Ձեր վստահելի աղբյուրը

«Լեռնային Ղարաբաղի համակարտության կարգավորման գործընթացը լուրջ անհանգստություն է առաջացնում: Հույս ունեմ, որ արտգործնախարարները կհանդիպեն Դուբլինում և կկարողանան ընդհանուր լեզու գտնել, որպեսզի ԵԱՀԿ Մինսկի խմբի համանախագահների հետ միասին հանդես գան համատեղ հայտարարությամբ, և այդպիսով, առաջ շարժվեն»,- այս մասին «Ռիա Նովոստի» լրատվական գործակալությանը տված հարցազրույցում` անդրադառնալով Լեռնային Ղարաբաղի հակամարտության կարգավորման ԵԱՀԿ Մինսկի խմբի միջնորդությանն ու դերին, նշել է ԵԱՀԿ գլխավոր քարտուղար Լամբերտո Զանյերը:

Վերջինիս գնահատմամբ, Լեռնային Ղարաբաղի խնդրի բանակցային գործընթացում ստեղծված ներկա մթնոլորտում Հայաստանի և Ադրբեջանի արտգործնախարարների հանդիպումը շատ կարևոր է հակամարտության կարգավորման գործընթացին աջակցելու առումով՝ հաշվի առնելով Հայաստանում և Ադրբեջանում գալիք նախագահական ընտրությունները:

«Եթե խոսելու լինենք ապագայի մասին, ապա կողմերը պետք է քաղաքական կամք դրսևորեն, որպեսզի բանակցությունների միջոցով հասնեն խնդրի խաղաղ կարգավորմանը, ինչպես նաև արդեն ստանձնած պարտավորությունների արդյունավետ իրականացմանը: Նկատի ունեմ՝ հրադադարի ռեժիմի ամրապնդումը և շփման գծում տեղի ունեցող պատահարների հետաքննության մեխանիզմների ստեղծումը»,- ասել է Լ. Զանյերը:

ԵԱՀԿ գլխավոր քարտուղարի համոզմամբ, հայ-ադրբեջանական սահմանի շփման գծում լարվածության թուլացմանը և բանակցությունների համար լավագույն պայմանների ստեղծմանը կնպաստեր պարբերաբար իրականացվող մեխանիզմի ստեղծումը, որի շրջանակներում տեղի հրամանատարները կկարողանային միասին քննարկել անվտանգության գործնական հարցերը՝ լինեն դրանք զինված խմբերի տեղաշարժի, փոխհրաձգության կամ անվտանգությունը վտանգող այլ հարցեր:

«Այդ մեխանիզմը կնպաստեր նաև շփման գծում ապրող մարդկանց առօրյա կյանքի անվտանգության ապրապնդմանը: Կարող եմ բերել հակամարտությունների կարգավորման ԵԱՀԿ փորձի դրական օրինակներ, ինչպիսին է պատահարների կանխարգելման և դրանց արձագանքելու էրգնեթական մեխանիզմը, որը գործի է դրվել Վրաստանում 2008թ.-ի օգոստոսյան հակամարտությունից հետո»,- նշել է Լ. Զանյերը:

ԵԱՀԿ ղեկավարը կարևորում է նաև ԶԼՄ-ների ու քաղաքացիական հասարակության դերը հայ և ադրբեջանական հասարակությունների միջև շփումները զարգացնելու համար, որը, ըստ նրա, կարող է նպաստել այդքան անհրաժեշտ վստահության մթնոլորտի ձևավորմանը:

Նշենք, որ 1992թ-ից ի վեր ԼՂ հակամարտության կարգավորման բանակցություններն ընթանում են ԵԱՀԿ Մինսկի խմբի ձևաչափով, որի համանախագահներն են Ռուսաստանը, Ֆրանսիան և ԱՄՆ-ն: Մինսկի խմբի նպատակն է հակամարտութան խաղաղ կարգավորման բանակցությունների համար մշտական հարթակի ապահովումը՝ հիմնված ԵԱՀԿ-ի սկզբունքների և նրա առաջ ստանձնած պարտավորությունների վրա:

Հիշեցնենք նաև, որ Դեկտեմբերի 6-7-ը Իռլանդիայի մայրաքաղաքում կմեկնարկեն ԵԱՀԿ Նախարարների խորհրդի 19-րդ նիստի աշխատանքները, որին կմասնակցի ՀՀ արտգործնախարար Էդվարդ Նալբանդյանը: