Ձեր վստահելի աղբյուրը

«Հայակ» ազգային կինոյի երկրորդ մրցանակաբաշխությունը տեղի կունենա 2013 թ. ապրիլի 13-ին Ալ. Սպենդիարյանի անվան օպերայի և բալետի ազգային ակադեմիական թատրոնում: Այս մասին ասուլիսում հայտարարեց Հայաստանի ազգային կինոկենտրոնի տնօրեն Գևորգ Գևորգյանը:

Հիշեցնենք, որ «Հայակ» առաջին մրցանակաբաշխությունը կայացել է նախորդ տարի, այն հայ կինեմատոգրաֆիստների աշխատանքների ամենամյա ստեղծագործական բաց մրցույթ է, կազմակերպիչներն են Ազգային կինոյի զարգացման հիմնադրամը, «Orange Armenia» ընկերությունը և Հայաստանի ազգային կինոկենտրոնը:

Այս տարի մրցանակաբաշխությանը միացել է նաև Հայկական ազգային կինոակադեմիան: Մրցանակաբաշխությունը միտված է խթանելու ու զարգացնելու ազգային կինոարտադրությունը, նոր անունների բացահայտմանը, հայ հանդիսատեսին կինոթատրոններ վերադարձնելուն, երկրի կինոգործիչներին համախմբելուն, կինոնախագծերին օժանդակելուն, ազգային կինոարտադրության լավագույն ավանդույթները պահպանելուն:

Հայկական ազգային կինոակադեմիայի նախագահ Դավիթ Մուրադյանը հայտնեց, որ 2013 թ. «Հայակ» ազգային կինոյի մրցանակաբաշխությանը կարող են մասնակցել 2011 թ. արտադրված այն ֆիլմերը, որոնք չեն մասնակցել նախորդ մրցույթին և այս 2012 թ. արտադրված բոլոր ֆիլմերը` առանց ժանրային սահմանափակումների: Մրցույթը ունենալու է 15 անվանակարգ, այդ թվում լավագույն արտասահմանյան ֆիլմ: Այս անվանակարգում կարող են ներկայացվել միայն 2012 թ. արտերկրում արտադրված ֆիլմերը: Բացի հիմնական անվանակարգերից, շնորհվելու են նաև հատուկ մրցանակներ` հայկական կինոյի զարգացման գործում վաստակի համար:

Ժյուրին կազմված է լինելու 13 անդամից: Քվերակությունը գաղտնի է լինելու:
Մրցույթին մասնակցելու հայտերը ընդունվելու են դեկտեմբերի 20-ից մինչև 2013թ. փետրվարի 15-ը, այնուհետև կկազմակերպվի ներկայացված ֆիլմերի նախնական դիտում, կընտրվի լավագույն ֆիլմերը, մարտի 19-ից մինչև ապրիլի 11-ը մրցութային հանձնաժողովը կկազմակերպի ընտրված ֆիլմերի վերադիտում: Ապրիլի 12-ին մրցութային հանձնաժողովը կհրավիրի նիստ, որի ընթացքում հայտնի կդառնան 2013 թ. «Հայակի» հաղթողները, կհայտարարվեն ապրիլի 13-ին:

Դ. Մուրադյանն ասաց, որ «Հայակը» կարևոր առաքելություն ունի ու հնարավորություն կտա հասկանալ, թե «ինչ կինո ունենք այսօր, ինչ հեռանկարներ ունենք, նպատակներ»:

«Օrange Armenia» ընկերության գլխավոր տնօրեն Ֆրանսիս Ժելիբտերն ասաց, որ գործընկերների հետ հիմք են դրել բավականին լավ ավանդույթի ու հույս հայտնեց, որ «Հայակ» 2013-ը պետք է ավելի հաջող լինի: «Ուրախ ենք, որ երկրորդ տարին է մեր ընկերությունը կինոմրցանակաբաշխության գլխավոր աջակիցն է ու նախաձեռնողներից է: Կինոն ոչ միայն Հայաստանում, նաև «Օրանժի» բոլոր երկրերում մշտապես գտնվում է մեր ընկերության ուշադրության կենտրոնում ու մշտապես աջակցում ենք»,- ասաց Ֆ. Ժելիբտերը:

Ի դեպ, Դավիթ Մուրադյանը հիշեցրեց, որ 1923 թ. ընդունված դեկրետով հիմնադրվել է հայկական ֆիլմարտադրության առաջին կազմակերպությունը, ու «Հայակ» 2013-ը, նրա խոսքով, ազդարարելու է հայկական կինոարտադրոթյան 90-ամյակը: