Ձեր վստահելի աղբյուրը

«Երևանցիները Երևանի մասին» հետազոտությունների արդյունքներն են հրապարակել Մարքեթինգի հայկական ասոցիացիան և Gallup International Association կազմակերպության հայաստանյան ներկայացուցչությունը։ Հարցման արդյունքներին ծանոթանալու և դրանք մեկնաբանելու համար հետազոտության շնորհանդեսին հրավիրված էր Երևանի քաղաքապետի տեղակալ Կամո Արեյանը։

Երևանի քաղաքապետարանի հասարակայնության հետ կապերի վարչության հաղորդմամբ, վերջին մեկ տարում մայրաքաղաքում արձանագրված փոփոխությունները հարցված երևանցիների 78%–ը գնահատել է դրական, ընդ որում՝ 24%–ը լիովին դրական։ Փոփոխությունները «ավելի շուտ բացասական» են գնահատել հարցվածների 6%–ը, 4%–ը՝ ընդհանրապես բացասական։

«Ընտրված է բավականին հետաքրքիր հարցաշար։ Հարցերի համալիրը բնութագրում է գրեթե ամբողջ տարեկան համայնքային ծրագրերը և քաղաքում տիրող վիճակը։ Ակնհայտ են դրական ցուցանիշները, իսկ այնտեղ, որտեղ հարցման արդյունքները մտահոգիչ են, դրանք իսկապես մեզ ուղղված լուրջ հարցադրումներ են։ Ուշագրավ է 78% դրական ցուցանիշը, ինչը նշանակում է, որ մենք առավել պարտավորված ենք անել ավելին՝ մեր քաղաքի և մեր բնակիչների համար»,- հարցման արդյունքներին ծանոթանալով նշել է Կամո Արեյանը։

Երանցիների նշած շատ խնդիրների լուծումներ Երևանի քաղաքապետի տեղակալը մատնանշել է հաջորդ տարեկան ծրագրում, ինչպես օրինակ աղբահանության և Երևանի սանիտարական մաքրման հետ կապված խնդիրը, որը լուծվում է միջազգային մրցույթով. սպասարկող ընկերությունը հայտնի կլինի մրցույթի արդյունքների վերջնական ամփոփումից հետո և մինչ հաջորդ տարեվերջ կստանձնի պայմանագրային պարտավորությունը։

Ըստ աղբյուրի, որպես Երևանի առջև կանգնած ամենակարևոր խնդիր՝ հարցման մասնակից երևանցիները թվարկել են առավելապես սոցիալական խնդիրներ, որոնք նույնական են հանրապետության սոցիալական ոլորտում առկա խնդիրներին՝ գործազրկություն, գնաճ և այլն, իսկ մասնավորապես Երևան համայնքին առնչվող հիմնախնդիրներ են մատնանշել աղբահանությունը՝ 22%, հասարակական տրանսպորտի խնդիրները՝ 21%, բնապահպանական խնդիրները՝ 14% և այլն։ Կոմունալ վարձերը խնդիր են հարցնածների 8%–ի կարծիքով, մաքրության պակասը՝ 4%–ի։ Հարցվածների 1%–ին խանգարում է շինարարությունը, նույնքանն էլ դժգոհ են ջրամատակարարումից։

Երևանի քաղաքապետարանի իրականացրած դրական փոփոխուխությունների առաջին տեղում կանաչապատ տարածքների ավելացումն է, կարծում են հարցված երևանցիների 18%–ը, 17%–ը համարում է բարեկարգ բակերի կառուցումն է։ 13%–ը նկատել են նոր նստարանները, 7%–ը՝ նոր խաղահրապարակները. ևս 2 տասնյակ դրական փոփոխություններ գնահատվել են սակավ տոկոսներով։

Թեև կանաչապատումը դրական փոփոխություններում առաջատար դիրքում է, այդուհանդերձ հարցվածների 41%–ը այս ոլորտում ակնկալում է առավել ակտիվ ծրագրեր։ Հարցված երևանցիների 29%–ը ցանկալի միջոցառումների ցանկում երկրորդ տեղում է դասակարգել խաղահրապարակների կառուցումը, երրորդ տեղը 28–ական %–ով կիսում են մշակությաին միջոցառումներն ու շաբաթօրյակները։ Սպորտային միջոցառումներն առավել պարբերական է ցանկանում տեսնել հարցվածների 17%–ը։

Հետազոտողների՝ որպես Երևանի բնութագրիչներ առաջարկած կատեգորիաներում գերակշռում են գնահատականների դրական տոկոսները։ Երևանի մշակությաին կյանքից գոհ է երևանցիների 32%–ը, լիովին բավարարված է 22%–ը։ Մշակութային կյանքը սակավ է բավարարում 9%–ին, ընդհանրապես չի բավարարում 7%–ին։ Քաղաքային տրանսպորտը բավարար է 25%–ի համար, լիովին բավարարաում է 13%–ին, ընդհանրապես չի բավարարում հարցվածների 21%–ին։ Կանաչապատ տարածքներն այստեղ էլ ամենաբարձր ցուցանիշն են արձանագրել՝ 40%–ը բավարարված է, իսկ 26%–ը լիովին բավարարված է, դժգոհ է 4%–ը, սակավ դժգոհ է 7%–ը։

Երևան քաղաքում վերջին մեկ տարում կատարված գիշերային լուսավորությունից դժգոհ է հարցվածների 1%–ը, բավարարված է երևանցիների 37%–ը և լիովին բավարարված է ևս 39%–ը։ Մնացյալը դժվարացել են պատասխանել կամ սակավ դժգոհ են։
Հարցվածների ճնշող մեծամասնությունը կողմ է, որ հասարակական վայրերում և հատկապես ուսումնական հաստատություններում ծխելն արգելվի։

Հարցվածները գնահատել են նաև Երևանի վարչական շրջանների աշխատանքները առանձին՝ ըստ կանաչապատման, լուսավորության, անվտանգության, մաքրության ցուցանիշների։ Առաջատար եռյակում են Կենտրոն, Ավան և Դավթաշեն վարչական շրջանները. մյուսները զիջում են միավորների սակավ տարբերությամբ։