Ի՞նչ է կատարավում այս պահին Հալեպում. Հաղորդում է Արման Սաղաթելյանը

Հասարակություն 16:55 09/11/2012

Ի՞նչ է կատարավում այս պահին Հալեպում. Հաղորդում է Արման Սաղաթելյանը

Ակնկալվում է, որ Երևանից Հալեպ փոխադրված հումանիտար բեռը, որը երեկ Երևանի ժամանակով ժամը 14:00-ին արդեն Հալեպի օդանավակայանում էր, այսօր կտեղափոխվի կենտրոնական շտաբ` հետագա վերաբաշխման համար:

Այս մասին ԱրմՌադիո FM 107-ի եթերում հաղորդել է PanARMENIAN Media Group-ի գլխավոր տնօրենի տեղակալ Արման Սաղաթելյանը, ով այժմ գտնվում է Հալեպում:

Նա մանրամասնել է, որ բեռն ամբողջությամբ կշռում է 12,5 տոննա, բաղկացած է 1342 արկղից, դրանցում հիմնականում սննդամթերք է:

«Թերևս, օգնությունը բաշխվելու է «մեկ արկղ` մեկ ընտանիքին» սկզբունքով, և այն իհարկե նախատեսված է ոչ միայն հայկական համայնքի համար»,- նշել է Արման Սաղաթելյանը` հավելելով, որ Հալեպում հայկական հյուպատոսարանը միակն է, որ ակտիվորեն աշխատում է, բազմաթիվ մարդիկ են դիմում տարբեր հարցերով: Այլ երկրների դիվանագիտական ներկայացուցչությունները չեն աշխատում:

Ինչ վերաբերում է Հալեպում տիրող իրավիճակին, ապա Արման Սաղաթելյանի փոխանցմամբ, երեկոյան ժամերին փոխհրաձգության ձայներ են լսվում ոչ այնքան ակտիվ, սակայն, այնուամենայնիվ, կրակոցներ կան:

Երեկ գրոհային ինքնաթիռ է նկատվել օդում, և քաղաքի տարբեր վայրերում պայթյուններ են արձանագրվել` ավիացիայի գործադրման հետևանքով:

«Սակայն, ընդհանուր առմամբ, մարդիկ չեն վախենում փողոց դուրս գալ, սրճարաններն ու ռեստորանները կենտրոնում աշխատում են, բաց են խանութները, շուկան: Իհարկե, մարդիկ զգուշավոր են, սակայն, քաղաքն ապրում է բավականին աշխույժ կյանքով»,- Հալեպից հաղորդել է PanARMENIAN Media Group գլխավոր տնօրենի տեղակալ Արման Սաղաթելյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: