Ձեր վստահելի աղբյուրը

Հայաստանյան ներքաղաքական զարգացումների ու առջևում սպասվող զարգացումների շուրջ Panorama.am-ը զրուցեց ԱԺ նախկին նախագահ, ՀՀԿ Գործադիր մարմնի անդամ Սամվել Նիկոյանի հետ:

-Հաշվի առնելով, որ առջևում նախագահական ընտրություններ են, ինչպե՞ս կգնահատեք ներկայումս քաղաքական դաշտում ընթացող զարգացումները:

-Թևակոխում ենք նախագահական ընտրությունների նախընտրական ժամանակաշրջան և արդեն երևում են այն գործող անձինք, ովքեր պատրաստվում են մասնակցել նախագահական ընտրություններին: ՀՀԿ-ն արդեն իսկ հայտարարել է, որ իր թեկնածուն գործող նախագահն է, ինչի մասին պաշտոնապես կհայտարարվի դեկտեմբերի 15-ին կայանալիք համագումարի ժամանակ: Դեռևս պաշտոնական առաջադրումները չեն սկսվել, բայց մամուլից հայտնի է, որ առաջադրվելու ցանկություն ունեն Րաֆֆի Հովհաննիսյանը, Պարույր Հայրիկյանը, Վարդան Սեդրակյանը: Նաև խոսվում է Գագիկ ծառուկյանի առաջադրման մասին: Կարծում եմ՝ հետաքրքիր մրցապայքար է սպասվում:

-Ձեր կուսակիցները բավականին վստահ հայտարարում են, որ գործող նախագահի հաղթանակի հնարավորություններն ակնհայտորեն բարձր են, իսկ մնացած թեկնածուները պայքարելու են ընտրություններում երկրորդ տեղը գրավելու համար: Ինչպե՞ս կմեկնաբանեք նմանատիպ հայտարարությունները:

-Սահմանադրությամբ նախագահի ամենակարևոր ֆունկցիաներից է արտաքին քաղաքականության ընդհանուր ղեկավարումը, իսկ նախագահը նաև զինված ուժերի գերագույն գլխավոր հրամանատարն է: Իսկ առկա իրողությունների պայմաններում այս երկու գործոնները կրկնակի կարևորություն են ստանում: Այդ երկու գործոնն այնքան ծանրակշիռ են, որ կարծում եմ՝ ՀՀ յուրաքանչյուր քաղաքացի, ընտրող, մոտենալով ընտրախցիկին ամենից առաջ իրեն պետք է հարց տա. թեկնածուներից ո՞վ կարող է լինել զինված ուժերի գերագույն գլխավոր հրամանատարը: Իսկ պատասխանը ակնհայտ է:

-Պարոն Նիկոյան, ԲՀԿ պատվիրակությանը բրյուսելյան այցը մեծ աղմուկ առաջացրեց, բազմաթիվ մեկնաբանություններ եղան…

-Կարծում եմ, բավականաչափ ակտիվ լուսաբանվեց և դարակազմիկ այցելության տեսք տրվեց, բայց չեմ կարծում, թե ԲՀԿ-ի կողմից «Եվրոպայի հայտնագործումը» մարդկության զարգացման և ապագայի վրա կունենա այն նույն ազդեցությունը, ինչ Կոլումբոսի կողմից Ամերիկայի հայտնագործումը:

-Ի տարբերություն նախորդ՝ 2008 թվականի նախագահական ընտրությունների, երբ ընտրություններից 4-5 ամիս առաջ գրեթե հայտնի էին բոլոր հիմնական թեկնածուները, ներկայումս, երբ ընտրություններին 2.5 ամիս է մնացել ո՛չ ՀԱԿ-ը, ո՛չ ՀՅԴ-ն և ո՛չ էլ ԲՀԿ-ն իրենց թեկնածուի վերաբերյալ հստակություն չեն մտցրել: Ինչո՞վ է պայմանավորված այս հանգամանքը:

-Դա բացատրվում է անորոշությամբ, անվճռականությամբ և քաղաքական գործընթացին ոչ քաղաքական գործիքներով մասնակցությամբ: Իրոք, ես հասկանում եմ այն բարդ իրավիճակը, որում հայտնվել են շատ քաղաքական ուժեր և գործիչներ, այդ թվում՝ Գագիկ Ծառուկյանը: Բանն այն է, որ Ծառուկյանի շուրջ կան ուժեր և գործիչներ, որոնք ամեն ինչ անում են Ծառուկյանի առաջադրման համար: Իսկ նրանց հաշվարկը շատ պարզ է. Ծառուկյանի հաղթանակի դեպքում կշահեն նաև իրենք, իսկ հակառակ պարագայում, դառնության պտուղները կկրի միայն ԲՀԿ ղեկավարը, քանի որ այդ ուղղորդող ուժերն այլևս կորցնելու ոչինչ չունեն:

-Պարոն Նիկոյան, երբ ԲՀԿ-ն ամիսներ առաջ սկսեց ակնարկել սեփական թեկնածուով հանդես գալու հնարավորության մասին, ՀՀԿ-ականներն անընդհատ հղում էին անում 2011 թվականին, ՀՀԿ-ի, ԲՀԿ-ի և ՕԵԿ-ի կողմից ստորագրված կոալիցիոն հուշագրին, որում վերոնշյալ ուժերը պարտավորվում էին 2013 թվականին կայանալիք նախագահական ընտրություններում սատարել գործող նախագահի թեկնածությունը: Ինչպիսի՞ն է ԲՀԿ-ի կողմից սեփական թեկնածուով մասնակցելու վեաբերյալ Ձեր մոտեցումը:

-2013 թվականին կայանալիք նախագահական ընտրություններին գործող նախագահին սատարելու վերաբերյալ կոալիցիոն հուշագրի տակ ԲՀԿ-ի կողմից դրված ստորագրությունը ու այսօրվա իրողությունները խոսում են ԲՀԿ կարգախոսի ոչ կենսունակ լինելու մասին:

Կարծում եմ, որ նախագահական ընտրություններից հետո երկու հստակ սկզբունքային հարցեր լուծված կլինեն: Առաջինը, որ նախագահը կանցնի իր երկրորդ պաշտոնավարման ժամանակահատվածին և զերծ կլինի նախընտրական թե´ պառլամենտական, թե´ նախագահական պայմանականություններից և սպասվող հինգ տարին ինքն ամբողջությամբ կտրամադրի բարեփոխումները նոր որակով ու նոր մակարդակով անցկացնելու գաղափարին: Երկրորդը, նախագահական ընտրություններից հետո վերջ կտրվի քաղաքական պրոցեսների մեջ արհեստածին և ոչ քաղաքական գործընթացներին, իսկ քաղաքական գործընթացները կվերադառնան իրենց բնականոն հուն: