

Մարքսիստական կուսակցության ղեկավար Դավիթ Հակոբյանին առաջինը մենք շնորհավորեցինք:
«Ես անգամ գաղափար չունեմ, որ գոյություն ունի տղամարդկանց օր: Ամենաթանկ նվերը դու մատուցեցիր, այնպես որ` շնորհակալություն»,-անկեղծացավ մարքսիստը:

Ի՞նչ նվեր կցանկանաք ստանալ. «Կուզեի, իմ ժողովուրդը ծաղկի, բարգավաճի, քաղաքական ու ընտեսական ապաշխարանքներից ազատվի: Ամենակարևորը, իմ ժողովուրդը աշխատանք ունենա: Ես կուզենայի, որ նախագահական ընտրություններն այս սկզբունքով ընթանային. չկա ավելի ստրկական բան, քան զրկանքն ու պչրանքը, չկա ավելի արքայական բան, քան աշխատանքը: Ամենամեծ նվերը դա տղամարդու այնպիսի աշխատանք ունենալն է, որը բարոյահոգեբանական բավարարվածություն է բերում»:
Դավիթ Հակոբյանը խոստովանեց, որ բժշկի աշխատանքն իրեն նման բավարարվածություն չի պատճառում, փոխարենը իրեն լավ է զգում քաղաքական եռուզեռի մեջ:

Հանրապետական պատգամավոր Վարդան Այվազյանն էլ տոնի մասին տեղյակ չէր:
«Էսօր տղամարդկանց միջազգային օ՞րն է»,-դառնալով ընկերներին հարցրեց պատգամավորը:-«Հեսա տղամարդկանց հետ նստած ենք, ասում են, որ չեն իմանում»:
Վ. Այվազյանն ասաց, որ իր համար ամենամեծ նվերը կնոջ բարամաղթանքներն են, իսկ իր համար կարևոր ամեն ինչ ունի:
«Նվեր ստանալու առանձնակաի ցանկություն չունեմ: Ընկերներ ունեմ լավ, բարի կամեցող մարդիկ ունեմ»,-ասաց պատգամավորը:
 

«Կարին» ավանդական երգի-պարի խմբի հիմնադիր և ղեկավար Գագիկ Գինոսյանն էլ չգիտեր, որ այսօր իր տոնն է: Նվերների ակնկալիք, ասում է, երբևէ չի ունեցել:
«Տղամարդու ամենամեծ նվերն  ասպետավայել ապրելն է, որ շրջապատը նկատի իր ասպետականությունը, եթե իրոք այն կա»,-ասաց Գինոսյանն ու ցավով արձանագրեց, որ հայ տղամարդկան շրջանում այսօր այդպիսիք քիչ են:
«Ընդհանուր մասայում քիչ են, բայց, փառք աստծո, իմ շրջապատում նման մարդկանց պակաս չկա»,-ասաց Գինոսյանը:

ԲՀԿ-ական պատգամավոր Տիգրան Ուրիխանյանին այսօր առաջինը շնորհավորել է Վերա Ռոմանովան: Պատգամավորի ներկայացմամբ, ինքն այս կնոջ հետ ունի շատ ջերմ, մարդկային, բարոյական հարաբերություններ:
Ի՞նչ կուզեք ստանալ այսօր. «Ժպիտներ, ժպիտներ, որպես չամուսնացած տղամարդ, հավաքում եմ կանանց ժպիտներ»:

Երեկոյան ընկերների հետ որևէ տեղ չեն գնալու, տոնը չեն նշելու. «Չենք կենտրոնացել առանձնապես տոնի վրա: Շատ ավելի լուրջ նշում ենք կանանց տոնը»:

Panorama.am-ը միանում է հնչած ու չհնչած շնորհավորանքներին ու բարեմաղթանքներին: