Ձեր վստահելի աղբյուրը

Ինչպես արդեն տեղեկացրել էինք, ԱՄՆ-ում նշվել է Լեռնային Ղարաբաղի Հանրապետության անկախության հանրաքվեի տարելիցը և միջոցառմանը Արցախից մասնակցել է ԼՂՀ ԱԳ նախարար Կարեն Միրզոյանը: Միջոցառումը կազմակերպվել էր Կոնգրեսի հայկական հարցերով հանձնախմբի համանախագահներ Էդ Ռոյսի, արտաքին կապերի հանձնաժողովի նորանշանակ նախագահ Ֆրանկ Փելոնի, ինչպես նաև ԱՄՆ-ում Հայաստանի դեսպանատան, ԼՂՀ ներկայացուցչության ու հայակական կազմակերպությունների ջանքերով:

«Ամերիկայի Ձայն» ռադիոկայանը, ի թիվս այլ լրատվամիջոցների, լուսաբանել է միջոցառումն ու առաձին հարցազրույցներ վերցրել միջացառմանը մասնակցած կոնգրեսականներից ու պատվավոր հյուրերից:

ԱՄՆ ներկայացուցիչների պալատի անդամ, Կալիֆորնիա նահանգից դեմոկրատ Ջեքի Շփեյերը ռադիոկայանի հետ զրույցում խորհրդանշական է անվանել Կապիտոլիումում ԼՂ անկախության հանրաքվեին նվիրված միջոցառման անցկացումը:

«Միացյալ Նահանգները աջակցում են ժողովրդավարությանը աշխարհի բոլոր երկրներում, և այսօր մենք նշում ենք ժողովրդավարական ևս մեկ կազմավորման 21- րդ տարելիցը: Շատ կարևոր է աջակցվել Միացյալ Նահանգների և Լեռնային Ղարաբաղի ժողովուրների մերձեցմանը: Մեր երկրի համար մեծ պատիվ է այստեղ, Կապիտոլիումում նշել այս տարելիցը», - ասել է Շպեյերը: (Տեսանյութ)

«Ամերիկայի ձայնին» տված բացառիկ հարցազրույցում ԼՂՀ ԱԳ նախարար Կարեն Միրզոյանը կարևորել է միջոցառման անցկացումը ԱՄՆ-ում:

«Սա հնարավորություն է մեզ համար ոչ միայն խոսել Լեռնային Ղարաբաղի մասին այստեղ, Ամերիկայի սրտում, այլև հարմար առիթ է մեր երախտիքի խոսքը փոխանցել բոլոր այն մարդանց ու կազմակերպություններին, ովքեր տարիներ շարունակ օգնում են պաշտպանելու և առաջ տանելու մեր շահերը այստեղ», - ասել է նախարար Միրզոյանը: (Տեսանյութ)


Կոնգրեսականներ Ֆրենկ Փելոնը, Ադամ Շիֆը, Դևիդ Չիչիլինեն, Էլիոթ Էնջելը նույնպես կարևորել են Արցախի ժողովրդի ազատությունն ու անկախությունը:

«Սահմանները, որ կամայականորեն գծել էր Ստալինը, բացահայտում են անարդարության այն աստիճանը, որը իրեն էր բնորոշ: Անհրաժեշտ է հասնել նրան, որպեսզի ներկայիս սահմաններն ազատություն ապահովեն Կովկասի ժողովուրդներին»,- ասել է Շերմանը: (Տեսանյութ)

Կալիֆորնիա նահանգից մեկ այլ կոնգրեսական Ադամ Շիֆը ևս մեկ անգամ իր մտահոգությունն է հայտնել ադրբեջանցի ոճրագործ Ռամիլ Սաֆարովին ներում շնորհելու և ազատ արձակելու որոշմա կապակցությամբ, ադրբեջանական իշխանությունների այդ քայլը որակելով որպես «արդարադատության ընտրովի կիրառման աղաղակող օրինակ»:
Այս համատեքստում կոնգրեսական նշում է, թե Միացյալ Նահանգները պետք է ընդունի` Ադրբեջանին տրված ռազմական օգնությունը իզուր է եղել:

Կոնգրեսական նաև կարևորել է Ստեփանակերտի օդանավակայանի բացումը, որը կխթանի Լեռնային Ղարաբաղի տնտեսական զարգացումը:
«Ես եղել եմ Արցախում և գիտեմ, թե ինչքան բարդ ու դժվար է այնտեղ հասնել: Արցախի օդանավակայանի վերաբացումը հնարավորություն կընձեռի տեղի ժողովրդին ոչ միայն առավել ազատ շփվել արտաքին աշխահի հետ, այլև կխթանի տարածաշրջանի տնտեսության զարգացումը: Սպառնալիքներն այն մասին, թե օդանավակայանի գործարկման դեպքում, կխփեն առաջին իսկ ինքնաթիռը, անհիմն են», - ասել է Շիֆը: (Տեսանյութ)

Կոնգրեսական Շերմանն, իր հերթին, կարծիք է հայտնել, թե ամերիկացի պաշտոնյաները ևս պետք է հնարավորություն ունենան օգտվել այդ օդանակավակայնից:
«Չեմ տեսնում որևէ օրինական պատճառ, որի համար պետք է այդ տարածաշրջանում արգելվի օդանավակայանի բացումը: Ճիշտ է, Բաքուն թույլ չի տվել այդ օդանավակայանի շինարարությունը, սակայն ինչո՞ւ Ադրբեջանը հանդես չի գալիս Արցախի տարածքում այլ շինությունների կառուցման դեմ», - ասել է Շերմանը: (Տեսանյութ)

Անկախության հանրաքվեի միջոցառմանը ներկա է գտնվել նաև Աննա Աստվածատրյանը, ով Բաքվի հայերի ջարդերի ականատեսն է եղել ու հեղինակել է «Դեպի ոչ մի տեղ. տարագրության պատմություն», » («Nowhere: A Story of Exile») գիրքը:
Նրա խոսքերով, իր կյանքը բաժանվում երկու փուլի՝ մինչ Բաքու և Բաքվից հետո, սակայն Լեռնային Ղարաբաղի ներկան իրեն ուրախություն է պարգևում:

«Արցախում ժողովրդավարությունը, տնտեսությունը ծաղկում է: Մարդիկ անվտանգ են: Ես հիանում եմ Արցախի ազատատենչ ժողովրդով և օգնելու եմ նրան ուժերիս ներածի չափով», - ասել է Աննա Աստվածատրյանը: (Տեսանյութ)