Ձեր վստահելի աղբյուրը

«Հայոց արծիվներ» հայրենասիրական հասարակական կազմակերպությունը, որն արդեն 300-ից ավելի մասնաճյուղ-գրասենյակներ ունի Հայաստանի բոլոր մարզերում, առաջիկա երկու ամիսներին բավականաչափ աշխատանք ունի անելու գալիք նախագահական ընտրությունների նախընտրական քարոզչության շրջանում: Այս մասին Panorama.am-ին ասաց կազմակերպության առաջնորդ, ՀՀԿ-ական թիվ մեկ արծիվ` Խաչիկ Ասրյանը. վերջինս ևս մասնակցում էր Հանրապետական կուսակցության արտահերթ համագումարին.

-Պարոն Ասրյան, ԲՀԿ առաջնորդի որոշումից հետո քաղաքական դաշտում, կարծես, թե գերիշխող է այն գնահատականը, որ ՀՀԿ առաջնորդ Սերժ Սարգսյանը գալիք նախագահական ընտրություններում մնաց առանց լուրջ մրցակցի:
-Անձամբ ինձ և «Հայոց արծիվներ»-ին երբեք չի հետաքրքրել, թե ով կամ ովքեր պետք է առաջադրվեն 2013թ-ի նախագահական ընտրություններում որպես թեկնածու: Այնպես որ` ԲՀԿ հայտարարությունը չառաջադրվելու հետ կապված, ինչպես և այլ կուսակցությունների հայտարարությունները ինչ-որ մարդկանց թեկնածությունների առաջադրման մասով ինձ չեն հետաքրքրել ու այժմ առավել ևս չեն էլ հետաքրքրում: Մենք` ես ու «Հայոց արծիվները» այս պայքարում արդեն հաղթել ենք:

-Այսինքն` անգամ եթե «Բարգավաճ Հայաստանը» թեկնածու ունենար…
-Ես վստահ եմ, որ նախագահական ընտրություններում, անկախ թեկնածուների քանակից, տեսակից ու որակից գործող նախագահ Սերժ Սարգսյանը բացարձակ հաղթանակ է տանելու, այդ թվում նաև եթե «Բարգավաճ Հայաստան» կուսակցությունը թեկնածուով հանդես գար: Այնպես որ և Հանրապետական կուսակցությունը, և «Հայոց արծիվերն» աչքերն առանց թարթելու առաջ են ընթանում իրենց առջև դրված ծրագրերն ու խնդիրները լուծելու և կյանքի կոչելու:

-Դեռևս իր վերջնական որոշման մասին չի հայտարարել ՀԱԿ-ը, ընդ որում այս կոնտեքստում շրջանառվում է Լևոն Տեր-Պետրոսյանի` իբրև թե ՀԱԿ միակ նախագահի թեկնածուի անունը: Եթե ՀԱԿ-ը թեկնածու առաջադրի, նախընտրական պատկերն ու պայքարը ի՞նչ ուղղություն կունենա, ինչ-որ բան կփոխվի:
-Իհարկե ոչ: Ես կողջունեմ, եթե ՀԱԿ-ը որևէ մեկի թեկնածությունը առաջադրի, քանի որ սա կփաստի ՀԱԿ-ի կործանման վերջը:

-«Հայոց արծիվները» արդեն 300-ից ավելի գրասենյակներ ունի հանրապետությունով մեկ, սա նշանակում է, որ առաջիկա երկու ամիսներին այդ ողջ ռեսուրսը ներդնելու եք նախագահակն քարոզարշավում:
-Նախ ասեմ, որ մեր կազմակերպությունը իր եռամյա գործունեության ժամանակահատվածում միշտ եղել է նախագահ Սերժ Սարգսյանի կողքին, քանի որ մենք ոչ միայն հասարակական, ռազմահայրենասիրական գործունեություն ենք ծավալում, այլև քաղաքական` համապետական ընտրություններում ակտիվ մասնակցություն ունենալով: Այո, հանրապետության 29 քաղաքային և 271 գյուղական համայնքներում հիմնադրել ենք գրասենյակ-մասնաճյուղեր, այդ թվում և հեռավոր սահմանամերձ համայնքներում: Եվ մեր հիմնական գերնպատակը եղել է մեր կողմից որդեգրած ազգային-պետական հայրենասիրական գաղափարախոսությունը, ինչպես նաև` «հայոց նախագահ, ազգային բանակ, հայոց պետականություն» եռամիասնության դերն ու նշանակությունը մտցնել Հայաստանի յուրաքանչյուր ընտանիք:

Մենք շատ լավ գիտակցում ենք, որ նախագահական ընտրությունները ապագա հինգ տարիների մեր ժողովրդի բարեկեցությունն ապահովող գործընթաց են, այդ իսկ պատճառով երեսուն հազարից ավելի անդամ ունեցող կազմակերպությունը չէր կարող անմասն մնալ քաղաքական այս իրադարձությունից:

 Նախորդիվ` Կ.Կարապետյան. ՀԱԿ-ի թեկնածուն փոփոխություն չի բերի

Բլից. Տիգրան Արզաքանցյանը «էկոնոմիչեսկի» տուժել է պատգամավորության ժամանակ

Մարտենս. Ես կասկած չունեմ, որ երկու ամիս հետո հայ ժողովուրդը ճիշտ ընտրություն կանի

Մեդվեդևի ուղերձը. Համագումարին մաղթում եմ բարեհաջող աշխատանք, իսկ եղբայրական Հայաստանին` ամենայն բարիք

Չինաստանի կոմկուսի ներկայացուցիչ. ՀՀԿ-ն կարևոր ներդրում ունի Հայաստանի ազգային կայունության գործում

Օրակարգի միակ հարցը` առաջադրել ՀՀ նախագահի թեկնածու