Ս. Մինասյան. Ադրբեջանը գումարներ է ծախսում տպավորություն ստեղծելու համար

Քաղաքական 12:33 11/12/2012

Ս. Մինասյան. Ադրբեջանը գումարներ է ծախսում տպավորություն ստեղծելու համար

«Դումբլինում կայացած ԵԱՀԿ նախարարների հանդիպման ժամանակ ԵԱՀԿ ՄԽ համանախագահների և ընդհանրապես միջազգային հանրության կողմից արված հերթական ուղերձները` կապված ԼՂ կարգավորման գործընթացի հետ, հերթական անգամ հաստատեցին այն կարծիքը, որ Հայաստանի մոտեցումները շատ հարցերում համահունչ են միջազգային հանրության կարծիքին` առնվազն ռազմական գործողությունների չվերսկսման և մադրիդյան սկզբունքների` որպես բազային փաստաթղթի ընդունման հարցերում»,- այսօր անդրադառնալով ԵԱՀԿ նախարարների 19-րդ հանդիպմանը, լրագրողների հետ զրույցում ասաց քաղաքագետ, Կովկասի ինստիտուտի փոխտնօրեն Սերգեյ Մինասյանը:

Նա նաև կարծիք հայտնեց, որ ԵԱՀԿ նախագահությունն ստանձնած Ուկրաինան բավականին ռեալիստական մոտեցումներ ունի նշված հարցում և բավականին քաջատեղյակ է ԵԱՀԿ տարածքում գտնվող կոնֆլիկտներին սպեցիֆիկային:

Քաղաքագետն անդրադարձավ նաև 2015 թվականին Ադրբեջանի տարածքում կազմակերպվելիք` Համաեվրոպական խաղերին և նշեց. «Կարծում եմ, սա շատ դրական զարգացում կլինի տարածաշրջանային համատեքստում, որովհետև հերթական անգամ Ադրբեջանի իշխանությունները փորձում են նավթային գումարներն ավելի շատ ծախսել ոչ թե ԼՂ կոնֆլիկտի շուրջ, այլ այն տպավորության ստեղծման, ըստ որի, իբր` Ադրբեջանն արագ, դինամիկ զարգացող երկիր է»:

Բանախոսն այս հանգամանքը կարևորում է նրանով, որ դա իր հերթին կնվազեցնի պատերազմի հնարավորությունը և իրական զարգացումներ էլ տեղի չեն ունենա:

Խոսելով Վրաստանում տեղի ունեցող ներքաղաքական գործընթացների մասին, Ս.Մինասյանն ասաց. «Շուտով սպասվում է Իվանիշվիլիի հատուկ ներկայացուցչի և Ռուսաստանի փոխարտգործնախարար Կարասինի միջև հանդիպում: Սա փաստացի առաջին հանդիպումն է լինելու Ռուսաստանի և Վրաստանի նոր իշխանությունների միջև, որը, կարծում եմ հետաքրքիր զարգացումներ կբերի»:

Բանախոսի համոզմամբ, ռուս-վրացական շփումների վերականգնումը կարևոր է թե տարածաշրջանի, թե Հայաստանի համար:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: