Ձեր վստահելի աղբյուրը

Իսրայելից ձեռք բերված ռազմական տեխնիկան կարող է օգտագործվել Իրանի դեմ:
Այդ մասին նշված է իրանական «ԻՌԱՍ» լրատվական գործակալության կայքում թողարկված վերլուծական հոդվածում:
Թեհրանի համալսարանի քաղաքագիտության ամբիոնի ասպիրանտ Ամին Փարթուն իր վերլուծության մեջ նշում է. «Վերջին երկու տարվա ընթացքում Ադրբեջանը շուրջ 3,6 միլիարդ դոլարի ռազմական տեխնիկա է գնել, որի մեծ մասը բաժին է ընկնում իսրայելական արտադրանքին: Միայն 2012թ. Իսրայելի և Ադրբեջանի միջև ռազմական տեխնիկա ձեռք բերելու մասին ստորագրված պայմանագրի արժեքը կազմել է շուրջ 1,9 միլիարդ դոլար: Բացի այդ, Ադրբեջանը հայտարարել է, որ 2013թ. թվականին մտադիր է նաև ռազմանավեր արտադրել. Անկասկած այդ նախագծում ևս Իսրայելը մեծ դերակատարում կունենա»:

Իրանցի վերլուծաբանը, հերթականությամբ ներկայացնելով բոլոր այն զինատեսակները, (անօդաչու ինքնաթիռներ, հականավային «Gabriel» հրթիռներ, հակատանկային «Spike» հրթիռային համակարգեր, հակաօդային պաշտպանության, հակաբալիստիկ «Barak» հրթիռային համակարգեր, ռադարային համակարգեր) որոնք Ադրբեջանը վերջին տարիներին ձեռք է բերել Իսրայելից, հարց է տալիս. «Ադրբեջանի կողմից նման սպառազինությունների ձեռք բերումն ի վերջ ո՞ր սպառանալիքի դեմ է ուղղված»:

«Պաշտոնական Բաքուն հայտարարում է, թե այդ ռազմական տեխնիկան ուղղված է Հայաստանի դեմ. Սակայն ռազմական փորձագետների վերլուծությունները ցույց են տալիս, որ Ադրբեջանի կողմից ձեռք բերված ռազմական տեխնիկան ուղղված է կամ Իրանի, կամ Թուրքմենստանի դեմ, քանի որ Հայաստանը դեպի ծով ելք չունի: Այսպիսով Ադրբեջանի հականավային հրթիռները միայն ուղղված են Իրանի և Թուրքմենստանի դեմ»,-եզրափակում է իրանցի վերլուծաբանը:

Հիշեցնենք, որ նախօրեին բրիտանական «Սանդի թայմզ» պարբերականը, անդրադառնալով Ադրբեջանի տարածքից Իրանին հարված հասցնելու հավանականությանը, նշել էր. «Իսրայելի «Նեգև» անապատում տեղակայված ամերիկյան ռադարային համակարգերը մինչև 1600 կմ հեռավորության վրա ունակ են հայտնաբերել իրանական հրթիռների ռազմաբազաները և դրանց մասին տեղեկությունը 13 րոպեի ընթացքում փոխանցել Ադրբեջանում տեղակայված իսրայելական ՀՕՊ համակարգերին, որպեսզի մինչև իրանական հրթիռների արձակվելը Ադրբեջանի տարածքից կանխարգելիչ հարձակում կատարվի»:

Ի պատասխան «Սանդի թայմզ» պարբերականի հրապարակման՝ Ադրբեջանի ԱԳՆ-ն հայտարարել է, թե Բաքուն թույլ չի տա, որ իր տարածքն օգտագործվի Իրանի վրա ռազմական հարձակում գործելու համար:

Նախորդող տեղեկատվություն՝
«Սանդի թայմզ».Իրանական հրթիռների արձակման դեպքում Իսրայելն Ադրբեջանի տարածքից նախահարձակ կլինի

Իրանական կայք. Արդյո ՞ք Ադրբեջանի տարածքից Իրանի վրա ռազմական հարձակում կլինի

Իրանցի գեներալ. Ադրբեջանի Հանրապետությունը վերածվել է տարածաշրջանի ահաբեկիչների կենտրոնի