Ձեր վստահելի աղբյուրը

ԵԱՀԿ Մինսկի խմբի ռուսաստանցի համանախագահ Իգոր Պոպովը հայտարարել է, թե «Ստեփանակերտի օդանավակայանի շահագործումը տվյալ իրավիճակում լարվածություն կառաջացնի կողմերի միջև»՝ ընդգծելով, որ խնդիրը պետք է կարգավորվի դիվանագիտական ճանապարհով՝ հաշվի առնելով ունեցած փորձը: Արցախի օդանավակայանի ու տարաբնույթ մեկնաբանությունների առնչությամբ Panorama.am-ը զրուցեց ԼՂՀ նախագահի աշխատակազմի Հասարակայնության հետ կապերի գլխավոր վարչության պետ Դավիթ Բաբայանի հետ:

-Պարոն Բաբայան, ինչպե՞ս կմեկնաբանեք ռուս համանախագահի հայտարարությունը, ի՞նչ է վերջինս դրանով փորձում ասել:
-Ռուս համանախագահը փաստել է այն իրավիճակը, ինչը գոյություն ունի, դա երկուստեք լարված հարաբերություններն են: Սակայն այդ լարվածությունն Ադրբեջանն է արհեստականորեն լարում: Ադրբեջանի հիստերիան նոր երևույթ չի և այն շարունակվելու է: Այդ առումով պարոն Պոպովը ոչ մի նոր բան չի ասել:

-Համանախագահի հայտարարության տպավորությունները տարբեր են, ի վերջո ինչպե՞ս եք տեսնում օդանավակայանի շուրջ ստեղված իրավիճակի լուծումը:
-Ի՞նչ հայտարարություն է արվի, մեկ է՝ օդանավակայանը շահագործվելու է: Չպետք է մոռանանք, որ համանախագահները ավելի վաղ հայտարարել էին, որ անթույլատրելի են համարում քաղաքացիական ինքնաթիռների նկատմամբ ռազմական ուժի հնարավոր կիրառումը, ինչը նշանակում է, որ համանախագահները կիսում են մեր մոտեցումները:

Համանախագահները կիսել են մեր մոտեցումը, որ սա քաղաքականացված գործընթաց չէ, սա քաղաքական ձեռնարկ չէ, սա ուղղակի մարդասիրական, տնտեսական նշանակության օբյեկտ է: Եվ այստեղ նրանք ամբողջությամբ կրկնել են այն, ինչ մենք ասում ենք: Ուղղակի այստեղ պետք է զգացմունքային չլինել: Փորձենք հասկանալ թե իրոք ինչ է կատարվում:

-Արդյո՞ք օդանավակայանի շահագործումը լրացուցիչ լարվածություն կառաջացնի:
-Ադրբեջանի լարվածություն ստեղծելու համար անընդհատ առիթ ստեղծում է, իսկ օվանավակայանի շահագործումը ուղղակի նրա համար ևս մեկ առիթ է՝ հիստերիա բարձրացնելու: Իրականում լարվածություն առաջացնում է մարդասպանի արտահանձնումն ու ներում շնորհելը, հերոսի կոչում տալը, ադրբեջանական կողմը թող բարի գտնվեր նման միջադեպերի մասին մտածեր:

-Իսկ ե՞րբ է նախատեսված օդանավակայանի շահագործումը:
-Ներկայումս չնչին տեխնիկական հարցեր են մնացել, սակայն ներկայումս համակարգչային հատուկ ծրագրի միջոցով վիրտուալ թռիչքներ են իրականացվում: Արդեն իսկ 800 նման թռիչք է իրականացվել, իսկ դրան կհետևեն տեխնիկական թռիչքները:

Մենք շտապելու խնդիր չունենք, քանի որ կրկնում եմ, եթե մենք շտապում ենք, ուրեմն ստացվում է մենք քաղաքականացնում ենք գործընթացը, իսկ մենք չենք քաղաքականացնում, քանի որ մենք ասում ենք սա տեխնիկական, մադասիրական, սոցիալ-տնտեսական բնույթի գործընթաց է, իսկ եթե շտապում ենք, ուրեմն` ինչ-որ քաղաքական նպատակներ ունենք:

-Պարոն Բաբայան, ի՞նչ նոր մոտեցումներ կան բանակցային գործընթացում, ի՞նչ է քննարկվել համանախագահների և ԼՂՀ նախագահի վերջին հանդիպման ընթացքում:
-Ղարաբաղյան կողմն առաջարկել է լարվածության թուլացման ու կողմերի միջև վստահության ստեղծմանն ուղղված քայլեր իրականացնել: Մասնավորապես, մենք փորձում ենք պայմանավորվածություն ձեռք բերել գոնե տոնական օրերին երկու կողմից հրադադարի ռեժիմի պահպանման վերաբերյալ, քանի որ որպես կանոն, նման օրերին հրադադարի ռեժիմի խախտումներն առավել շատ են լինում: