Ձեր վստահելի աղբյուրը

«Վերջին օրերին Վրաստանում արձանագրված նախկին պաշտոնյաների ձերբակալման դեպքերը կավելանան»,- Panorama.am-ի հետ զրույցում, մեկնաբանելով Վրաստանում իրականացվող քրեական հետապնդումներն ու դրանց շուրջ ծավալված իրադարձությունները, նշեց Վրաստանի հարցերով փորձագետ Ալիկ Էրոյանցը:

«Հիմնականում մեղադրանքներ են ներկայացվել նախկին ուժային կառույցների ղեկավարներին, որոնցից ամենաաղմկահարույցը ՆԳ նախկին նախարար Բաչո Ախալաիայի գործն է: Վերջինս մեղադրվում է ՔՕ մի քանի հոդվածներով: Դեռևս հոկտեմբերի 1-ին Վրաստանում անցկացվելիք խորհրդարանական ընտրություններից առաջ երկրից փախած Բաչո Ախալաիան մեկ ամիս անց վերադարձավ Վրաստան, որից հետո նրան անմիջապես ձերբակալեցին: Մեղադրանքներ ներկայացվեցին նաև ՊՆ գլխավոր շտաբի պետին և մի շարք այլ բարձրաստիճան պաշտոնյաներին:»

Հարցին, թե ինչու Բաչո Ախալաիան վերադարձավ Վրաստան` գիտակցելով, որ նրան կարող են ձերբակալել, փորձագետը պարզաբանեց, որ ՆԳ նախկին նախարարին ազատության մեջ ավելի մեծ վտանգներ էր սպառնում:

Ըստ Էրոյանցի` «Ախալաիան, ում նախագահ Սաակաշվիլին վստահել էր երկրում հանցավորության մակարդակի նվազեցման բարդ գործընթացը, լուրջ թշնամիներ է ձեռք բերել` հանձինս հանցավոր աշխարհի ներկայացուցիչների, որոնց դեմ ժամանակին անողոք պայքար էր ծավալել: Բանն այն է, որ գտնվելով արտերկրում ազատության մեջ` վերջինս կարող էր հետապնդվեր հանցավոր աշխարհի ներկայացուցիչների կողմից և, հնարավոր է նույնիսկ` նրա նկատմամբ հաշվեհարդար տեղի ունենար: Իսկ Բ. Ախալաիան, քաջ գիտակցելով այդ հանգամանքը, կարծես գերադասեց բանտախուցը, որտեղ իրեն ավելի անվտանգ կզգար: Հետևաբար լավ հասկանալով, որ նոր իշխանություններն անպայմանորեն կհետաքննեն անցյալում նրա անձի հետ կապված աղմկահարույց դեպքերը, ինչպես նաև սեպտեմբեր ամսին մեծ իրարանցում առաջացրած բանտային սկանդալի հետ նրա կապ ունենալու հանգամանքները, կայացրեց վերադառնալու որոշում: Թեև վերջինիս կյանքը, կարելի է ասել, կրկին վտանգված է, քանի որ նրան տեղափոխել են այն բանտը, որտեղ հիմնականում պահում են «օրենքով գողերի», որոնց դեմ տարիներ շարունակ ինքը պայքարել է, և որոնցից շատերը հենց վերջինիս նախաձեռնությամբ են հայտնվել բանտում»:
Էրոյանցը նաև հավելեց, որ հեռակա կարգով մեղադրանք է ներկայացվել նաև Բաչո Ախալաիայի եղբայր, ՊՆ նախկին փոխնախարար` Դաթա Ախալաիային:

Անդրադառնալով Վրաստանում ծավալված իրադարձությունների վերաբերյալ միջազգային հանրության արձագանքին` փորձագետը տեղեկացրեց, որ Եվրոպական տարբեր կառույցների ղեկավարներ, այդ թվում ՆԱՏՕ-ի գլխավոր քարտուղարությունն իրենց անհանգստությունն են հայտնել Վրաստանում նախկին պաշտոնյաների ձերբակալությունների փաստի առչությամբ, որին ի պատասխան, գործող վարչապետ Բիձինա Իվանիշվիլին հայտարարել է, որ բոլոր գործերը կքննվեն արդարության և թափանցիկության պայմաններում, և դրանց հետաքննության արդյունքները օբյեկտիվորեն կներկայացվեն հանրությանը:

Ինչ վերաբերում է հետագա զարգացումներին, փորձագետը նաև չբացառեց, որ մոտ ապագայում մեղադրանքներ կարող են ներկայացվել նաև նախկին վարչապետ Վանո Մերաբիշվիլին և նույնիսկ նախագահ Միխեիլ Սաակաշվիլիին: