Ձեր վստահելի աղբյուրը

Գալիք նախագահական ընտրություններում հանրության 49 տոկոսը պատրաստվում է քվեարկել ՀՀ գործող նախագահ, ՀՀԿ թեկնածու Սերժ Սարգսյանի օգտին, 21 տոկոսն իր ձայնը կտա «Բարգավաճ Հայաստան» կուսակցության առաջնորդ Գագիկ Ծառուկյանին, 5 տոկոսը կընտրի ՀՀ նախկին նախագահ Ռոբերտ Քոչարյանին, ընդ որում տոկոսային առումով վերջինս նույն համակրանքին է արժանացել, ինչ «Ժառանգության» թեկնածու Րաֆֆի Հովհաննիսյանը: Այս մասին հայտարարվեց այսօրվա ասուլիսում, որն ամփոփում էր «Արմնյուզ»-ի նախաձեռնությամբ և Հայկական սոցիոլոգիական ասոցիացիայի ու Բալթյան հետազոտությունների՝ Gallup կազմակերպության կողմից իրականացված նախընտրական հարցումները:

Նշենք, որ նախագահի հավանական թեկնածուների թվում Հայաստանի քաղաքացիները պատրաստ են տեսնել, ավելին` պատրաստ են ձայն տալ նաև այլ թեկնածուների, մասնավորապես ՀՅԴ-ական Վահան Հովհաննիսյանին, ում օգտին պատրաստ է քվեարկել հարցվածների 3 տոկոսը, ՕԵԿ առաջնորդ Արթուր Բաղդասարյանին` վերջինիս իր համակրանքը պատրաստ է արտահայտել հարցվածների 2 տոկոսը և  ՀՀ նախկին արտգործնախարար, ԲՀԿ-ական Վարդան Օսկանյանին: Օսկանյանը, սակայն, միայն մեկ տոկոս ձայն ունի այսօրվա դրությամբ:

Բացի նրանից, որ հարցումների շրջանակում ՀՀ քաղաքացիները հայտնել են իրենց որոշումը գալիք նախագահական ընտրություններում այս կամ այն թեկնածուին ընտրելու կոնտեքստում, հարցվածները հայտնել են նաև, թե ում չէին ընտրի: Այս շարքում առաջատարը ՀՀ առաջին նախագահ Լևոն Տեր-Պետրոսյանն է, ում հարցվածների 39 տոկոսը «երբեք չի ընտրի»: Այնուհետ այս շարքում տեղ է գտել «Օրինաց երկրի» նախագահ Ա.Բաղդասարյանը, ում չի ընտրի հարցվածնեի 16 տոկոսը, երրորդ տեղում ՀՀ երկրորդ նախագահ Ռ.Քոչարյանն է իր 12 տոկոսով: Գործող նախագահ Սերժ Սարգսյանին չի ընտրի հարցվածների միայն 11 տոկոսը, Գագիկ Ծառուկյանին չի ընտրի միայն 4 տոկոսը:

Ի դեպ նշենք, որ հարցումն անցկացվել է այն ժամանակահատվածում, երբ ՀԱԿ-ը դեռևս չէր կողմնորոշվել 2013-ի ընտրություններում թեկնածու առաջադրելու հարցում: Այն պահին, երբ «Մարիոթ» հյուրանոցում ներկայացվում էին դրա տվյալները, «Ազատություն» կուսակցության նախագահ, ՀԱԿ խմբակցության անդամ Հրանտ Բագրատյանը facebook-յան իր էջում հանրությանը տեղյակ պահեց, որ պատրաստվում է առաջադրվել, այնպես որ ավելի քան ակտռուալ է հարցումների այն հատվածը, որ վերաբերում է կոնկրետ այս գործչին. հարցվածների 3 տոկոսը երբեք չի ընտրի Հ.Բագրատյանին:

Հարցվածների 72 տոկոսը դրական վերաբերմունք ունի ԲՀԿ առաջնորդի նկատմամբ, 61 տոկոսը դրական են տրամադրված գործող նախագահ Սերժ Սարգսյանի նկատմամբ, 49-ը տոկոսը այս հարցին պատասխանելով հիշատակել են Ռոբերտ Քոչարյանին, 43-ն` վարչապետ Տիգրան Սարգսյանին: Բարձր է ցուցանիշը նաև «Ժառանգության» առաջնորդի մոտ` հարցվածների 43 տոկոսը հիշատակել է Ր.Հովհաննիսյանին, իսկ 34 տոկոսն էլ Վ.Օսկանյանին:

Ի դեպ, ինչ վերաբերում է ԲՀԿ առաջնորդի հայտնի հայտարարությանն ու նախագահական ընտրություններում չառաջադրվելու որոշմանը, ապա ասուլիսի բանախոսները նշեցին, որ Գ.Ծառուկյանի ձայների մեծամասնությունը հնարավոր է գնա Սերժ Սարգսյանին:
Նշենք, հարցումն անցկացվել է դեկտեմբերի 5-16-ն ընկած ժամանակահատվածում Երևանում և հանրապետության բոլոր մարզերում, դրան մասնակցել են 1020 չափահաս քաղաքացի: