Ձեր վստահելի աղբյուրը

«Հարավային Կովկասի անվտանգությանը լրջագույն սպառնալիք է շարունակում մնալ Լեռնային Ղարաբաղի հակամարտության կարգավորման հարցում Ադրբեջանի ունեցած ապակառուցողական դիրքորոշումը»,- այսօր Մոսկվայում ՀԱՊԿ խորհրդի նիստում ունեցած ելույթում նշել է ՀՀ նախագահ Սերժ Սարգսյանը:

Panorama.am-ի թղթակցի փոխանցմամբ՝ հանրապետության ղեկավարը մասնավորացրել է, որ այդ ապակառուցողականությունը դրսևորվում է կարգավորման գործընթացի տրամաբանությանը հետևելու՝ ադրբեջանական իշխանությունների ցանկության բացակայության կամ անկարողության մեջ:
Նախագահը հիշեցրել է, որ այդ տրամաբանությունը «բավականին հստակ նկարագրված է ԵԱՀԿ Մինսկի խմբի համանախագահ երկրների՝ Ռուսաստանի, ԱՄՆ-ի և Ֆրանսիայի նախագահների հայտարարություններում»:

«Անգամ ձեռքբերված պայմանավորվածությունները՝ միջադեպերի հետաքննության մեխանիզմի ստեղծումը և դիպուկահարների դուրսբերումը, պաշտոնական Ադրբեջանի կողմից տորպեդահարվում են»,- նշել է ՀՀ նախագահը: 

«Մենք հավատացած ենք, որ գոյություն ունեցող հակամարտությունների դեպքում միակ և այլընտրանք չունեցող ուղին բանակցություններն են: Համարում ենք, որ կողմերի միջև հաստատված զինադադարից հետո ռազմական գործողությունների վերսկսումը, հատկապես, երբ այն պահպանվում է արդեն տասնութ տարի, և անգամ այդ գործողությունները սկսելու սպառնալիքը միջազգային իրավունքի նորմերի և սկզբունքների ուղղակի խախտում է: Դա դեպի նոր պատերազմ, բռնություն, ատելություն ու արյունահեղություն տանող ամենաանհեռատես ճանապարհն է: Խնդիրներն այդպես չեն լուծվում, այլ ընդամենը ավելի են բարդանում»,- նշել է ՀՀ նախագահը:

Իր խոսքում նախագահ Սարգսյանն անդրադարձել է Ադրբեջանում հակահայկական քարոզչությանն ու դրա հետևանքներին. «Ադրբեջանական ագիտպրոպը մի ամբողջ սերունդ դաստիարակում է այլատյացության ու անհանդուրժողականության մթնոլորտում: Իմ խոսքերի հավաստումը վախկոտ ու փոքրոգի մարդասպանի անվան շուրջ հերոսի կերպարի կերտումն է, ով Հունգարիայի իշխանությունների կողմից արտահանձնվել էր Բաքվին: Նա անմիջապես ներում ու արտահերթ զինվորական կոչում ստացավ՝ միաժամանակ միանվագ ստանալով հունգարական բանտում անկացրած տարիների համար նախատեսված աշխատավարձը: Այսպիսով, այսուհետ Ադրբեջանում հայի սպանությունը հանցագործություն չի համարվում: Եվ սա 21-րդ դարում՝ ՄԱԿ Անվտանգության խորհրդի անդամ երկրում»:

«Ադրբեջանը շարունակում է ռազմատենչ քաղաքականությունը: Այն սանձազերծում է սպառազինությունների տարածաշրջանային մրցավազք և թշնամանք է քարոզում: Ադրբեջանի նախագահը հրապարակավ հայտարարում է, որ աշխարհի բոլոր հայերն Ադրբեջանի թշնամին են, իսկ Երևանը, որ շուտով տոնելու է հիմնադրման 2800-ամյակը, հնագույն ադրբեջանական հող է: Նա հայտարարում է, որ զինադադարի ռեժիմի խախտումը վարքի նորմ է, քանի որ պատերազմը դեռ ավարտված չէ՝ մոռանալով այն մասին, թե ով էր խնդրում ու առաջինը ստորագերց այդ զինադադարը»,- նշել է հանրապետության նախագահը: