Ձեր վստահելի աղբյուրը

ԱԺ նախագահ Հովիկ Աբրահամայանը պաշտոնական այցով Հայաստան ժամանած Ուրուգվայի Արևելյան Հանրապետության Ներկայացուցիչների պալատի նախագահ Խորխե Օռիկոյին այսօրվա հանդիպման ժամանակ ներկայացրել է սաֆարովյան գործը, այն գնահատելով որպես աննախադեպ երևույթ, քաղաքական նպատակներով իրականացված անբարոյական քայլ, ինչը կարող է բացասաբար անդրադառնալ թե Լեռնային Ղարաբաղի հարցով բանակցային գործընթացին, թե տարածաշրջանում լարվածության թուլացմանը և կայունության հաստատմանը:

ԱԺ հասարակայնության հետ կապերի վարչության փոխանցմամբ, նա ներկայացրել է Հայաստանի իշխանությունների կողմից ձեռնարկած քայլերը և միջազգային հանրության դատապարտող արձագանքները:
Սաֆարովի դեպքի առնչությամբ Խորխե Օռիկոն նշել է, որ Ուրուգվայը դատապարտում է այդ արարքը, որտեղ էլ այն տեղի ունեցած լինի:

«Մենք միշտ պայքարել ենք մարդկանց հավասար իրավունքների համար: Դատապարտում ենք բոլոր այն գործողությունները, որոնք ոճրագործություն են: Մարդու իրավունքների պաշտպանությունը մեծ կարևորություն ունի միջազգային ասպարեզում, և պատրաստ ենք աջակցել բոլոր այն հակամարտությունների ու վիճահարույց խնդիրների լուծմանը, որոնք կընթանան խաղաղ ճանապարհով»,- ասաց նա:

Անդրադառնալով Լեռնային Ղարաբաղի հակամարտության բանակցային գործընթացին՝ Ազգային ժողովի նախագահը նշել է, որ հայկական կողմը դրա լուծումը տեսնում է ԵԱՀԿ Մինսկի խմբի շրջանակներում:

«Մեզ համար շատ կարևոր է հրադադարի պահպանումն ու համարտության լուծումը խաղաղ բանակցությունների ճանապարհով»,-նշել է Հովիկ Աբրահամյանը: ԱԺ նախագահն անդրադարձել է նաև հայ-թուրքական հարաբերություններին:

Հանդիպման վերջում ՀՀ Ազգային ժողովի նախագահ Հովիկ Աբրահամյանը Հայաստանի Հանրապետության հետ ավանդական բարեկամական կապերի ամրապնդման և միջպետական հարաբերությունների զարգացման գործում նշանակալի ավանդի համար Ուրուգվայի Ներկայացուցիչների պալատի նախագահ Խորխե Օռիկոյին պարգևատրել է ՀՀ Ազգային ժողովի պատվո մեդալով: Ուրուգվայի խորհրդարանի արտաքին հարաբերությունների հանձնաժողովի և Ուրուգվայ-Հայաստան միջխորհրդարանական բարեկամական խմբի անդամ Ռուբեն Մարտինեսը պարգևատրվել է ԱԺ պատվոգրով: