Ձեր վստահելի աղբյուրը

Ներքաղաքական զարգացումների, առաջիկա նախագահական ընտրությունների, քաղաքական դաշտի բևեռվածության և այլ թեմաների շուրջ Panorama.am-ը զրուցեց ՀՀԿ խմբակցության քարտուղար Հովհաննես Սահակյանի հետ:

-Պարոն Սահակյան, ինչպե՞ս կգնահատեք ներքաղաքական ներկայիս իրավիճակը, ի՞նչ շեշտադրումներ արեց նախագահ Սերժ Սարգսյանը իր վերջին ելույթում այս կոնտեքստում:

-Նախագահի և բոլոր ելույթները, և message-ները ավելի համակարգային, ամբողջական բնույթ են կրում. բացառություն չէր նաև Սերժ Սարգսյանի ելույթը ՀՀԿ անցած համագումարում: Նախագահի ելույթում շեշտադրումները վերաբերում էին բոլոր ոլորտներին` սկսած ներքաղաքականից մինչ արտաքին քաղաքականություն:

-Նախագահը միշտ շեշտադրել և շեշտադրում է հանդուրժողականությունը ներքաղաքական դաշտում...

-Նայենք ինչ իրավիճակ էր, օրինակ, 2008թ-ին և ինչ իրավիճակ է այսօր: Պետք է կոչ անենք այն քաղաքական ուժերին ու գործիչներին, որոնք ներքաղաքական դաշտում ունեն որոշակի դերակատարում, որպեսզի այդ հանդուրժողականության դրսևորման մեջ գտնեն նաև իրենց չափաբաժինը, որպեսզի այս ընտրություններն անցկացնենք ժողովրդավարության սկզբունքներին համահունչ: Հանդուրժողականությունը պետք է լինի մեր գործելաոճի հիմնաքարը, որովհետև անգամ չլուծվող խնդիրները դրա պայմաններում հնարավոր է լուծել:

-Ինչ եք կարծում` ՀՀԿ-ի թեկնածուն լուրջ մրցակից ունի՞:

-Ես հարցը դիտարկում եմ այլ հարթության մեջ: Նախագահ Սարգսյանն իր ելույթում անդրադարձավ Ղարաբաղյան հակամարտությանն ու շեշտադրում արեց` Արցախի հիմնախնդիրը պետք է հանգուցալուծվի միմիայն և բացառապես Արցախի ժողովրդի մասնակցությամբ, այսինքն` իրենք են որոշում իրենց ճակատագիրը: Եվ սա այդ ելույթի կարևորագույն ուղերձներից մեկն էր: Ինչո՞ւ եմ սա մեջբերում, որովհետև իբրև ՀՀ քաղաքացու` ընտրություն կատարելու ժամանակ իմ աչքի առաջ պետք է լինի Արցախի հիմնախնդիրը, այն է` ո՞ր քաղաքական գործիչն է, որ առաջադրվելով կարող է այդ խնդիրը տանել հանգուցալուծման: Եվ ոչ թե միայն հանգուցալուծելու համար: Ամեն ինչ ավելի քան պարզ է և կարծում եմ այստեղ երկրորդ կարծիք լինել չի կարող:
Եվ եթե կան քաղաքական ուժեր, որոնք չեն առաջադրվել ու դա հստակ չեն պարզաբանել, ապա, կարծում եմ, այս տեսանկյունից կարելի է որոշակի եզրակացություն անել: Հիշենք նախագահի` «ունենալու ենք ապահով երկիր» շեշտադրումը, որն իր մեջ ներառում է շատ ասպեկտներ, որոնք պակաս կարևոր չեն արտաքին մարտահրավերներից` աղանդների ներթափանցում, տարբեր արժեքների խեղաթյուրում և այլն: Այս ամենը մտնում է այդ «ապահով երկիր» գաղափարի մեջ: Իսկ եթե կան մարդիկ, որ կարող են տանել երկիրը այդ ուղղությամբ, ապա նրանք անպայման պետք է ուժերը փորձեն` ժողովրդի դատին ներկայացնելով իրենց պատկերացումներն ու ծրագրերը, և մենք միայն ու միայն ուրախ կլինենք, որ գաղափարական այդ ծրագրերի դաշտում կկարողանանք պայքարել և մրցել:

-Որոշ վերլուծաբանների գնահատականով` այս փուլում երկրի ղեկավարի փոփոխությունը Հայաստանը մի քանի տասնամյակ հետ կշպրտի: Որպես ՀՀԿ-ական թերևս համամիտ եք այս տեսակետի հետ..

-Ես ոչ միայն համամիտ եմ, այլև ավելացնեմ հետևյալը` այս ընտրությունները «հարամելը» առնվազն դավաճանություն է: Նաև եսակենտրոնություն և կուսակցական կամ ներքին քաղաքական շահերով առաջնորդվելու դրսևորում, որովհետև, և մենք այդ մասին բազմիցս հայտարարել ենք, այս ընտրությունները պետք է անցկացնենք «ևս մեկ քայլ առաջ» սկզբունքով: Այն նշաձողը, որը նշմարել ենք, դրանից պետք է առաջ անցնենք, որովհետև դա է միջազգային հանրության պահանջը` ԱՄՆ-ի, ՌԴ-ի և այլն: Մեր երկիրը սրընթաց, թռիչքաձև աճ կունենա, եթե կարողանանք անցկացնել լեգիտիմ ընտրություններ:
Իսկ եթե մարդիկ կան, ովքեր նույնիսկ մասնավոր զրույցներում փորձում են ամեն ինչ անել, որպեսզի սևացնեն այս գործընթացը, ես պետք է հիասթափեցնեմ նրանց` մենք վճռական ենք և պետք է այս ընտրությունները իսկապես անցկացնենք բարձր մակարդակի վրա:

-Ձեր խոսքի մեջ նշեցիք իրավիճակը «հարամող» ուժերի մասին, կմասնավորեցնե՞ք: Եվ արդյո՞ք կան այնպիսի ուժեր, որոնց գործունեությունը կարող է լուրջ դերակատարում ունենալ:

-Քաղաքական ուժերի տարիների գործունեությունից է ձևավորվում այդ կարծիքը: Օրինակ, Դաշնակցությունը մինչ օրս հստակ դիրքորոշում չի հայտնել, բայց մենք չենք կարող անգամ մտածել, որ ՀՅԴ-ն կհարամի. նրանք գտնվում են մեկ այլ հարթության մեջ: Այլ ուժեր էլ կան, որոնք իրենց դրսևորումների մեջ թեև այդքան ակտիվ չեն, բայց նույնը կարելի է ասել իրենց մասով: Եվ կան ուժեր, սակայն թույլ տվեք անունները չհնչեցնեմ, որոնց գործունեությունն ու բոլոր քայլերը միտված են միայն այդ հարամելուն: Եվ սա այն պատճառով, որ այլ անելիք չունեն, եթե իրենք գիտեն, որ չեն ընտրվելու ու չեն վերարտադրվելու ու միաժամանակ զգում են, որ ժողովուրդը նրանց չի հավատում` նրանց մնում է միայն հարամելը:

-Պարոն Սահակյան, իսկ ի՞նչ էր «Բարգավաճ Հայաստանի» հայտարարությունը` հարամելու կատեգորիայի տակ է ընկնում, թե հակառակը, ԲՀԿ-ն որոշակիորեն հստակեցրեց ու պարզեցրեց դաշտը կարևորագույն իրադարձության նախաշեմին:

-Որպես ՀՀԿ խորհրդի անդամ, պատգամավոր ես դա դիտարկում եմ իբրև քաղաքական թիմի ինչ-որ հայտարարություն: Թե դրանից այդ կուսակցության վստահության քվեները կավելանան-կպակասեն` իրենց խնդիրն է, որովհետև ժողովուրդը տալիս է գնահատականը քաղաքական ուժերին: Եթե ժողովուրդը ունեցել է մեծ հույսեր, որ կառաջադրեն ու կոնսուլտացիաների արդյունքում ասել են թեկնածու առաջադրեք և կամ այդ ուժն ունի, ինչպես իրենք են ասում, 500 հազարից ավելի ընտրողներ և այլն, դա բացառապես իրենց խնդիրն է: Եվ եթե նրանք մութ խաղերի մեջ են` դա նույնպես ԲՀԿ-ի խնդիրն է, քանի որ մենք ընդամենը ասում ենք հետևյալը` մասնակցեք այս գործընթացին միայն «հանուն»-ի և երբեք «ընդդեմ»:

-Իսկ դաշտի հստակեցո՞ւմը: Համամիտ չեք, որ ԲՀԿ-ն այսպիսով որոշ քաղաքական ուժերի, մասնավորապես ՀԱԿ-ին դրդեց կոնկրետ գործողությունների ու նաև պատասխանատվության բեռը թողեց նրանց ուսերին:

-Այո, համամիտ եմ, որ կայինն ուժեր դաշտում, որոնք սպասում էին ԲՀԿ-ի հայտարարությանը: Այլ խնդիր է, որ ես դա դիտարկում եմ որպես, կրկնում եմ, բացառապես իրենց խնդիրը: Բայց կան քաղաքական ուժեր և վերջին խժդժություններն էլ դա ապացուցեցին, որ սպասում էին այդ հայտարարությանը, որպեսզի դրանից հետո միայն իրենց քայլերի հաջորդականությունը որոշեն:
Սրա մասին է վկայում նաև այն փաստը, որ առաջադրումներին մնացել է ընդամենը մեկ շաբաթ ժամանակ, բայց դեռևս նշմարվող, մեսիջային թեկնածու այդ քաղաքական թիմերում չկա:

-Իսկ Դուք ակնկալո՞ւմ եք, որ Լևոն Տեր-Պետրոսյանը կառաջադրվի:

-Մենք ակնկալում ենք առողջ առաջադրում, անկախ նրանից, թե ով կլինի և ակնկալում ենք առողջ մրցակցություն ու ընտրապայքար: Եվ ոչ թե այն տեքստեր, ելույթներ ու հայտարարություններ, որոնց մենք ականատեսն ենք լինում թե ԱԺ ամբիոնից, թե մամուլի ակումբներում և թե այս կամ այն սրճարաններում:

-Սոցիալական ցանցերում ԲՀԿ-ի հայտարարությունն ընդունվեց ոչ միանշանակ, անգամ եղան այս կարգի մեկնաբանություններ` «կարելի է Սերժ Սարգսյանին շնորհավորել առաջին փուլով հաղթանակ տանելու կապակցությամբ»:

-Մենք երբեք իրադարձություններից առաջ չենք ընկել: Իհարկե մենք բավականին վստահ ենք մեր թեկնածուի և հեղինակության, և փորձառության, և իմ կողմից մատնանշած կարևորագույն հարցերի առումով ժողովրդի վստահության վրա: Մենք վստահ ենք նաև, որ կարող ենք ընտրությունները տանել վստահելի հաղթանակի, բայց մենք երբևէ առաջ չենք ընկել: Եվ անկախ նրանից ով կառաջադրվի, ով չի առաջադրվի, մենք, պարզ է, ունենք մեր նախընտրական ծրագիրը և գործողությունների հաջորդականությունը և շարժվելու ենք դրանով: