Ձեր վստահելի աղբյուրը

Ադբեջանի նախագահ Իլհամ Ալիևը հայտարարել է, թե Հայաստանին քաղաքական ու տնտեսական մեկուսացման ենթարկելուն ուղղված իրենց քաղաքականությունը տալիս է արդյունքներ և իրենք շարունակելու են  այն:

Panorama.am-ի հետ զրույցում, անդրադառնալով վերոնշյալ հայտարարությանը, ԱԺ ՀՀԿ խմբակցության պատգամավոր Կարինե Աճեմյանը նշեց. «Հայաստանին շրջափակման ենթարկելով` Թուրքիան ու Ադրբեջանն, իհարկե, խնդիրներ ստեղծում են, սակայն դա Հայաստանին չի խանգարում երկրում կայունության ու անվտանգության ապահովման, ինչպես նաև ժողովրդավարության զարգացման հարցում:

Պատգամավորի խոսքերով, Ադրբեջանն, իհարկե, տնտեսական առումով խնդիրներ ստեղծում է, սակայն քաղաքական առումով Ադրբեջանը ուրախանալու առիթներ չունի:

«Կարծում եմ՝ եվրոպական հանրությունը, միջազգային կառույցները հստակ դիրքրոշում ունեն և՛ Ադրբեջանի, և՛ Հայաստանի մասով, որովհետև և՛ ժողովրդավարության առումով, և՛ բոլոր միջազգային կառույցներում ներկայացվածության առումով Հայաստանը չի կարելի համեմատել Ադրբեջանի հետ»,- նշեց տիկին Աճեմյանը:

«Այդ բլոկադայի պայմաններում, ի տարբերություն Ադրբեջանի, մենք ժողովրդավարության և մարդու իրավունքների առումով մեծ առաջընթաց ենք գրանցել, երկրում միգուցե դանդաղ, սակայն կայուն ու առանց ցնցումների զարգացում է ապահովվել»,- ավելացրեց նա:

Պատգամավորի խոսքերով, երկրում իրականացվող բարեփոխումներ և արտաքին քաղաքականության ոլորտում իրականացվող նախաձեռնությունների շնորհիվ Հայաստանը մեծ հեղինակություն է վայելում, ինչը չի կարելի ասել Ադրբեջանի համար: