Ձեր վստահելի աղբյուրը

ԵԱՀԿ Մինսկի խմբի համանախագահների ձևաչափը միակ համաձայնեցված ձևաչափն է, և այն մեկ այլ ձևաչափով փոխարինելու որևէ համաձայնություն գոյություն չունի: Այս մասին այսօր Դուբլինում Panorama.am-ի հետ զրույցում հայտարարեց ԵԱՀԿ գլխավոր քարտուղար Լամբերտո Զանյերը:

Բանն այն է, որ Դուբլինում Ադրբեջանի արտաքին գործերի նախարար Էլմար Մամեդյարովի և ԵԱՀԿ ԽՎ նախագահ Ռիկարդո Միլիորիի հանդիպման վերաբերյալ տարածված տեղեկատվության մեջ նշվել է, թե վերջինս հանդես է եկել Մինսկի խմբի անդամ երկրների ներկայացուցիչների հանդիպում կազմակերպելու նախաձեռնությամբ:

Այս առնչությամբ ԵԱՀԿ Գլխավոր քարտուղարից հետաքրքրվեցինք, թե ինչ մեկնաբանություններ կարող է տալ: Պարոն Զանյերին նախ հորդորեց մեկնաբանություններ ստանալ Ռիկարդո Միլիորիից, իսկ իր վերաբերմունքը ձևակերպեց այսպես.

«Մինսկի խումբը ներկայումս հակամարտության կարգավորմամբ զբաղվող միակ համաձայնեցված ձևաչափն է: Եթե կողմերը ուզեն փոխել ձևաչափը, նրանք կարող են համաձայնել, բայց այժմ ես չեմ տեսնում ձևաչափի փոփոխության որևէ համաձայնություն»: Այնուհետև հեգնանքով նշեց. «Իսկ եթե որևէ մեկը ուզում է փոխել, ինչ ասեմ, հաջողություն եմ մաղթում իրեն»:

Հարկ է նկատել, որ Մամեդյարով-Միլիորի հանդիպման վերաբերյալ տարածված հաղորդագրությունը բավականին ուշագրավ է: Բանն այն է, որ ԵԱՀԿ ԱԳՆ խորհրդի 19-րդ նիստի ընթացքում Panorama.am-ին հայտնի դարձավ, որ Ադրբեջանի պատվիրակությունը նախագահող երկրին՝ Իռլանդիային, դիմել է Դուբլինում Մինսկի խմբի անդամների հանդիպում կազմակերպել, սակայն այն բանից հետո, երբ Իռլանդիան հարցում է ուղարկել ԵԱՀԿ ՄԽ համանախագահ երկրներին, պարզվել է, որ Ադրբեջանը զբաղված է ինքնագործունեությամբ և բանակցություններով զբաղվելու փոխարեն բանակցությունների ձևաչափը փոխելու անօգուտ քայլեր է ձեռնարկում՝ անտեսելով միջնորդ երկրներին:

Այս առթիվ հնչած հարցին ի պատասխան, Իռլանդիայի արտաքին գործերի և առևտրի նախարար Իմոն Գիլմորը նախ չհերքեց, որ իսկապես նման բան տեղի է ունեցել, բայցևայնպես չնշեց ադրբեջանական նախաձեռնության տապալման պատճառները: Նա միայն խոսեց հակամարտության մասին և նշեց, որ վերջին շրջանի «մտահոգիչ զարգացումները ցույց են տալիս, որ հակամարտությունն անհրաժեշտ է լուծել»:

«ԵԱՀԿ դիրքորոշումն այն է, որ մենք սատարում ենք ԵԱՀԿ Մինսկի խմբին և խաղաղ գործընթացին»,- ասաց Իմոն Գիլմորը և կոչ արեց, որ «խնդիրը լուծելու համար բոլոր կողմերը համագործակցեն միմյանց և ԵԱՀԿ Մինսկի խմբի հետ»: Իր հերթին Լամբերտո Զանյերին նշեց, որ խնդրի կարգավորմանը ԵԱՀԿ-ն և մասնավորապես Մինսկի խմբի համանախագահ երկրները սատարում են, սակայն լուծումը պետք է գտնեն իրենք՝ կողմերը:

ԵԱՀԿ գործող նախագահողից ու գլխավոր քարտուղարից մեկնաբանություններ խնդրեցինք նաև Էդվարդ Նալբանդյանի այն հայտարարության վերաբերյալ, որ Ադրբեջանը ամեն կերպ փորձել է արգելափակել շփման գծում միջադեպերի հետաքննության մեխազնիմների ներդրամնը և անգամ սպառնացել է վետո կիրառել ԵԱՀԿ բյուջեի ընդունման նկատմամբ: Ի պատասխան Իմոն Գիլմորը կրկնեց այն, ինչ արդեն հայտարարել էր, իսկ ահա Լմաբերտո Զանյերին նշեց.

«Մենք մի շարք առաջարկներ ենք ներկայացրել, այդ թվում վստահության ամրապնդման ուղղությամբ, ինչպես օրինակ մշտական ներկայացուցչի լիազորությունների ընդլայնումը, դիպուկահարների հետքաշումը և այլն: Սակայն տարբեր պատճառներով կամ այս, կամ այն կողմը դժվարություններ է ունեցել այդ առաջարկներն ընդունելու առնչությամբ: Մենք չենք կարոզ կողմերին ստիպել որոշում ընդունել, դրա համար անհրաժեշտ է կողմերի քաղաքական կամքը»: