Ձեր վստահելի աղբյուրը

«Մեր նպատակն է երկիրը զերծ պահել արտաքին ռիսկերից ու ցնցումներից և դա է ստիպում մեզ ներկայացնել հավասարակշռված, իրատեսական բյուջե: Նաև զերծ մնալ ավելորդ սոցիալական ծուղակներից, որի մեջ հայտնվել են բազմաթիվ երկրներ՝ իրենց վրա վերցնելով շատ ծրագրեր»:
Այս մասին Ազգային Ժողովում 2013թ-ի պետական բյուջեի քննարկումների եզրափակիչ իր ելույթում հայտարարեց ՀՀ վարչապետ Տիգրան Սարգսյանը, ով նախևառաջ շնորհակալություն հայտնեց խորհրդարանին արդյունավետ ու շահագրգիռ քննարկումների համար:

Ըստ վարչապետի՝ իշխանությունը շատ պատասխանատու է մոտենում խնդրին, և հենց այդ կոնտեքստում էլ ընդունում է արդարացի դժգոհությունները: Բայց. «Մենք երբևիցէ չենք ունեցել հավակնություն բացարձակ ճշմարտություն ներկայացնելու, այդ իսկ պատճառով կարևորում ենք պատգամավորների կողմից ներկայացված 60 առաջարկությունները, որոնք, համոզված ենք, միտված են պետբյուջեի նախագիծը ավելի բարելավելուն: Կան այնպիսի առաջարկություններ, որոնք պետք է անպայման ընդունենք»,- հայտարարեց Տիգրան Սարգսյանը:

Վարչապետը համոզմունք հայտնեց, որ պետբյուջեի նախագիծը ստեղծում է հիմքեր, որպեսզի 2013թ-ին իրականացնենք արմատական բարեփոխումներ՝ սա է բյուջեի առաքելությունը: Համոզմունք հայտնեց, որ քննադատների մեծամասնությունը ազնիվ մղումներից ելնելով ներկայացնում են առաջարկություններ՝ նպատակ ունենալով ապրել ավելի բարեկեցիկ հայրենիքում:

Վարչապետը կանգ առավ այն խնդիրների վրա, որոնք կարող են ստեղծել այդ հիմքը, դրանց թվում՝ տնտեսական աճի խթանում, գյուղ և գյուղատնտեսություն, սոցիալական ոլորտ, կոռուպցիայի դեմ պայքար, գիտության ֆինանսավորում և այլն:

«Մենք քաջ գիտակցում ենք, որ ընդդիմությունը պետք է սուր քննադատի կառավարությանը, իսկ մենք պետք է զերծ մնանք նույն սրությամբ պատասխանելուց: Այս ամենի մեջ մենք պետք է բացահայտենք համերաշխության եզրերը, քանի որ մենք առաջին հերթին պատասխանատու ենք հենց դրա համար»,- նշեց ՀՀ վարչապետն ու հավելեց. «Շատ ուշադրությամբ կուսումնասիրենք բոլոր առաջարկություններն ու դիտողությունները ու անպայման կփորձենք հաշվի առնել նրանք, որոնք համահունչ են մեր մոտեցումներին»: