Ա. Վարդանյանն ուրախ է, որ ԲՀԿ-ն փոխել է իր մոտեցումը

Քաղաքական 14:51 08/11/2012

Ա. Վարդանյանն ուրախ է, որ ԲՀԿ-ն փոխել է իր մոտեցումը

Ինչպես ավելի վաղ հայտնել էինք, ՀՅԴ Հայաստանի Գերագույն մարմինը հանդես է եկել հայտարարությամբ: Մեկնաբանելով այդ հայտարարությունը, լրագրողների հետ զրույցում ԱԺ ՀՅԴ խմբակցության ղեկավար Արմեն Ռուստամյանն ասաց.

«Մենք վստահ ենք, որ եթե այս խնդիրներն իրականացվեն, շատ կարճ ժամանակահատվածում մենք կունենանք որակապես նոր երկիր: Մենք կունենանք մի պետություն, որ իսկապես կլինի ժողովրդավարական, իրավական և սոցիալական»:

Խոսելով ՀՅԴ-ի քաղաքական բանավեճեր կազմակերպելու մտադրության և ԲՀԿ-ի` նույնանման ծրագրեր ունենալու մասին` Ա. Ռուստամյանը նշեց. «Լավ նշան է, որ բոլորը գան-հանգեն հենց այն համախմբման գաղափարին, որը պետք է տեղի ունենա հենց այս պլատֆորմի շուրջ»: Նրա համոզմամբ` ոչ թե ինչ-որ առանձին-առանձին նախաձեռնություններ, այլ ՀՅԴ ծրագրում առկա կետերի համակարգն է, որ այդ փաթեթը դարձնում ամբողջական:

Իսկ ասուլիսին ներկա ԱԺ ՀՅԴ խմբակցության պատգամավոր Աղվան Վարդանյանն էլ նշեց, որ իրենք պատրաստվում են ՀՅԴ-ի հայտարարությունում առկա ծրագրային դրույթները քննարկել քաղաքացիական հասարակության ներկայացուցիչների հետ:

Բանախոսները հայտնեցին, որ ՀՅԴ-ն ակնկալում է երկրի հասարակական ու քաղաքական ուժերի կոնսոլիդացիա` իրենց ներկայացրած փաթեթի շուրջ:

Անդրադառնալով դիտարկմանը, թե`ժամանակին 100 տոկոս համամասնական ընտրակարգին անցնելու առաջարկը ԲՀԿ-ն ժամանակին չի ընդունել, բայց այսօր ինքն է առաջարկում, Ա. Վարդանյանն ասաց. «Մենք շատ ուրախ ենք, որ պետության կառավարման վերաբերյալ նրանց մոտեցումներն այսօր այսպիսին են»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: