Ձեր վստահելի աղբյուրը

Ուսանողների միջազգային օրվա առթիվ շնորհավորական խոսք է հղել ԿԳ նախարար Արմեն Աշոտյանը:
«Սիրելի ուսանողներ,
Ընդունեք իմ ջերմ շնորհավորանքներն ու բարեմաղթանքներն ուսանողների միջազգային օրվա կապակցությամբ: Նոյեմբերի 17-ը ողջ աշխարհում առանձնակի ջերմությամբ է նշվում` որպես ուսանողների համաշխարհային օր: Տասնամյակներ շարունակ աշխարհի ուսանողներն ակտիվ և միասնական ներգրավված են ինչպես իրենց երկրների ամենօրյա խնդիրների, այնպես էլ համաշխարհային հիմնախնդիրների լուծմանը միտված գործընթացներում:

Ուսանողությունը համարվում է յուրաքանչյուր պետության զարգացման ու առաջընթացի կարևորագույն երաշխիքը: Հասարակության երիտասարդ մտավոր ներուժն այն գրավականն է, որն ապահովում է ինչպես պետության հզորությունը, այնպես էլ յուրաքանչյուր քաղաքացու բարեկեցությունը: Հմուտ և մասնագիտական գիտելիքներով հարուստ երիտասարդներով է պայմանավորված գիտական մտքի զարգացումն ու ողջ հասարակության առաջընթացը: Մենք թևակոխել ենք մի նոր դարաշրջան, երբ օր օրի փոփոխվող համաշխարհային մարտահրավերներին կարող ենք դիմագրավել միայն արդիական գիտելիքներով:

Հայ ուսանողներն այսօր քայլում են մեր երկրի հասարակական կյանքի բոլոր զարգացումներին համընթաց` միաժամանակ լինելով դրանց ակտիվ մասնակիցն ու իրականացնողը: Թե ինչպիսին կլինի Հայաստանի Հանրապետությունը տարիներ անց, պայմանավորված է նաև ներկայիս ուսանողության ձգտումներով, երազանքներով ու հաստատակամությամբ:

Ուսանողների միջազգային օրվա կապակցությամբ շնորհավորում եմ ՀՀ ուսումնական հաստատություններում սովորող բոլոր ուսանողներին և ցանկանում լավատեսություն, եռանդ, հաստատուն կամք, ուսման մեջ հաջողություններ ու բոլոր նպատակների իրականացում»,-ասված է նախարարի խոսքում:
 

Տոնի առթիվ շնորհավորական ուղերձ է հղել Հայաստանի երիտասարդական հիմնադրամը:
«Ուսանողությունն ու երիտասարդությունը նորանկախ Հայաստանի պետականության կայացման ոչ միայն մասնակիցն են, այլև կրողը։ Անհերքելի է նրանց դերը երկրում ընթացող գործընթացներում։ Սիրելի′ ուսանողներ, օգտագործեք սովորելու, գիտելիք կուտակելու ձեզ ընձեռված այս բացառիկ տարիները։ Կրթությանը հատկացված ուսանողական տարիները վաղվա ձեր բարեկեցիկ ապագայի լավագույն գրավականն են։ Մեր ապագան կերտելու են այսօրվա խելացի երիտասարդները»:

Նախորդող հրապարակումներ`
Ուսանողության միջազգային օրն է