Ձեր վստահելի աղբյուրը

Ծննդատներում այցելությունների և այլ ծառայությունների համար այլևս գումար չեն գանձում, այս ուղղությամբ խստացված վերահսկողություն է սահմանում: Այս մասին այսօր լրագրողների հետ հանդիպման ժամանակ հայտարարեց ՀՀ առողջապահության նախարար Դերենիկ Դումանյանը:

«Մենք խիստ ենք լինելու և ամենօրյա վերահսկողություն ենք իրականացնելու: Արգելված են նման տեսակի բոլոր դրամահավաքությունները ծննդատներում: Եթե որևէ նման դեպք արձանագրվի՝ խիստ միջոցներ կձեռնարկենք»,- ասաց նախարարը:

Դ.Դումանյանը հայտնեց, որ 2013թ-ի մարտի 1-ից մարզերի հղիները Երևանի ծննդատներում ծննդաբերելու համար պետք է գումար վճարեն: Նրա խոսքերով՝ այս հրամանը մի նպատակ է հետապնդում՝ չխոչընդոտել մարզերի բուժհիմնարկների զարգացման ծրագրի իրագործումը:

«Հղիները մարզերում իրենց մանկաբարձ-գինեկոլոգի կողմից են վերահսկվում, օրինաչափ կլինի, եթե այդ ծննդալուծումն իրականացվի տվյալ մասնագետի ներկայությամբ: Ժամանակին մենք թույլ էինք տվել, որ ով որտեղ ցանկանա՝ այնտեղ էլ ծննդաբերի: Բայց ստացվում է, որ մարդիկ ցանկություն են ունենում մայրաքաղաքում կամ այլ մարզում ծննդաբերել, որով խախտվում է մասնագիտական կապը»,- նշեց նա՝ հավելելով, որ մարզերում գրանցված հղիների շուրջ մեկ երրորդը մայրաքաղաքի տարբեր ծննդատներում է ծննդաբերում։ Դա նշանակում է, որ նրանց համար մարզերին հատկացված միջոցները ևս այդ հղիների հետ Երևան են ուղղվում։

Ըստ Դ.Դումանյանի՝ 10 հազար դրամով ավելացել է մարզերում մեկ նորմալ (չբարդացած) ծննդի համար հատկացող գումարը՝ այն հավասարեցվելով Երևանի ծննդատներում գործող գներին։ Միաժամանակ հանձնարարվել է ավելացված այդ միջոցներն առավելապես ուղղել աշխատավարձի ֆոնդի ավելացմանը։ Միայն այս քայլով 115 մլն դրամ լրացուցիչ գումար է ուղղվել մարզային ծննդատներ:

Նա նշեց, որ հաստատել են չափորոշիչներ, թե որ դեպքում տվյալ ծննդաբերությունը պետք է Երևանում կատարվի, որպեսզի խուսափեն հետագա բարդություններից: «Ստեղծել ենք մանկաբարձագինեկոլոգիական խումբ, որպեսզի մարզերի բժիշկների հետ աշխատեն: Այսպիսով, ուզում ենք առաջին հերթին բարձրացնել մարզերի բժիշկների մասնագիտական որակավորումը, բացի այդ լրացուցիչ գումարները ուղղում ենք մարզեր, որպեսզի այնտեղ ավելի պատրաստված մասնագետներ գնան աշխատելու»,- ասաց առողջապահության նախարարը:

Նշվեց նաև, որ դեպի մարզեր ուղղվող միջոցները հնարավորինս մեծացնելու նպատակով և հաշվի առնելով, որ մարզերի մեծ մասում արդեն ունեն նոր վերակառուցված և հագեցված ժամանակակից բժշկական հաստատություններ, առաջարկ է ներկայացվել ՀՀ կառավարություն՝ վերանայելու 2013 թ-ի բյուջեով պետական պատվերով իրականացվող հիվանդանոցային բուժօգնության համար տրամադրվող միջոցների համամասնությունն` ի օգուտ մարզերի։

Եթե նախկինում ֆինանսավորման 70 տոկոսը կենտրոնացել է մայրաքաղաքում, ապա եկող տարի այդ համամասնությունը կհասցվի 60-40%-ի` հաշվի առնելով Երևանում նեղ մասնագիտական և երրորդ մակարդակի կլինիկաների առկայությունը։

Դ.Դումանյանի խոսքերով՝ նախարարության 2013թ-ի գերակա խնդիրներից է՝ բարձրացնել բժիշկների, բուժաշխատողների, հիվանդանոցների սպասարկող կազմի աշխատավարձերը: «Բյուջեում լրացուցիչ միջոցներ նախատեսված չեն, ուստի նպատակ ունենք ֆինանսների կառավարման նոր մոդելներ մշակել, որպեսզի կարողանանք բարձրացնել բուժաշխատողների աշխատավարձերը: Այն հիմնականում լինելու է բոնուսների արդարացի բաշխման տարբերակով»,- ասաց նախարարը՝ հավելելով, որ նախատեսում են յուրաքանչյուր կատերգորիայի մասնագետի համար սահմանել նվազագույն աշխատավարձ, իսկ դրանից ավելի գործողությունների համար տրամադրել լրացուցիչ միջոցներ:

Նշվեց նաև, որ մեխանիզմներ են մշակվում մարզերում նաև պոլիկլինիկական ծառայության ֆինանսավորումը մինչև 10 տոկոսով ավելացնելու ուղղությամբ։