Ձեր վստահելի աղբյուրը

«Ժառանգություն» խմբակցության պատգամավոր Զարուհի Փոստանջյանն Հ1» հեռուստաընկերության «Խորհրդարանական շաբաթ» հաղորդման շրջանակում իր հայտարարության մեջ այս անգամ անդրադարձել է Բաքվում «Ժառանգության« կուսակցության առաջնորդ Րաֆֆի Հովհաննիսյանի ելույթին:

«Րաֆֆի Հովհաննիսյանը Բաքվում, ըստ էության, հայտարարեց, որ մենք՝ որպես փոքր երկիր, հաղթել ենք մեզ պարտադրված պատերազմը. մեր փոքր երկիրը՝ իր ձևավորած ռազմական ուժով, այս աշխարհագրական տարածքում ապագայում խոշոր նշանակություն կունենա, և նրան որևէ այլ երկրի աջակից լինելը հենց վերջինիս շահերից է բխելու»,-նշել է պատգամավորը:
Զ. Փոստանջյանի հայտարարությունը ներկայացնում ենք ամբողջությամբ.
«Բաքվում տեղի ունեցած՝ Ասիական քաղաքական կուսակցությունների համաժողովին մեր երկիրը ներկայացնում էր «Ժառանգություն» կուսակցության առաջնորդ, ՀՀ առաջին արտգործնախարար, Հայաստանի Հանրապետության նախագահի թեկանածու Րաֆֆի Հովհաննիսյանը:

Նա իր ելույթներով առաջին անգամ, որպես Հայաստանի պետական-քաղաքական գործիչ, Բաքվում հրապարակեց հայ ժողովրդի հավաքական համոզմունքը, որ Արցախը անկախ Հանրապետություն է և եթե խոսվում է օկուպացիայի մասին, ապա հայկական հողերի մեծ մասը գտնվում է Թուրքիայի և Ադրբեջանի ուժերի օկուպացիայի ներքո և ներկայիս հակամարտության պատճառն Ադրբեջանի ագրեսիան է ընդդեմ Լեռնային Ղարաբաղի Հանրապետության բնակչության: Նա նաև նշել է, որ տարածաշրջանում բոլոր փախստականներն հնարավորություն պետք է ունենան վերադառնալու իրենց բնակավայրերը: Այդ վերադարձը, ըստ էության, առաջին հերթին վերաբերում է Բաքվին ու Սումգայիթին, Թուրքիային, որի հարգման արդյունքում՝ ամբողջական անկախ Արցախին:

Անկախ Հայաստանի դիվանագիտությունը վաղուց պետք է հայ ժողովրդի հավաքական կարծիքն առաջ մղեր՝ օգտագործելով հրապարակային ամբիոնները և, հատկապես, այն պետք է արվեր թուրքական բռնակալության կենտրոններում` Բաքվում, Ստամբուլում և Անկարայում:
Երբ Սերժ Սարգսյանը նախաձեռնում էր Հայաստան-Թուրքիա դիվանագիտությունը՝ ստորագրելով խայտառակ արձանագրություններն ու «Մադրիդյան սկզբունքներ» կոչված հռչակագիրը, թուրքական իրականությանը ծանոթ մարդիկ հեռու էին ոգևորությունից, քանի որ քաջ գիտակցում էին, թե ինչ բան է իսլամիզմը և քեմալականությունը, որի պայմաններում հնարավոր չէ տնտեսական կամ քաղաքական ակտիվություն ցուցաբերել:

Մեզանից որևէ մեկը չպետք է անտեսի կամ չիմանալու տա այն փաստը, որ ժամանակակից Թուրքիան հիմնադրվել է 1915 թվականի ոճրագործության վրա, և այնտեղ չափազանց հոգատար են Թալեաթի հիշատակի նկատմամբ:
Քանի դեռ Թուրքիայում ու Ադրբեջանում բռնատիրական վարչակարգեր են, և մեզ առայժմ չի հաջողվել վերականգնել Արևմտյան Հայաստանը, Թուրքիան ու Ադրբեջանը մեզ համար թշնամի պետություններ են, որոնց հետ, այսպես կոչված, նախաձեռնողական դիվանագիտությունը ոչ միայն անարդյունավետ էր և է, այլև՝ վտանգավոր:
Րաֆֆի Հովհաննիսյանը Բաքվում, ըստ էության, հայտարարեց, որ մենք՝ որպես փոքր երկիր, հաղթել ենք մեզ պարտադրված պատերազմը. մեր փոքր երկիրը՝ իր ձևավորած ռազմական ուժով, այս աշխարհագրական տարածքում ապագայում խոշոր նշանակություն կունենա, և նրան որևէ այլ երկրի աջակից լինելը հենց վերջինիս շահերից է բխելու»:

Նախորդող հրապարակում
Վ. Գուլուզադե. Ո՞վ է Րաֆֆիին հրավիրել Բաքու. Անհրաժեշտ է լուրջ հետաքննություն անցկացնել