Ձեր վստահելի աղբյուրը

Ադրբեջանի ԱԳՆ պաշտոնական ներկայացուցիչը հայտարարել է, թե պաշտոնական Բաքուն պատրաստ է Խաղաղության մեծ համաձայնագրի շուրջ բանակցություններ սկսել Հայաստանի հետ, ընդգծելով, որ իրենց համար կոնֆլիկտի ձգձգումն անթույլատրելի է: Մեկնաբանությունների համար Panorama.am-ը զրուցեց քաղաքական հարցերով փորձագետ Տիգրան Աբրահամյանի հետ:

«Ադրբեջանի ԱԳՆ հայտարարությունը մեկ նպատակ է հետապնդում` խեղաթյուրել բանակցային գործընթացի բուն էությունը: Առաջին հայացքից Ադրբեջանը կառուցողական մոտեցում է դրսևորում, բանակցությունները շարունակելու պատրաստակամություն հայտնում, սակայն դա միայն առաջին հայացքից: Ինչպե՞ս կողմերը կարող են անցնել Խաղաղության մեծ համաձայնագրի շուրջ բանակցություններին, եթե հիմնական սկզբունքների շուրջ այդպես էլ համաձայնություն ձեռք չբերվեց: 2011 թվականին Կազանում Ադրբեջանը ըստ էության մերժեց հիմնական սկզբունքների մասին փաստաթուղթը` հավելյալ հանդես գալով 10 նոր առաջարկներով»,- նշեց փորձագետը:

Նրա խոսքերով, դեռ Կազանյան հանդիպումից հետո, միջազգային ճնշումներին դիմադրելու նպատակով Ադրբեջանը ձեռնամուխ եղավ նոր թեզի առաջ քաշմանը, ինչը ենթադրում էր Խաղաղության մեծ համաձայնագրի անցնելու պատրաստականության մասին հավաստիացումները, այնինչ ակնհայտ է, որ առանց հիմնական սկզբունքների համաձայնեցման անհնար է անցնել բանակցությունների երկրորդ փուլին, այն է` Խաղաղության մեծ համաձայնագրի մշակման աշխատանքներին:

«Այս ամենից կարելի է մեկ եզրակացություն անել. չնայած իր հավաստիացումներին, իրականում հենց պաշտոնական Բաքուն է իր քայլերով ձգձգում բանակցությունները, ինչն իսկապես որ անթույլատրելի է»,- հավելեց Տ. Աբրահամյանը: