Ձեր վստահելի աղբյուրը

Մեծ Բրիտանիայի Լորդերի պալատում նոյեմբերի 6-ին ներկայացվել են Անգլիայի հետ Ադրբեջանի հարաբերությունները, իրավիճակը Հարավային Կովկասում և Ադրբեջանում, ինչի արդյունքում երկար և բուռն քննարկում է ծավալվել: 

Ինչպես տեղեկանում ենք Անգլիայի խորհրդարանի պաշտոնական կայքէջից, Ադրբեջան այցելած Լորդ Լեյրդը (Lord Laird) նախ իր գործընկերներին է ներկայացրել այդ երկրի սոցիալ-տնտեսական վիճակը, ասել, որ Անգլիայի հետ Ադրբեջանի հարաբերությունները երկար տարիների հեռվից են գալիս և հավելել, որ տարածաշրջանում «մի մեծ մութ ամպ» է կախված և դա Հայաստանի հետ ղարաբաղյան հակամարտությունն է, այնուհետև Անգլիայի կառավարությանն ուղղված հարցադրումներ է արել: Նա նկատել է, որ ղարաբաղա-ադրբեջանական շփման գծում զինվորների մահեր են գրանցվում, իսկ վերջերս Ադրբեջանի ղեկավարության կողմից Ռամիլ Սաֆարովին ներում շնորհելը էլ ավելի է մեծացրել լարվածությունը կողմերի միջև:

Լորդ Լեյրդն ասել է նաև, որ հակամարտության լուծմամբ զբաղվող ԵԱՀԿ Մինսկի խումբն այդպես էլ հաջողությունների չի հասել, և հենց այս պարագայում Մեծ Բրիտանիայի կառավարությունը ինչ-որ բան պետք է մտածի՝ կառուցողական վարքագիծ դրսևորելով:

«Ի՞նչ է մտածում այս ուղղությամբ մեր երկրի կառավարությունը: Ադրբեջանի տնտեսության մեջ մեծածավալ ներդրումներ ունենալով, արդյոք մեր կառավարությունը ակտիվորեն չի նպաստում փախստականների վիճակի վատթարացմանը, ի՞նչ առաջարկություններ ունի մեր կառավարությունը հակամարտության խաղաղ ու արագ լուծման հարցում», -հարցադրումներ է արել Լորդ Լեյրդը:

Այնուհետև Լեյրդին է միացել նաև Միացյալ Թագավորության լորդերի պալատի անդամ բարոնուհի Քերոլայն Քոքսը, որը նաև Բրիտանահայկական համակուսակցական խորհրդարանական խմբի ղեկավարն է: Նա ասել է, որ 78 անգամ այցելել է Հայաստան, ինչպես նաև Լեռնային Ղարաբաղ և ընդգծել Հայաստանի ու Ադրբեջանի միջև հակամարտության խաղաղ լուծման անհրաժեշտությունը:

Բարոնուհին մտահոգություն է հայտնել, որ Ադրբեջանի կառավարությունը հերոսացրել է հայ զինվորին սպանած Ռամիլ Սաֆարովին և Լորդերի պալատում Անգլիայի կառավարությանը ներկայացնող նախարարի հարցրել. «Հնարավո՞ր է իմանալ՝ ի՞նչ է արել մեր կառավարությունը՝ մարդասպան Սաֆարովին ազատ արձակելու և հերոսացնելու Ադրբեջանի գործողությունների առնչությամբ»: Բարոնուհի Քոքսը նաև բարձրացրել է Ադրբեջանում մարդու իրավունքների և խոսքի ազատության հարցը և նշել, որ այդ առումով այդ երկրում մեծ խնդիրներ կան:

Նախարար Ուիլյամ Ուոլեսը (William Wallace Lord Wallace of Saltaire) եզրափակելով քննարկումը, նկատել է, որ «կոալիցիոն կառավարությունը նպատակ ունի ապահովել Մեծ Բրիտանիայի անվտանգությունը ու բարգավաճումը, ինչպես նաև մարդու իրավունքների պահպանման, ժողովրդավարության հարցերով ազդել այն կառավարությունների վրա, որոնց հետ մենք համագործակցում ենք»:

Նախարարը նշել է, որ Մեծ Բրիտանիան պետք է շարունակի աշխատել ԵՄ, ԵԽ և ԵԱՀԿ անդամ իր գործընկերների հետ՝ տարածաշրջանում խաղաղության հաստատման հարցում:

Պատասխանելով Բարոնուհի Քոքսի դիտարկումներին, նախարարն ընդունել է, որ Հայաստանի ու Ադրբեջանի միջև «արյունոտ և անկանոն հակամարտությունը» երկու կեղմերից էլ շատ կյանքեր է խլել և նշել, որ ԵԱՀԿ Մինսկի խումբը հակամարտության խաղաղ կարգավորման ուղղությամբ որևէ ձեռքբերում դեռևս չունի: «Մեծ Բրիտանիան, չլինելով Մինսկի խմբի անդամ, շարունակում է աջակցել Մինսկի գործընթացին, որքան էլ այն դժվար լինի: Մենք չենք կարող ամբողջությամբ ազատվել Մինսկի խմբի անդամ Ռուսաստանից, քանի որ այդ երկիրը գլխավոր դերակատարն է: Այդ պատճառով էլ առանց Ռուսաստանի խումբ ստեղծել, որը կփորձի բանակցություններ վարել, անօգուտ կլինի», հայտարարել է նախարար Ուոլեսը:

Ի դեպ, անգլիացի նախախարը, որը Անգլիայի վարչապետ Դեվիդ Քեմերոնի կառավարությունում իր պաշտոնն ստանձնել է 2010-ին, չի պատասխանել կամ խուսափել է պատասխանել Սաֆարովի վերաբերյալ Բարոնուհի Քոքսի հարցին: